Կլենտէյլի Ոստիկանապետի Նախկին Տեղակալ Հայուհին 550,000 Տոլար Վնասուց Հատուցում Պիտի Ստանայ

0111labrahamian-color

Կլենտէյլի ոստիկանապետի նախկին տեղակալ Լուտմիլա Աբրահամեան 550,000 տոլարի վնասուց հատուցում պիտի ստանայ քաղաքի իշխանութիւններէն, անոր կողմէ 2016ի Մայիսին բացուած՝ խտրականութեան ամբաստանութեան հիմքով դատին իբրեւ արդիւնք, կը հաղորդէ “Ասպարէզ”-ը։

Իր բողոքին մէջ Աբրահամեան շեշտած էր, թէ պաշտօնի բարձրացում չէր ստացած եւ ցեղային ու սեռային խտրականութեան զոհ գացած էր քաղաքի ոստիկանապետը ընտրելու գործընթացին ընթացքին, հակառակ անոր որ այդ պաշտօնին դիմած բոլոր թեկնածուներու շարքին ինք ունեցած է այդ պաշտօնը վարելու լաւագոյն յատկանիշները։

Ըստ Աբրահամեանի՝ խտրականութիւնը հրահրուած է նախորդ ոստիկանապետ Ռապըրթ Քասթրոյի կողմէ:

Քաղաքին շահերը ներկայացնող փաստաբանի գլխաւոր օգնական Էն Մորըր նշած է, որ կարգաւորումը «քաղաքին կամ անոր պաշտօնատարներուն կողմէ որեւէ օրէնքի խախտումի յանցանք ստանձնել չի նշանակեր»՝ աւելցնելով, որ «խտրականութեան մասին պնդումները անհի՛մն են»։

Դատարանէն դուրս գոյացած համաձայնութեան շնորհիւ, Աբրահամեանի ստանալիք վնասուց հատուցման համար նկատի առնուած են աշխատավարձի վճարումը (66,000 տոլար), զգացական խանգարումներու եւ ֆիզիքական հիւանդութեան հատուցումը (264,000) եւ փաստաբաններու ծախսերը (220,000 տոլար): Իր կարգին, Աբրահամեան համաձայնած է հեռանալ ոստիկանութեան բաժանմունքէն։

Մասնագիտութեամբ կենսաբան Աբրահամեան մօտաւորապէս երկու տասնամեակ առաջ անակնկալօրէն հասած է այն եզրակացութեան, որ ոստիկան ըլլալը աւելի հետաքրքրական ու նպաստաւոր է: Կլենտէյլի ոստիկանատան մէջ երեք տարի իբրեւ պահեստի ոստիկան ծառայելէ ետք՝ ան, շնորհիւ իր ցուցաբերած հմտութիւններուն, 2010ին ստացած է տեղակալի կոչում, իսկ 2013ին նշանակուած էր Հիւսիսային Կլենտէյլի ոստիկանութեան պետ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS