Կլենտէյլի Քաղաքապետական Խորհուրդը Վաւերացուց Ամերիկահայութեան Թանգարանին Ծրագիրը

1215AAM2

Կլենտէյլի քաղաքապետական խորհուրդը Դեկտեմբեր 13-ին միաձայնութամբ վաւերացուց քաղաքի Կեդրոնական զբօսավայրի ծրագիրը, որուն մէկ մասնիկն է քաղաքամէջը կառուցուելիք Ամերիկահայութեան թանգարանին ծրագիրը։

Ըստ «Ասպարէզ»-ի՝ քաղաքապետարանի անձնակազմը եւ «SWA» ձեւաւորումներու հիմնարկը սոյն ծրագիրի նախագիծին մանրամասնութիւնները ներկայացուցած էին Դեկտեմբեր 5-ի ժողովին՝ շեշտելով քաղաքի կեդրոնը արուեստներով եւ ժամանցի զանազան առիթներով հարուստ ու կանաչապատ տարածք մը ունենալու կարեւորութիւնը ու բաղձալիութիւնը։

Ամերիկահայութեան թանգարանին կողքին, այս տարածքին մէջ պիտի ըլլան նաեւ քաղաքի Կեդրոնական գրադարանը եւ տարեցներու կեդրոնը, ինչպէս նաեւ երեխաներու յատուկ վայրով մը «անտառային» կանաչապատ զբօսավայր մը եւ քալելու արահետներ, որոնք պիտի միանան Պրենտ պողոտային վրայ գտնուող «Ամերիքանա»-ին։

1215AAM3

«Մեր քաղաքը մեծապէս պիտի շահի այս ծրագիրի իրականացումով, որուն շնորհիւ քաղաքացիական, ընկերային կեանքը պիտի աշխուժանայ, ինչպէս նաեւ տարեցներու յատուկ սպասարկութիւնները պիտի ընդլայնին», կ՛ըսէ Ամերիկահայութեան թանգարանի ծրագիրի գործադիր մարմինի ատենապետ Պերճ Կարապետեան, իսկ ծրագիրի ճարտարապետ Արամ Ալաճաճեան քաղաքի ապագան հարստացնող քայլ մը կը համարէ այս որոշումը։

Կլենտէյլի քաղաքապետական խորհուրդը, այս որոշումէն ետք, ծրագիրին մանրամասնութիւնները հանրութեան պիտի ներկայացնէ Յունուարին, եւ կ՛ակնկալուի, որ թանգարանի հողատարածքին շուրջ համաձայնագիր եւ կառուցման համար արտօնագիրներ ապահովելու աշխատանքները ամբողջանան Ապրիլին։

Ամերիկահայութեան թանգարանի գլխաւոր նպատակն է ամերիկահայութեան փորձառութիւնը ուրիշներու հետ բաժնելու ճամբով փոխադարձ ըմբռնումը քաջալերել եւ Միացեալ Նահանգներու ցեղային ու մշակութային բազմազանութիւնը լուսարձակի տակ առնել:

Թանգարանի վարչութեան մաս կը կազմեն շրջանի հայկական 10 կազմակերպութիւններ եւ հաստատութիւններ, որոնք են՝ Հիւսիսային Ամերիկայի Հայ Կաթողիկէ առաջնորդարան, Հայ Մշակութային Հիմնարկութիւն, Հիւսիսային Ամերիկայի Հայ Աւետարանական Միութիւն, Հայ Բարեգործական Ընդհանուր Միութեան Արեւմտեան Միացեալ Նահանգներու շրջան, Ամերիկայի Հայ Աւետարանչական Ընկերակցութիւն, Հայ Օգնութեան Միութեան Միացեալ Նահանգներու Արեւմտեան շրջան, «Նոր Օր» բարեգործական հիմնարկութիւն, «Նոր Սերունդ» մշակութային միութիւն, Հիւսիսային Ամերիկայի Հայց. Առաքելական եկեղեցւոյ Արեւմտեան թեմի առաջնորդարան եւ Ամերիկայի Միացեալ Նահանգներու Հայց. Առաքելական եկեղեցւոյ Արեւմտեան թեմի առաջնորդարան: Յաւելեալ տեղեկութեանց համար, այցելել

www.ArmenianAmericanMuseum.org կայքը, կամ դիմել (844) 586-4626 թիւին:

1215AAM1

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS