Ներդրումային Աշխուժացման Համաձայնագիրի Ստորագրութիւն` Հայ Եւ Լիբանանցի Գործարարներու Միջեւ

Collaboration_121417

Հաղորդագրութիւն` «Ար.Տի.Սի.Էլ»-ի` Աշխարհի լիբանանցի գործարարներու համախմբումին եւ  հայկական առեւտրական եւ տնտեսական պատուիրակութեան հետ փորձառութիւններու փոխանակման եւ ներդրումային աշխուժացման համաձայնագիրի մը ստորագրման շուրջ:

«Ար.Տի.Սի.Էլ»-ը` Աշխարհի լիբանանցի գործարարներու համախմբումը Ֆուատ Զմքհլի եւ վարչական անդամներու նախագահութեամբ, հայկական առեւտրական պատուիրակութեան հետ փորձառութիւններու փոխանակման եւ ներդրումային աշխուժացման համաձայնագիր մը ստորագրեց:

Այս համաձայնութեան ստորագրումը եւ հաւաքը կազմակերպուած էին Ֆուատ Զմքհլի հրաւէրով` երեքշաբթի, 12 դեկտեմբեր 2017-ին: Լիբանանեան համաշխարհային համախմբումը հանդիպումներ կազմակերպեց հայկական պատուիրակութեան հետ, որ բաղկացած էր դրամատնային, արհեստագիտական, ճարտարագիտական, ուժանիւթային, ուտեստեղէնի, դեղորայքի, շինարարական սարքաւորումներու  բնագաւառներէն նշանաւոր գործարարներէ:

Հայկական պատուիրակութիւնը կը գլխաւորէր  Հայաստանի զարգացման հիմնարկի գործադիր տնօրէն Արմէն Ա. Աւագեան` նեկայութեամբ Լիբանանի մէջ Հայաստանի Հանրապետութեան դեսպան Սամուէլ Մկրտչեանի. պատուիրակութեան մաս կը կազմէին Հայաստանի Հանրապետութեան նախագահի խորհրդական  Աւագ Աւագեան, ինչպէս նաեւ նշանաւոր պատասխանատուներ` Զարգացման հիմնարկի շրջանային տնօրէն Ալինա Եղիազարեան, հանդիսութիւններու բաժինի պատասխանատու Մարկոս Ազատեան եւ առեւտուրի ու ներդրումներու տնօրէն Ստեփան Աւաճեան:

Ֆուատ Զմքհլ ըսաւ, որ երկու կողմերուն միջեւ կայացած ժողովները կեդրոնացան հայկական ընկերութիւններուն հետ գործակցութեան եւ ներդրումային առիթներ բացայայտելու անհրաժեշտութեան վրայ ինչպէս նաեւ հիմնելու նոր հարթակ մը Հայաստանի մէջ լիբանանցի գործարարներու համախմբումին համար, որ «Ար. Տի.Սի.Էլ»-ի աշխարհը ըլլայ հարթակ ամբողջ աշխարհի մէջ:

Հայաստանի զարգացման հիմնարկի գործադիր տնօրէն Արմէն Աւագեան ըսաւ, որ հայկական առեւտրական այս պատուիրակութիւնը, որ Լիբանան կ՛այցելէ, կը նկատուի մեծ առիթ մեզի համար: Այս պատուիրակութեան նպատակն է ներկայացնել հայ գործարարները իրենց լիբանանցի պաշտօնակիցներուն` Հայաստանի մէջ առեւտրական գործարքներ կազմակերպելու համար: Մենք կարիքը ունինք օգտուելու մեզի ընձեռուած բոլոր կարելիութիւններէն` առաւելագոյն չափով իրականացնելու համար մեր նպատակաուղղուած շուկան Լիբանանի եւ Հայաստանի մէջ, մանաւանդ որ Լիբանանի մէջ ունինք զօրաւոր հայկական ներկայութիւն, որով կը հպարտանանք:

Իր կարգին, Լիբանանի մէջ Հայաստանի Հանրապետութեան դեսպանը ուրախութիւն յայտնեց կազմակերպուած ընթրիքին համար, որ կազմակերպած էր Լիբանանի գործարարներու համախմբումը, յատկապէս շնորհակալութիւն յայտնեց Ֆուատ Զմքհլին` հիւրընկալելու հայկական պատուիրակութիւնը:

Դեսպանը ըսաւ, որ Լիբանանն ու Հայաստանը ունին դարաւոր ջերմ յարաբերութիւններ: Քառորդ դարէ ի վեր այս յարաբերութիւնները երկու երկիրներուն միջեւ բարձրացած է երկու անկախ ու ինքնիշխան երկիրներու մակարդակին եւ կը շարունակէ իր ամրապնդումը:

Ան նշեց, որ պէտք է շարունակենք մեր գործակցութիւնը` ամրացնելով տնտեսական եւ առեւտրական յարաբերութիւնները: Այս նպատակը կարելի է իրականացնել երկու երկիրներուն յարատեւ ճիգերով:

Դեսպանը աւարտեց իր խօսքը ըսելով. «Այս յարափոփոխ աշխարհին մէջ մենք պէտք է վստահինք  երկու ժողովուրդներու հասարակաց գիծի հիմքերուն, որոնք մեր գործակցութիւնը կը դարձնեն աւելի դիւրին, ինչ որ կ՛արտացոլայ մեր միացեալ առաւել պայծառ տեսլականներուն մէջ: Թող այս երեկոյթը ըլլայ սկիզբը խոստմնալից ապագայի»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS