Բերիոյ Հայոց Թեմի Առաջնորդը Լոս Անճելըս Կ’այցելէ

24993597_1292387004196656_2293674090638419895_n

Դեկտեմբեր 11-ի երեկոյեան, ԱՄՆ-ի Արեւմտեան Թեմի Առաջնորդ Գերշ. Տ. Մուշեղ Արք. Մարտիրոսեանի հետ Լոս Անճելըս ժամանեց Բերիոյ Հայոց Թեմի Առաջնորդ Գերշ. Տ. Շահան Արք. Սարգիսեան, ընդառաջելով Սուրիոյ Հայութեան Օժանդակութեան Միացեալ Մարմինի – ՍԱՐՖ – հրաւէրին, ներկայ ըլլալու համար շարք մը ձեռնարկներու եւ հանդիպումներ ունենալու մեր գաղութի պատասխանատու մարմիններու ներկայացուցիչներուն հետ։ Երկու առաջնորդ սրբազանները կու գային Պէյրութէն, ուր անցեալ շաբաթ մասնակցեցան Մեծի Տանն Կիլիկիոյ Կաթողիկոսութեան Ազգային Ընդհանուր Ժողովին, կը հաղորդէ “Գանձասար”-ը։

Ինչպէս ծանօթ է, Սուրիոյ տագնապի ծանրացման տարիներուն, ու յանձնարարութեամբ Ս. Աթոռոյս գահակալ Ն.Ս.Օ.Տ.Տ. Արամ Ա. Կաթողիկոսին ու նախաձեռնութեամբ Թեմիս Առաջնորդ Սրբազան Հօր ու գաղութի պատասխանատու մարմիններու՝ կազմուեցաւ Սուրիոյ Հայութեան Օժանդակութեան Միացեալ Մարմինը, որ համախմբեց հայկական յարանուանութեանց, բարեսիրական միութեանց ու քաղաքական կազմակերպութեանց ներկայացուցիչները, որպէսզի բոլորի ձեռքերուն միացումով ու աշխատանքներու համակարգումով, անմիջական օգնութիւն հասնի Սուրիոյ ու մասնաւորաբար Հալէպի հայութեան։ Տագնապին պայթումէն ասդին, Շահան սրբազան երրորդ անգամն է որ կ’այցելէ Լոս Անճելըս։ Ան Երեքշաբթի, 12 Դեկտեմբերի երեկոյեան, ներկայ եղաւ Ազգային Վարչութեան նիստին, Չորեքշաբթի, 13 Դեկտեմբերի երեկոյեան ներկայ պիտի ըլլայ ՍԱՐՖ-ի կողմէ Սուրիոյ հայութեան վերականգնումին ի սպաստ պաշտօնական ընթրիքին, «Չեւի Շէյս Քաունթրի Քլապ»ին մէջ, իսկ Ուրբաթ, 15 Դեկտեմբերի երեկոյեան, Իրանահայ Միութեան սրահին մէջ ներկայ պիտի ըլլայ ժողովրդային հաւաքի մը, ուր խօսք առնելով՝ լայն տեղեկութիւններ պիտի տայ Սուրիոյ հայութեան վերականգնումի եւ վերակառուցման երթին մասին։

Պաշտօնական այս հանդիպումներուն զուգահեռ, հիւր առաջնորդ սրբազանը, Թեմիս բարեխնամ առաջնորդ սրբազանին ընկերակցութեամբ, պիտի այցելէ Ազգային վարժարաններ ու հանդիպումներ պիտի ունենայ պատասխանատու մարմիններու հետ։

Թեմիս առաջնորդ սրբազանին տնօրինութեամբ եւ հրաւէրով, Տ. Շահան սրբազան Կիրակի, 17 Դեկտեմբերին, Ս. Պատարագ պիտի մատուցէ Կլենտէյլի Ս. Աստուածածին եկեղեցւոյ մէջ։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS