ՆԱԹՕի Չափանիշներով Զօրավարժութիւն՝ Ամերիկայի Օգնութեամբ Կառուցուող Կեդրոնին Մէջ

1214nato

Հայաստանի պաշտպանութեան նախարարութիւնը (ՊՆ) նպատակ ունի Ամերիկայի Միացեալ Նահանգներու օգնութեամբ Կոտայքի մարզին մէջ կառուցուող «Զառ» ուսումնավարժական կեդրոնը վերածելու միջազգային խաղաղապահ ուսումնական կեդրոնի: Հայաստանի ՊՆ պաշտպանական քաղաքականութեան վարչութեան պետ Լեւոն Այվազեան, Երեւանի մէջ ՆԱԹՕի տեղեկատուական կենտրոնին մէջ հրաւիրուած ասուլիսին ընթացքին յայտնեց, որ այս ծրագիրի նպատակն է հիմնել խաղաղապահ գործողութիւններու ուսումնական կեդրոն:

«Մենք հեռահար նպատակ ունինք այդ ուսումնական կեդրոնի վերջնական կառուցումէն ետք, թերեւ վկայական տանք, եւ այն դառնայ միջազգային խաղաղապահ ուսումնական կենտրոն», շեշտած է Այվազեան:

Հայաստանի պաշտպանութեան նախարարութեան «Զառ» ուսումնավարժական կեդրոնին մէջ ամերիկեան կողմի համաֆինանսաւորումով իրականացուող շինարարական աշխատանքները մեկնարկած են այս տարուան Մարտին՝ պաշտպանութեան նախարար Վիգէն Սարգսեանի եւ Հայաստանի մօտ Միացեալ Նահանգներու դեսպան Ռիչըրտ Միլզի մասնակցութեամբ: «Զառ» կեդրոնը ՊՆ խաղաղապահ զօրաբաժինի հիմնական ուսումնական ստորաբաժանումն է, ուր կ՛իրականացուին խաղաղապահ ուժերու վարժանքները եւ վերապատրաստումը:

«Այս տարի աւարտեցաւ ուսումնական կեդրոնի շինարարութեան առաջին փուլը: Դեռ կայ քանի մը փուլ, որպէսզի ամբողջութեամբ պատրաստ ըլլայ այն: Բացի շինարարական աշխատանքներէն՝ կը ծրագրուի կեդրոնին մէջ տեղակայել խաղաղապահ գոծողութիւններու վարժանքներու համար անհրաժեշտ տարբեր սարքաւորումներ, տեխնիկական միջոցներ, որոնք հնարաւորութիւն կու տան խաղաղապահներուն այնտեղ վարժանքներ իրականացնել»,- յայտնեց Այվազեան:

Արդէն եկող տարի «Զառ» կեդրոնին մէջ կը ծրագրուի իրականացնել զօրավարժութիւն՝ ՆԱԹՕ-ի գնահատման գործընթացի ծիրին մէջ: Այդ զօրավարժութիւնը Հայաստանի ազգային զօրավարժութիւնն է, խաղաղապահ կարողութիւններու գնահատումը՝ ՆԱԹՕ-ի չափանիշներուն համապատասխան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS