Կարօ Փայլանը Պոլսոյ Հայոց Պատրիարքի Ընտրութեան Հարցը Խորհրդարան Տեղափոխած է

garo paylan

Թուրքիոյ հայ համայնքը տեւական ժամանակ է Պոլսոյ Հայոց պատրիարքի ընտրութեան կազմակերպման հարցով պատասխան կ՝ակնկալէ ներքին գործոց նախարարութենէն:

Վերջինս դեռ չէ պատասխանած Սթամպուլի նահանգապետարանին միջոցով պատրիարքարանի կողմէ ներկայացուած դիմումին: Թուրքիոյ խորհրդարանի հայ պատգամաւոր Կարօ Փայլանը հարցը տեղափոխած է խորհրդարան` գրաւոր հարցում ուղղելով ներքին գործոց նախարար Սուլէյման Սոյլուին: Այս մասին կը յայտնէ պոլսահայ «Ակօս»-ը:

Գրաւոր հարցման մէջ Փայլանը յիշեցուցած է, որ պատրիարք Մեսրոպ Մութաֆեանը առողջական խնդիրներու հետեւանքով չի կրնար կատարել իր պարտականութիւնները: Ան նշած է, որ պատրիարքական տեղապահ ընտրուած Գարեգին արքեպիսկոպոս Պէքչեանի գլխաւորութեամբ՝ ստեղծուած էր Նախաձեռնող խումբ, որ յատուկ դիմում ուղարկած էր Սթամպուլի նահանգապետարան` ընտրութիւնները կազմակերպելու խնդրանքով, սակայն այդ դիմումին մինչ օրս պատասխան չէ եկած, մինչդեռ ընտրութիւնները կը նախատեսուէին կազմակերպել Դեկտեմբեր 10-13 երկարող ժամանակահատուածին։

Փայլան ընդգծած է, որ համաձայն լրատուամիջոցներու մէջ տեղ գտած տեղեկատւութեան` Սթամպուլի նահանգապետ Ուասիպ Շահինը ըսած է, թէ «պետութիւնը Գարեգին Պէքչեանը չի ճանչնար իբրեւ պատրիարքական տեղապահ եւ կ՝ուզէ, որ ընտրութիւնը կատարուի պատրիարքարանի միւս երկու եպիսկոպոսներուն միջեւ»: «Պետութեան կողմէ պատրիարքի ընտրութիւններուն նման կերպ միջամտելը եւ գործընթացի այսքան ձգձգուիլը համայնքէն ներս անհանգստութեան պատճառ դարձած է»,- փաստած է հայ պատգամաւորը:

Ան Սոյլուէն պահանջած է պատասխանել` արդեօք ո՞րն է պատրիարքական ընտրութիւններուն պետութեան միջամտութեան հիմքը, իսկապէս կա՞յ միջամտութիւն պատրիարքական ընտրութիւններուն, ինչպէս նշած էր Սթամպուլի նահանգապետը: Բացի այդ, ան փորձած է հասկնալ, ի՞նչն է ընտրութեան կազմակերպման գործընթացին ձգձգման պատճառը, եթէ հայկական համայնքէն ներս կայ համաձայնութիւն եւ աշխատանքները այդ ուղղութեամբ արդէն սկսած են: Ի վերջոյ, Փայլանը հարցուցած է, թէ ե՞րբ պիտի աւարտին պատրիարքի ընտրութիւնը արգիլելու փորձերը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS