Հակառակ Ձմրան Ցուրտին` Սթրազպուրկի Մէջ Հայ Ընտանիքները կ՛ապրին Փողոցը Կամ Ինքնաշարժներու Մէջ

104_9444.thumb

Ֆրանսական France Bleu կայքը անդրադարձած է Սթրազպուրկի մէջ անօթեւան հայ ընտանիքներու խնդրին: Ինչպէս կը գրէ կայքը, հակառակ որ օդը պաղած  է ու ձիւնն ալ եկած, հայ ընտանիքները` տասնեակ երեխաներու հետ միասին, կը քնանան Սթրազպուրկի փողոցները:

Ըստ “Փանորամա”-ի՝ կը նշուի, որ մարզպետարանի կողմէ բացուած են արտակարգ կեցավայրեր, սակայն տեղերը բաւարար չեն:

«Հինգ հայ ընտանիք, 15 երեխայ կը քնանան Սթրազպուրկի փողոցները կամ ինքնաշարժներու մէջ` Դեկտեմբերի սկիզբը: 3-4 տարի է արդէն Ֆրանսայի մէջ կ՛ուսանին պզտիկներ, որոնց մէջ են Մէյնոյի քոլէճի 3 աշակերտներ։ Անոնցմէ  քանի մը հոգին հիւրընկալած է ուսուցիչներէն մէկը»,- կը գրէ France Bleu-ն:

Մարզպետարանի արտակարգ կեցավայրին մէջ տեղ ստանալու համար, անհրաժեշտ է զանգահարել 115, սակայն այնտեղ տեղ չըլլալուն պատճառով զանոնք կը մերժեն:

13 տարեկան Գագիկը ամէն օր կը զանգահարէ 115, կ՛ըսէ, որ ձմեռ է, ձիւն կու գայ, իրենք դուրսն են, սակայն ոչինչ կ՛օգնէ:

«Ամրան մենք վրանի տակ կը մնայինք, իսկ հիմա ինքնաշարժի մէջ: Մենք ինքնաշարժը աշխատած կը ձգենք գրեթէ ամբողջ գիշերը, որ տաք ըլլայ, բայց այսպէս ալ պէտք է վճարենք տիզելի համար: Դժուար է նաեւ ինքնաշարժի մէջ տնային աշխատանքներ ընելը»,- կ՛ըսէ Գագիկը, որ դասարանի լաւագոյն աշակետներէն մէկն է:

Կը նշուի, որ օրերս կը նախատեսուի բանալ արտակարգ կեցավայրի եւս 264 տեղ ձմրան համար, որ պիտի գործէ մինչեւ 2018-ի Մարտ 31-ը, որ պիտի աւելցուի Ստորին Հռենոսի (Bas-Rhin) մէջ առկայ արդէն 8476 կեցավայրին։

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS