Հայաստան Աշխարհի Ամէնէն Ռազմականացած Երկիրներու Ցանկին Վրայ 3-րդը, Իսկ Լիբանան` 20-րդը

iskanderՊոննի Փոփոխութեան միջազգային կեդրոնը (BICC) հրապարակած է Մաքս Մուչլըրի ուսումնասիրութեամբ` համաշխարհային ռազմականացման իր տարեկան զեկուցումը եւ աշխարհի ամէնէն ռազմականացած երկիրներու ցանկը:

Ըստ “Ազդակ”-ի՝ 2017-ի ցանկին վրայ (ուր նկատի կ՛առնուին 2016-ի տուեալները), Հայաստան յատկանշական ոստում մը կատարած է` նախորդ տարուան արդիւնքներուն բաղդատած, 21-րդ դիրքէն 3-րդ դիրքին բարձրանալով, մինչ Ազրպէյճան նախորդ տարուան 6-րդ դիրքէն իջած է 11-րդ դիրքի: Վրաստան կը գրաւէ 55-րդ դիրքը:

Հայաստան կը հանդիսանայ Եւրոպայի ամէնէն ռազմականացած երկիրը, իսկ Թուրքիա կը գրաւէ 25-րդ դիրքը:

Ուսումնասիրութեան մէջ կը շեշտուի, որ յատկապէս Սէուտական Արաբիոյ, Օմանի, Պահրէյնի եւ Ազրպէյճանի պարագային, քարիւղի միջազգային գինի անկումը պատճառ դարձած է, որ զինուորական բնագաւառին տրամադրուող գումարները համեմատաբար նուազին: Հոն նաեւ նշուած է, որ Արցախի ձգձգուող տագնապին պատճառով` Հայաստան եւ Ազրպէյճան կը շարունակեն հսկայ գումարներ տրամադրել զինուորական բնագաւառին:

Կեդրոնը ամէնէն ռազմականացուած պետութիւնը նկատած է Իսրայէլը, իսկ ցանկին վրայ երկրորդ տեղը գրաւած է Սինկափուրը: Յառաջատարներու տասնեակը կ՛ամբողջացնեն Հայաստանը, Ռուսիան, Հարաւային Քորէան, Քուէյթը, Յորդանանը, Կիպրոսը, Յունաստանն ու Պրունէյը: Միացեալ Նահանգները կը գրաւեն 31-րդ դիրքը եւ կը հանդիսանան աշխարհի տարածքին զինուորական մեծագոյն ամավարկը ունեցող երկիրը` 611 միլիառ տոլարով, ինչ որ զինուորական նպատակներու համար տրամադրուող համաշխարհային ընդհանուր գումարին 39 տոկոսն է:

«Միջին Արեւելքի ամէնէն ռազմականացած երկիրները» ցանկին վրայ, Իսրայէլին, Քուէյթին եւ Յորդանանին կը յաջորդեն` Օմանը (13-րդ), Պահրէյնը (15-րդ), Սէուտական Արաբիան (17-րդ), Լիբանանը (20-րդ), Արաբական Միացեալ Էմիրութիւնները (21-րդ), Իրանը (22-րդ) եւ Եգիպտոսը (28-րդ):

Ցանկը պատրաստելու ընթացքին նկատի կ՛առնուին 151 երկիրներու մէջ զինուորական բնագաւառին համար ծախսուած գումարները, Համախառն ներքին արդիւնքը, բնակչութեան թիւը եւ շարք մը այլ ազդակներ: Կեդրոնը այս հետազօտութիւնները կը կատարէ 1990-էն սկսեալ: Անոր համար կ՛օգտագործուին Սթոքհոլմի Համաշխարհային տագնապներու հետազօտման հիմնարկի, Դրամական միջազգային հիմնադրամի, Առողջապահութեան համաշխարհային կազմակերպութեան եւ շարք մը այլ կառոյցներուն տուեալներ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS