Հնչակեան Կուսակցութեան Փառապանծ 130-ամեակի Նշում Պէյրութի Մէջ

1_1487325

«Նոյնն է մեր ուղին այսօր եւ ընդմիշտ»: Հայկական իրականութեան քաղաքական առաջին կուսակցութեան` Սոցիալ Դեմոկրատ Հնչակեան Կուսակցութեան հիմնադրութեան 130-ամեակի փառապանծ նշումը տեղի ունեցաւ երէկ երեկոյեան, Սինէլ Ֆիլի քաղաքապետարանի սրահին մէջ:

Հանդիսութեան ներկայ գտնուեցան Լիբանանի հայոց թեմի առաջնորդ Շահէ եպս. Փանոսեան, Տանն Կիլիկիոյ կաթողիկէ հայոց Պէյրութի պատրիարքական թեմի օգնական եպիսկոպոս Գէորգ Ասատուրեան, ՄԱՀԱԵՄ-ի փոխնախագահ, Հայկազեան համալսարանի նախագահ Վեր. Դոկտ. Փօլ Հայտոսթեան, Պէյրութի մէջ Հայաստանի Հանրապետութեան արտակարգ եւ լիազօր դեսպան Սամուէլ Մկրտչեան, կանանց հարցերու պետական նախարար Ժան Օղասապեան, ՍԴՀԿ Կեդրոնական Վարչութեան անդամներ՝ ընկ. Ալեքսան Քէօշկէրեան եւ ընկ. Նարեկ Գալստեան, ՍԴՀԿ Լիբանանի շրջանի Վարիչ Մարմինի ատենապետ, պետական երեսփոխան ընկ. Սեպուհ Գալփաքեան, պետական երեսփոխան Շանթ Չինչինեան, ՌԱԿ Լիբանանի Շրջանային Վարչու թեան ատենապետ Տոքթ. Աւետիս Տագէսեան, ՀՅԴ Լիբանանի Կեդրոնական Կոմիտէի անդամ Վիգէն Աւագեան, Լիբանանի Կեդրոնական դրամատան նախկին փոխկառավարիչ Յարութիւն Սամուէլեան, Պէյրութի քաղաքապետութեան անդամ, ՀԿԲՄ-ի ատենապետ Արամ Մալեան, Սին էլ Ֆիլի քաղաքապետի ներկայացուցիչ Աւետիս Երեմեան, ՍԴՀԿ-ի մասնաճիւղերու պատասխանատու ընկերներ, միութիւններու ղեկավարներ եւ ներկայացուցիչներ, հնչակեան կուսակցականներ եւ լիբանանահայերու բազմութիւն մը:

Լիբանանի, Հայաստանի եւ Հնչակեան կուսակցութեան քայլերգներու յոտնկայս ունկնդրութենէն ետք տեղի ունեցաւ «Դարերու Ուղեկիցը» խորագրեալ տեսագրութեան ցուցադրութիւն, որուն մէջ ներկայացուեցաւ Հնչակեան կուսակցութեան անցած 130-ամեայ ուղին, անոր բոլորա հանգրուան ները, Հնչակեան հերոսներու գործունէութիւնը եւ կուսակցութեան արձանագրած յաջողութիւնները:

Հանդիսութեան բացման խօսքը կատարեց ՍԴՀԿ Տխրունի Ուսանողական Երիտասարդական Միութեան ատենապետ ընկ. Անդրանիկ Սալպաշեան, որմէ ետք «1887 Թուին» երգով հանդէս եկաւ լիբանանահայ երիտասարդ երգիչ ընկ. Յովիկ Թաֆրանեան: ՍԴՀԿ Լիբանանի շրջանի Վարիչ Մարմինի ատենապետ, պետական երեսփոխան ընկ. Սեպուհ Գալփաքեան իր խօսքին մէջ նշեց, որ հոյլ մը ուսանողներու կողմէ հիմնադրուած կուսակցութիւնը 130 տարիէ ի վեր կը մնայ պատնէշի վրայ` յանուն հայ ժողովուրդի շահերու պաշտպանութեան: Ընկ. Գալփաքեան նշեց, որ Հնչակեան կուսակցութիւնը դարձած է պատմական փարոս մը, որ լոյս սփռեց եւ յոյս ներշնչեց հայ ժողովուրդին, անոր մութ եւ անյոյս օրերուն, իսկ այժմ վերածուած է յաղթանակի փարոսի: Անոր համաձայն, Հնչակեան կուսակցութիւնը տէրը կը կանգնի հայրենիքը պաշտպանելու եւ հնչակեան հերոսներուն ուխտը կատարելու իր յանձնառութեան:

Ընկ. Գալփաքեան իր խօսքին մէջ անդրադարձաւ Միջին Արեւելքի զարգացումներուն ընդհանրապէս եւ լիբանանեան նորագոյն անցուդարձերուն մասնաւորապէս: Դժուար որակելով տարածաշրջանի կացութիւնը, ընկ. Գալփաքեան կոչ ուղղեց ըլլալու զգօն: Ան զօրակցութիւն յայտնեց Լիբանանի անկախութեան եւ գերիշխանութեան, կարեւորելով պետական հաստատութիւններու առողջ աշխատանքը: Ընկ. Գալփաքեան դրուատեց Հանրապետութեան նախագահին եւ վարչապետին ջանքերը` պահպանելու Լիբանանի կայունութիւնը եւ երկիրը հեռու պահելու շրջանի հրդեհներէն:

Նոր Սերունդ Մշակութային Միութեան «Արեգ» պարախումբի տղաներն ու աղջիկները ներկայացուցին Հնչակեան կուսակցութեան հիմնադրութեան 130-ամեակին նուիրուած պար մը: Ապա բեմ բարձրացաւ ՍԴՀԿ Կեդրոնական Վարչութեան անդամ, պատմական գիտութիւններու դոկտոր ընկ. Նարեկ Գալստեան: Ան գաղափարական եւ մարտական հսկայ ընտանիք մը համարեց Հնչակեան կուսակցութիւնը եւ պատրաստակամութիւն յայտնեց նուիրուելու հայրենիք Հայաստանին: Դիտել տալով, որ Հնչակեան կուսակցութիւնը շատ աւելի հին է քան նոյնիսկ ատրպէյճանցի ազգը, ընկ. Գալստեան հաստատեց, որ կուսակցութիւնը նաեւ երիտասարդ եւ ապագայի քաղաքական ուժ է: Անոր համաձայն, միակ եւ այլընտրանք չունեցող կողմնորոշումը այսօր պէտք է ըլլայ Հայաստանի Հանրապետութիւնը, հակառակ իր բոլոր խնդիրներուն եւ անարդարու թեանց: «Այսօր Հայաստանի Հանրապետութիւնը կանգնած է վճռական փոփոխութիւններու առջեւ եւ երկրի հզօրութեան կարեւորագոյն առանցքներէն մէկն է նաեւ հայկական Սփիւռքը»,- ըսաւ ընկ. Գալստեան: Անոր խօսքով, այսօրուան առաջնահերթ խնդիրը պէտք է ըլլայ Արցախին նեցուկ կանգնիլը եւ անոր անկախութեան ճանաչումը պարտադրելը: Ընկ. Գալստեան կուսակցութեան պատրաստակամութիւնը յայտնեց իր մարտական եւ կազմակերպչական ուժերը տրամադրելու Արցախին, կոչ ուղղելով ըլլալու կազմակերպուած եւ միաբան, մեր կամքը պարտադրելու համար Ատրպէյճանին: Ան հակիրճ կերպով անդրադարձաւ Հայաստանի մէջ Հնչակեան կուսակցութեան գործունէութեան եւ արձանագրած նորագոյն յաջողութիւններուն:

«Արարատ» օրաթերթի տնօրէնուհի ընկ.հի Անի Եփրեմեան ապրումով ասմունքեց հայրենաշունչ բանաստեղծութիւն մը: Հայրենի երգիչ Յարութ Մուրատ եան ապա մեկնաբանեց «Ախպերս ու Ես», «Տուն Իմ Հայրենի» եւ «Հայոց Բանակ» երգերը: ՍԴՀԿ Կեդրոնական Վարչութեան անդամ ընկ. Ալեքսան Քէօշկէրեան իր խօսքին մէջ նշում կատարեց Հնչակեան կուսակցութեան տարածումի ընդարձակ աշխարհագրութեան, որ կը հասնի ամէն տեղ, ուր հայու բաբախող սիրտ կայ: Անոր համաձայն, ազգային եւ ընկերային պայքարներով լեցուն այս կուսակցութիւնը հաւատարիմ կը մնայ համամարդկային սկզբունքներուն, նաեւ կը շարունակէ գործել իր մօտաւոր եւ հեռաւոր նպատակներուն ուղղութեամբ: Ընկ. Քէօշկէրեան կոչ ուղղեց ամրապնդելու Հայաստան-Արցախ-Սփիւռք եռամիասնութիւնը եւ ղարաբաղեան հարցը լուծելու խաղաղ ու արդար հանգուցալուծմամբ, դիտել տալով, որ Հնչակեան կուսակցութիւնը միշտ կանգնած է արդար իրաւունքներ ունեցող ժողովուրդներու կողքին, ընկ. Ալեքսան Քէօշկէրեան նշեց, որ Հնչակեան կուսակցութիւնը Ցեղասպանութեան ճանաչման առնչութեամբ ճիշդ եւ արդիւնաւէտ համարած է աշխատիլ Թուրքիոյ ներքին հրապարակին վրայ, յառաջադէմ կազմակերպութիւններու եւ անհատներու հետ: Անոր համաձայն, այս աշխատանքը արդարացուած է եւ տուած շօշափելի արդիւնքներ, շեղում մտցնելով Թուրքիոյ մէկ հատուածի հասարակական մտածողութեան մէջ:

«Թուրքիոյ մէջէն Հայոց Ցեղասպանութեան ճանաչումը ընդունողներ գտնելը հաւասար եւ աւելի արդիւնաւէտ աշխատանք է քան այլեւայլ խորհրդարաններու մէջ զանոնք որոնելը», ըսաւ ընկ. Քէօշկէրեան:

Լիբանանի հայոց թեմի առաջնորդ Շահէ եպս. Փանոսեան իր եզրափակիչ խօսքին մէջ ողջունեց Հնչակեան կուսակցութեան հիմնադրութեան 130-ամեակը: Ան յիշեցուց, որ հայկական կուսակցութիւնները ծնած են ժողովուրդի կարիքներէն, ծառայելու համար ժողովուրդին: Ան կոչ ուղղեց հայկական կազմակերպութիւններուն աշխուժացնելու իրենց աշխատանքը, համաշխարհայնացման դժուար պայմաններուն մէջ:

Աւարտին, հայրենի երգիչ Յարութ Մուրատեան կատարեց «Հնչակեան Ենք Մենք» երգը, իսկ Մուրատեան, Յովիկ Թաֆրանեան եւ ներկաները միասնաբար երգեցին «Ուխտի Հրաւէր»-ը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS