Հալէպի Մէջ Մեծ Շուքով Նշուեցաւ Ս.Դ. Հնչակեան Կուսակցութեան 130-ամեակը

6_4463001

Հալէպի մէջ հանդիսաւոր կերպով նշուած է է Ս.Դ.Հ.Կ.-ի 130-ամեակը: Ձեռնարկներու մեկնարկը սկսած է Կիրակի, 26 Նոյեմբերի առաւօտեան, Հալէպի Ազգային գերեզմանատան մէջ տեղադրուած 20 կախաղաններու յուշակոթողի
այցելութեամբ, ուր յարգանքի տուրք մատուցուած եւ ծաղկեպսակներ զետեղուած են կուսակցութեան եւ անոր ենթակայ բոլոր միութիւններուն անունով: Այս մասին կը հաղորդէ Լիբանանի «Արարատ» օրաթերթը։

Այնուհետեւ, կէսօրէ ետք, Հալէպի «Գէորգ Եսայեան» սրահէն ներս տեղի ունեցած է Ս.Դ.Հ.Կ.-ի 130-ամեակի պաշտօնական արարողութիւնը, որուն ներկայ գտնուած են երեսփոխան Ժիրայր Ռէյիսեանը, ՀՅԴ-ի եւ ՌԱԿ-ի ներկայացուցիչները, միւս կազմակերպութիւններու եւ միութիւններու ներկայացուցիչները: 700 հոգի պարփակող սրահը ամբող ջութեամբ լեցուն եղած է:

Կուսակցութեան խօսքը կարդացած է Տխրունի Ուսանողական Երիտասարդական Միութեան անդամ Սիրան Զգուշեանը: Ան իր խօսքին մէջ ժողովուրդին յիշեցուցած է կուսակցութեան նպատակները, որոնք ինչպէս անցեալին, այսօր եւ ապագային ալ կը մնան նոյնը: Ընդգծելով այն միտքը, որ Սուրիոյ, մասնաւորապէս Հալէպի մէջ պատերազ մի դժուար տարիներուն կուսակցութիւնը միշտ մնաց պատնէշի վրայ եւ իր բոլոր կարելի միջոցներով ու կառոյցներով` Կիլիկեան վարժարանով, Նոր Սերունդ Մշակութային Միութեամբ, ՀՄՄ-ով, փորձեց օգնութեան ձեռք երկարել վիրաւոր սուրիահայութեան:

Արաբերէն բացման խօսքը կատարած է «Տխրունի»ի վարչական անդամներէն Գօգօ Աղայեան: Այնուհետեւ, սահիկներու միջոցաւ ներկայացուած է Ս.Դ.Հ.Կ.-ի ամփոփ պատմութիւնը ներկայացնող 20 վայրկեաննոց տեսանիւթ մը, որուն աւարտին հաստատուած է այն միտքը, որ կուսակցութիւնը միշտ հաւատացած է հայ ազգի միասնականութեան եւ Հայաստանի ամբողջականութեան ու յանուն այդ գաղափարի իրագործման` մշտապէս  թիկունք կանգնած է Հայաստանին:

Ձեռնարկներուն մաս կազմած են նաեւ ՀՄՄ-ի փողերախումբն ու սկաուտութիւնը: Մօտ մէկուկէս ժամնոց գեղարուեստական յայտագրէն վերջ պարահանդէս տեղի ունեցած է «Քուրթուպա» ճաշարանէն ներս: Պարահանդէսը եղած է միայն կուսակցականներու համար: Հալէպահայ երգիչ Յակոբ Այնթէպլեան յեղափոխական եւ ազգային երգերով ճոխացուցած է մթնոլորտը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS