Թրքական Մամուլը Արձագանգած է Խումբ Մը Տէրսիմահայերու Հայաստանեան Այցին

Dersimliler

Թրքական մամուլը արձագանգած է Հայաստան այցելած խումբ մը տէրսիմցիներու յայտարարութեան: Մասնաւորապէս «Sabithaber.com» կայքէջը անդրադառնալով այդ այցին` գրած է, թէ «սուտ է թունճելիցիներու այն պնդումը, ըստ որու` Տերսիմի բնակչութեան կէսը հայեր են»: Այս մասին կը հաղորդէ Akunq.net-ը:

Աղբիւրին համաձայն` թրքական լրատուամիջոցը կը յայտնէ, թէ Տերսիմէն Հայաստան գացած 9 գիւղապետներ այցելած են Հայոց Ցեղասպանութեան զոհերու յուշարձան, եւ թէ անոնց մէջ գտնուած են նաեւ Թունճելիի (Տերսիմի ներկայ պաշտօնական անուանումը-Ակունքի խմբ.) միութիւններու դաշնութեան նախագահ (Tunceli Dernekleri Federasyonu /DEDEF/) Ահմեթ Պալքըսը եւ Թունճելիի հայերու եւ ալեւիներու բարեկամութեան միութեան (DERADOST) նախագահ Սերքան Սարիաթաշը: Անոնք այցելած են նաեւ Մայր Աթոռ Սուրբ Էջմիածին, Խոր Վիրապ, Հայաստանի պատմութեան թանգարան եւ Մատենադարան:

Սերքան Սարիաթաշը, ըստ աղբիւրին, յայտարարած է. «Թուրքիան պէտք է ճանչնայ Ցեղասպանութիւնը, որ պէտք է դատապարտեն նաեւ զայն դեռ չճանչցած միւս երկիրները: Մեծամասամբ ալեւիներէ բաղկացած Տերսիմի բնակչութեան որոշ մէկ մասը ունի հայկական ծագում: Պատմական Ծոփք նահանգի մէկ հատուածը կազմող Թունճելին կը գտնուի Վանայ լիճէն հիւսիս-արեւմուտք: 20-րդ դարու սկիզբը Թունճելիի բնակչութեան մեծ մասը հայ էր, տեղանուններն ալ հայկական: Թրքական կառավարութեան ջանքերով Տերսիմի մէջ գտնուող հայկական եկեղեցիները աւերուած են: Ցեղասպանութեան տարիներուն թունճելիցիները մօտ 40 հազար հայու ապաստան տուած են: Անոնց մեծ մասը ալեւի դարձած է: 1915-էն առաջ Թունճելիի մէջ 45 հայկական եկեղեցիներ եւ 5 վանքեր կային: Վերջին 2 տարուան մէջ տէրսիմցիները սկսած են վերադառնալու իրենց հայկական արմատներուն: Այսօր Տէրսիմի մէջ տեղացի հայերու հայրենակցական միութիւն կը գործէ»:

Նշենք, որ թէեւ այդ այցը շատոց եղած է, սակայն թրքական մամուլը հարկ համարած է հիմա անդրադառնալ ատոր` հիմնուելով Ermenihaber.am կայքին մէջ վերջերս թրքերէնով հրապարակուած տեղեկատուութեան վրայ:

Մելինէ Անումեան

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS