Լիբանանի Վարչապետ Սաատ Հարիրի Վերադարձաւ Պէյրութ

hariri_112117

Լիբանանի Հանրապետութեան վարչապետ Սաատ Հարիրի, Նոյեմբեր 21-ի ուշ գիշերին վերադարձաւ Պէյրութ, ուր բարեկամներու խուռներամ բազմութիւն մը զինք դիմաւորեց` ապահովական խիստ միջոցառումներու հսկողութեան տակ: Այս մասին կը հաղորդէ Լիբանանի «Ազդակ» օրաթերըը։

17 օրուան բացակայութենէ ետք վարչապետ Հարիրի Փարիզէն իր վերադարձի ճամբուն վրայ կարճատեւ այցելութիւն տուաւ յաջորդաբար Եգիպտոսի եւ Կիպրոսի: Խորհրդակցութեանց առանցքը կազմած էին Լիբանանի վերջին իրադարձութիւնները` Հարիրիի Ռիատէն կարդացած հրաժարականի հետեւանքներուն լոյսին տակ:

Պէյրութի օդակայան հասնելէ ետք Հարիրիի առաջին կայանը եղաւ իր հօր` նախկին վարչապետ Ռաֆիք Հարիրիի դամբարանը, որմէ ետք ան այցելեց նաեւ կեդրոնական Պէյրութի մէջ հանգչող այլ նահատակ անձնաւորութիւններու շիրիմները, նախքան իր մեկնումը  կեդրոնական Պէյրութի իր բնակարանը:

Նշենք, որ անկախութեան ոգեկոչման առիթով ներքին գործոց նախարար Նուհատ Մաշնուք ծաղկեպսակ զետեղեց նահատակ Ռաֆիք Հարիրիի շիրիմին:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS