Ռուսիան, Իրանը եւ Թուրքիան Սուրիոյ Հարցով Համաձայնութիւններու Եկած են

syria

Սոչիի մէջ սպասուող Ռուսիոյ, Թուրքիոյ եւ Իրանի նախագահներուն` Սուրիոյ հարցով գագաթաժողովէն առաջ հանդիպած են երեք երկիրներու ԶՈւ գլխաւոր շտաբերու պետերը:

Վկայակոչելով թրքական «Gazeteduvar.com» լրատուական կայքը՝ Ermenihaber.am-ը կը նշէ, թէ Ռուսիոյ պաշտպանութեան նախարարութեան տարածած յայտարարութեան մէջ նշուած է, որ հանդիպման ընթացքին համաձայնութիւն եղած է «իսլամական պետութիւն» եւ «ալ Նուսրա» ահաբեկչական կազմակերպութիւններու` Սուրիոյ մէջ մնացած վերջին խումբերու ոչնչացման վերաբերեալ: Կը նշուի, որ այդ ուղղութեամբ մշակուած է յստակ գործողութիւններու ծրագիր: Կողմերը համաձայնած են նաեւ բարձրացնելու Սուրիոյ Իտլիպ նահանգին մէջ իրականացուող գործողութիւններուն համակարգումը:

Ռուսիոյ ԶՈւ ԳՇ պետ Վալերի Գերասիմովը յայտարարած է, որ Սուրիոյ մէջ ռազմական գործողութիւններու աշխոյժ փուլը կ՝աւարտի: Գերասիմովը, դիմելով Թուրքիոյ եւ Իրանի պաշտօնակիցներ Հուլուսի Աքարին եւ Մուհամմէտ Պաքըրիին, ըսած է. «Միասնական ջանքերով Սուրիոյ մէջ շատ բան կրցանք ընել: Անոնցմէ ամենակարեւորը այն է, որ պահպանուեցաւ Սուրիոյ ինքնիշխանութիւնն ու տարածքային ամբողջականութիւնը, ներքին պատերազմը հնարաւոր եղաւ դադրեցնել եւ փախստականներու վերադարձի համար անհրաժեշտ պայմաններ ստեղծուեցան»:

Բարձրաստիճան զինուորականներուն հանդիպման ընթածքին, վաղը` Նոյեմբեր 22-ին, պիտի յաջորդէ երեք երկիրներու ղեկավարներուն հանդիպումը:

 

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS