Սուրիոյ Խորհրդարանի Նախագահը Ընդունեց Հայ-սուրիական Գործարար Խորհուրդի Անդամները

23621304_1270467423055281_737212732476525974_n

Նոյեմբեր 16 -ին, Սուրիոյ խորհրդարանի նախագահ Համմուտա Սապպաղ հանդիպում ունեցաւ հայ-սուրիական Գործարար Խորհուրդի նախագահ Լեւոն Զեքի Ետալեանի, փոխնախագահ Շահէ Եագուպեանի, գանձապահ Պատրիկ Այտընեանի հետ՝ քննարկելու Հայաստան-Սուրիա տնտեսական յարաբերութիւններու զարգացման կարելիութիւնները, կը հաղորդէ «Գանձասար»-ը։

Սապպաղ շեշտեց բարեկամ երկու երկիրներու տնտեսական գործակցութեան կարեւորութիւնը, նկատի առած յատկապէս Հայաստան-Սուրիա պատմական սերտ յարաբերութիւնները՝ դիտել տալով, որ հայ համայնքը Սուրիոյ բնակչութեան հիմնական բաղադրիչներէն մէկը կը հանդիսանայ, իսկ Հայաստան Սուրիոյ դէմ մղուած ահաբեկչական, հաւատադրժողական պատերազմի օրերուն կարեւոր կեցուածք դրսեւորած է։

Իր կարգին, Սուրիոյ խորհրդարանի անդամ, Սուրիա-Հայաստան Խորհրդարանական Բարեկամութեան Միութեան նախագահ դոկտ. Նորա Արիսեան յայտնեց, որ Սուրիոյ խորհրդարանը կը ձգտի հայ-սուրիական Գործարար Խորհուրդին ճամբով զարգացնել ու ամրապնդել Հայաստան-Սուրիա տնտեսական յարաբերութիւնները, յատկապէս նկատի ունենալով, որ Հայաստան պիտի մասնակցի Սուրիոյ վերականգնումի աշխատանքներուն։

Գործարար Խորհուրդի նախագահ Լեւոն Զեքի Ետալեան ներկայացուց խորհուրդի աշխատանքային ծրագիրը՝ հաւաստիացնելով, որ ամէն ջանք ի գործ պիտի դնէ նոր որակով օժտելու երկու երկիրներուն տնտեսական յարաբերութիւնները՝ աւելցնելով, որ մօտօրէն, Հայաստանի մէջ սուրիական արտադրութիւններու մնայուն ցուցահանդէսին բացումը պիտի կատարուի, իսկ հետագայ օրերուն այդ ցուցահանդէսը պիտի վերածուի առեւտրական կեդրոնի։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS