Հայկական Գերեզմանոցին Վրայ Կառուցուած Զուգարանները Պիտի Կազմաքանդուին․ Թուրք Նախարար

ardamedԹուրքիոյ մշակոյթի եւ զբօսաշրջութեան նախարար Նուման Քուրթուլմուշ յայտարարած է, որ Վանի մէջ, հայկական գերեզմանոցի վրայ կառուցուած զուգարանը պիտի կազմաքանդուի, կը հաղորդէ «Էրմէնիհապեր»-ը՝ վկայակոչելով՝  թրքական «Haber.sol» լրատուական կայքին:

«Կայ համապատասխան որոշում, որ 60 օրուան ընթացքին այդ կառոյցները պէտք է քանդուին: Մենք այս հարցով հետեւողական պիտի ըլլանք»,-ըսած է Քուրթուլմուշ:

Նշենք, որ Վանի  Արտամետի (Էտրեմիթ) քաղաքապետարանի հոգաբարձուի յանձնարարութեամբ հասարակական լողափի հարեւանութեամբ գտնուող պատմական բլուրի եւ հայկական գերեզմանոցի վրայ զուգարան եւ հանդերձարաններ կառուցուած են:

Նշուած տարածքին նախապէս հայկական թաղամաս եղած է, որ յայտնի է որպէս հանրայայտ հայ նկարիչ Արշիլ Կորքիի ծննդավայր: Թաղամասի հարեւանութեամբ գտնուող հայկական գերեզմանատունը այսօր անարգուած է, կատարուած կառուցապատումներու պատճառով բազմաթիւ մարդկային ոսկորներ դուրս եկած են հողէն եւ հոս ու հոն ինկած: Գերեզմանոցն ու բլուրը չեն խուսափած նաեւ գանձախոյզներու ուշադրութենէն. վերջիններս անխնայ փորփրած ու աւերած են տեղանքը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS