Ռոն Թորոսեանը Վարձած են, որ PR Ընէ Թուրքիոյ Համար. Արդեօք Ան Իսկապէ՞ս Հայ է

Harout-Sassounian

«Քալիֆորնիա Քուրիըր» (www.TheCaliforniaCourier.com) թերթի հրատարակիչ եւ խմբագիր Յարութ Սասունեան

Medium.com կայքին մէջ տեղադրուած Լուիզա Նոյի երկու յօդուածները կը բացայայտեն, որ Ռոն Թորոսեանը պայմանագիր կնքած է, որպէսզի ներկայացնէ Թուրքիան՝ իբրեւ անոր PR գործակալ: Թորոսեանը Նիւ Եորքի 5W հանրային կապերու ընկերութեան նախագահն է:

Արդարադատութեան նախարարութեան արձանագրութիւնները ցոյց կու տան, որ Թորոսեանը պայմանագիրը կնքած է 2017 Մայիս 25-ին: Անոր ընկերութիւնը պիտի ստանայ լրացուցիչ 60 հազար տոլար 2017 Մայիս 16-Նոյեմբեր 16 ինկած ժամանակահատուածին համար, որ ինքնաշխատ կերպով պիտի թարմացուի յաջորդ վեց ամսուան համար: Այս վճարումը պիտի աւելցուի այն գումարին, որ նշուած է 2016 Օգոստոս 10-ին կնքուած պայմանագիրին մէջ:

Յատկանշական է, որ Թորոսեանը Թուրքիոյ հետ պայմանագիր կնքած է ինը օր անց այն դէպքերէն, երբ նախագահ Էրտողանը կը դիտէր, թէ ինչպէս իր թիկնապահները կը ծեծեն խումբ մը ցուցարարներ՝ Ուաշինկթընի մէջ Թուրքիոյ դեսպանի նստավայրին դիմաց: Ցուցարարներու ծեծէն երեք օր անց՝ Թորոսեանը յօդուած հրապարակած է «Ալգեմայնըր»-ի մէջ`«Արտաքսեցէք արմատական իսլամիստ քարոզիչը (Գիւլենը) եւ պաշտպանեցէք ամերիկեան շահերը» վերնագիրով:

Հետաքրքրական է, որ Լուիզա Նոյը բացայայտած էր, որ 2017 Փետրուար 17-ին, Թորոսեանը, այլ յօդուած մը գրած էր «Նիւզմաքս»-ի մէջ ` քննադատելով Մայքլ Ֆլինի հրաժարականին վերաբերեալ լրատուամիջոցներուն լուսաբանումը: Զաւեշտալի է, որ Թորոսեանը, «Նիւզմաքս»-ի մէջ 2015 Մայիս 20-ին հրապարակուած իր նախկին յօդուածին մէջ, քննադատելով Levick Communications PR ընկերութեան աշխատանքը Քաթարի դեսպանատան համար, յայտարարած էր. «Կան մարդիկ, որոնք բնական կը համարեն PR ընել բռնակալներու եւ ահաբեկիչներու համար: Այնուամենայնիւ, տողերուս հեղինակը (Թորոսեան) համամիտ է աշխարհի խոշորագոյն PR ընկերութեան սեփականատէր Ռիչըրտ Էտըլմանի հետ, որ կ՝ըսէ. «PR-ը նման չէ օրէնքին` բոլորը չէ, որ արժանի են ներկայացման»: Հակասելով ինքն իրեն` Թորոսեանը զբաղած է Թուրքիոյ բռնապետ Էրտողանի շահերը պաշտպանելու երկերեսանի գործողութեամբ…

Թորոսեանը, նաեւ, 2017 Յունուար 27-ին գրած է Observer-ի մէջ, որուն հրատարակիչը նախագահ Թրամփի փեսան է` Ճարէտ Քուշները, քննադատելով այն PR ընկերութիւնները, որոնք «կ՝արդարացնեն ճնշող վարչակարգերը»: Ան եզրակացուցած է`  «բռնակալները եւ ահաբեկիչները արժանի չեն PR աջակցութեան»:

Ես երկու անգամ հեռաձայնեցի Թորոսեանի գրասենեակ, եւ ամէն անգամ աշխատակիցը վստահեցուց ինծի, որ ան պիտի պատասխանէ հեռաձայնիս: Իսկ պատասխան այդպէս ալ չեղաւ: Լուիզա Նոյը նոյն ճակատագիրին արժանացած էր, երբ փորձած էր կապուիլ Թորոսեանի հետ: Երբ ան Twitter-ի մէջ Թորոսեանին գրած էր Թուրքիոյ եւ Թրամփի հետ ունեցած կապերուն մասին, ան պատասխանած էր` «Ես սպաննած եմ Քէնետի… Նախկին կինս ռուս է… Ես նոյնիսկ ձկնկիթ կերած եմ այս շաբաթ…»: Թորոսեանը ո՛չ միայն անկիրթ է հեռախօսային հաղորդագրութիւններուն պատասխանելու ընթացքին, այլեւ, ըստ տեղեկութիւններու, վատ կը վերաբերիր իր աշխատակիցներուն եւ ուրիշներուն: «Նիւ Եորք թայմզ»-ը զինք կը նկարագրէ իբրեւ «Անզուսպ եւ բացայայտ յարձակող»: Նաեւ, ըստ Լուիզա Նոյի հաղորդման` ան գործարար կապեր ունի ստուերի մէջ գործող հրէայ եւ ռուս մեծահարուստներու հետ: Թէեւ Թորոսեանը հայկական ազգանուն ունի, սակայն, ես չեմ կրնար հաստատել, որ անոր ծնողներէն մէկը կամ երկուքը հայ են, կամ ոեւէ մէկը հայ է…

Ռոն Թորոսեանը, ըստ անոր «Լինգետին»-ի, նաեւ «JetSmarter-ի գործընկեր է, շուկայագիտութեան գծով պատասխանատու եւ խորհուրդի անդամ»: JetSmarter-ը վիճահարոյց ընկերութիւն է, կը ներկայացուի իբրեւ «uber օդանաւերու համար»: JetSmarter-ի գործադիր տնօրէնը Սերգէյ Պետրոսովն է` Վաչագան Պետրոսովի որդին, որ հաստատ հայկական անուն ունի:

Հիմնական պատճառը, որ ես հետաքրքրուեցայ Ռոն Թորոսեանի Թուրքիոյ համար իբրեւ PR գործակալ աշխատելուն համար՝ այն էր, որ նման իրավիճակի մէջ յայտնուած էր նաեւ Պարրի Զորթեանը, որ 1980 Հոկտեմբերէն մինչեւ 1984 Փետրուար աշխատած էր Թուրքիոյ կողմէ վարձուած Gray&Co լոպպիստական ընկերութեան մէջ: Զորթեանը «Ամերիկայի ձայն»-ի եւ «Թայմզ»-ի նախկին բարձրաստիճան պաշտօնեան էր: 1968-69 ան ԱՄՆ գլխաւոր ներկայացուցիչն էր Սայկոնի մէջ, Վիեթնամ:

Երբ իմացայ, որ Զորթեանը միաժամանակ բարձրաստիճան պաշտօնեայ էր Թուրքիոյ համար լոպպիստական ընկերութեան մէջ, եւ վարչութեան անդամ Ամերիկայի հայկական համագումարին մէջ, հառաձայնեցի անոր եւ հարցուցի, թէ արդեօք իր երկակի դերը շահերու բախում չի՞ յառաջացներ իր կամ իր ընկերութեան համար: Իբրեւ հայի հանդէպ յարգանքի նշան, ես նախազգուշացուցի անոր, որ եթէ պատասխանէ իմ հարցերուն, ատիկա կրնայ յանգեցնել աշխատանքէն հեռացուելուն: 63-ամեայ Զորթեանը պատասխանեց, որ իրեն չի մտահոգեր, որ պիտի կորսնցնէ իր 65 հազար տոլար տարեկան եկամուտով աշխատանքը իբրեւ Gray&Co ընկերութեան աւագ փոխնախագահ: Ան անկեղծօրէն պատասխանեց իմ բոլոր հարցերուն: Զորթեանը բացատրեց, որ ան կ՝աշխատէր հանրային կապերու գրասենեակին մէջ եւ ո՛չ թէ Թուրքիոյ հաշուին, որմով զբաղած էր ընկերութեան լոպպիստական ​​բաժինը:

1984 Յունուար 19-ին, «Քալիֆորնիա Քուրիըր» թերթի առաջին էջին վրայ յօդուածիս  հրապարակումէն անմիջապէս ետք, թրքական «Թերճուման» թերթը յայտնեց Զորթեանի հետ հարցազրոյցիս մասին, որ մեծ իրարանցում առաջացուց Թուրքիոյ արտաքին գործոց նախարարութեան մէջ, բացայայտելով, որ ամերիկահայ մը եղած է այն լոպպիստական ​​ընկերութեան գործադիր տնօրէնը, որ տարեկան 300 հազար տոլար կը ստանար Թուրքիայէն:

1984 Փետրուար 21-ին, լոպպիստական ​​ընկերութեան փոխնախագահ Ալեխանտրօ Օրֆիլան Զորթեանին ըսած էր, որ Թուրքիոյ դեսպան Շուքրու Էլեքտաքը խիստ բարկացած է՝ կարդալով թերթին մէջ տպագրուած յօդուածը: Օրֆիլան մէջբերած է դեսպան Էլեքտաքի խօսքերը. «Տղաներ, ես ձեզ վարձած էի, որ օգնէիք ինծի քաղաքական խնդիրներուս համար, իսկ դուք, ատոր փոխարէն, ինծի համար խնդիրներ կը ստեղծէք… Դուք պէտք է լուրջ քայլերու դիմէք, որ ես կարենամ զեկուցել իմ կառավարութեան, թէ ոչ ստիպուած պիտի ըլլամ կասեցնել պայմանագիրը»:

PR ընկերութեան նախագահ Ռոպըրթ Կրէյը, ընդհատեց իր արձակուրդը Ագափուլգոյի մէջ (Մեքսիքօ) եւ անմիջապէս վերադարձաւ Ուաշինկթըն: Զորթեանը հեռացուեցաւ աշխատանքէն` հրաժարական տալու Կրէյի առաջարկը մերժելէն ետք:

Թէեւ ինծի համար այնքան ալ հաճելի չէր տեսնել, որ Զորթեանը կորսնցուցած է իր աշխատանքը, սակայն, միայն վեց ամսուան աշխատանքային փորձ ունեցող իբրեւ երիտասարդ լրագրող շատ գոհ էի, որ իմ անյայտ յօդուածը՝ վերնագիրներու պատճառ դարձած էր թրքական մամուլին մէջ եւ արժանացած Թուրքիոյ արտաքին գործոց նախարարութեան ու դեսպան Էլեքտաքի ուշադրութեան: Նաեւ, 1984 Ապրիլ 13-ին, «Ուաշինկթըն փոսթ»-ը գրեց ծաւալուն յօդուած մը, մէջբերելով յօդուածէս եւ նշելով իմ թերթը իբրեւ այս միջազգային բանավէճին աղբիւր:

Ես յորդորեցի Զորթեանին դատի տալու Gray&Co ընկերութիւնը` իր ազգային ծագման պատճառով աշխատանքային խտրականութեան մեղադրանքով: Զորթեանը հայց ներկայացուց Ուաշինկթընի մէջ Մարդու իրաւունքներու գրասենեակ, պնդելով, որ զինք հեռացուցած են աշխատանքէն՝ հայ ըլլալուն պատճառով:

Ցաւօք, չեմ գիտեր, թէ ինչպէս աւարտեցաւ Զորթեանի դատական գործը: Անկէ ետք ան եւ իր կինը մահացած էին:

Եթէ Թորոսեանը իրօք հայ է, ուստի ան ինչպէ՞ս կրնար PR ընել Թուրքիոյ համար: Սակայն, աւելի կարեւոր է, թէ ինչպէ՞ս կրնար Թուրքիան վարձել զինք` հաշուի առնելով Զորթեանի փորձը:

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS