Մոլտովան Հետաքրքրուած է ԵԱՏՄ-ի Մէջ Հայաստանի Աշխատանքի Փորձով. Կայացած է Սարգսեան-Տոտոն Առանձնազրոյցը

27100_bՆախագահ Սերժ Սարգսեանի հրաւէրով պաշտօնական այցով այսօր տիկնոջ հետ Հայաստանի Հանրապետութիւն ժամանած է Մոլտովայի Հանրապետութեան նախագահ Իկոր Տոտոն:

27103_b
Հանրապետութեան նախագահի նստավայրին մէջ նախագահ Սերժ Սարգսեանն ու տիկին Ռիտա Սարգսեանը  դիմաւորած են նախագահ Իկոր Տոտոնը եւ տիկին Կալինա Տոտոնը: Դիմաւորման պաշտօնական արարողութենէն ետք կայացած է նախագահներ Սերժ Սարգսեանի եւ Իկոր Տոտոնի առանձնազրոյցը:

27081_b

Ողջունելով գործընկերը Հայաստանի մէջ` Սարգսեան նշած է, որ Մոլտովայի նախագահը ցանկալի հիւր է մեր երկրին մէջ եւ բարձր գնահատած է անոր պաշտօնական այցը, որ կը կայանայ Հայաստանի եւ Մոլտովայի միջեւ դիւանագիտական յարաբերութիւններու հաստատման 25-ամեակին:

«Ասիկա շատ լաւ առիթ է վերլուծելու այն աշխատանքը, որ մենք կատարած ենք այս 25 տարիներու ընթացքին եւ նախանշելու հեռանկարները: Մեր ժողովուրդներու միջեւ կապերը գոյութիւն ունին ոչ մէկ հարիւրամեակ, այդ պատճառով ալ մեր միջպետական յարաբերութիւնները կառուցուած են շատ ամուր հիմքի վրայ: Ես ուղղակի վստահ եմ, որ Ձեր այցը շատ լաւ խթան պիտի հանդիսանայ մեր յարաբերութիւններու աշխուժացման: Մենք ատով շահագրգռուած ենք: Մենք շահագրգռուած ենք բոլոր ոլորտներու` քաղաքական, տնտեսական, մարդասիրական, սերտ համագործակցութեան մէջ: Փոխգործակցութեան որեւէ սահմանափակում չունենք ինչպէս երկկողմ, այնպէս ալ բազմակողմ ձեւաչափերու մէջ: Բարով եկած էք: Սա Ձեր առաջին պաշտօնական այցն է, եւ յուսով եմ, որ նման այցեր կ՛ըլլան ամէն տարի»,-ըսած է Սերժ Սարգսեան:

Նախագահ Տոտոն շնորհակալութիւն յայտնած է Սերժ Սարգսեանին հրաւէրին համար եւ իր պաշտօնական այցը համարած պատմական` նկատի առնելով, որ երկու երկիրներու միջեւ դիւանագիտական յարաբերութիւններու հաստատումէն անցած 25 տարիներու ընթացքին սա Մոլտովայի Հանրապետութեան նախագահի առաջին այցն է Հայաստան:

«Այս ընթացքին չէ եղած ո՛չ աշխատանքային, ո՛չ պաշտօնական այց, այդ իսկ պատճառով, հաշուի առնելով մեր պատմական ընդհանուր կապերը, ընդհանուր շահերը եւ՛ ԱՊՀ շրջանակներու մէջ, եւ՛ ԱՊՀ տարածքին նոր համարկումի նախագիծերուն, ես որոշած եմ գալ: Այս այցին մենք, անկասկած, մեծ ուշադրութիւն կը յատկացնենք: Այո՛, 25 տարիներու ընթացքին մենք շատ համաձայնագիրներ ստորագրած ենք: Ունինք տասնհինգ համաձայնագիր, եւս եօթը այժմ կը պատրաստուի: Մենք խօսելու բան ունինք, կան որոշակի արդիւնքներ, կան, ի հարկէ, հեռանկարներ: Մեզի կը հետաքրքրէ, եւ ես յոյս ունիմ շատ մանրակրկիտ Ձեզ հետ քննարկել ձեր աշխատանքի փորձը ԵԱՏՄ ծիրէն ներս: Գիտեմ, որ մօտակայ ժամանակներս կը ծրագրէք ստորագրել Եւրոպական Միութեան հետ համագործակցութեան մասին համաձայնագիր: Կը կարծեմ, որ այնպիսի երկիրները, ինչպիսիք են` Մոլտովան եւ Հայաստանը, դատապարտուած են լաւ յարաբերութիւններ ունենալու բոլորին հետ` ե՛ւ Արեւմուտքի, ե՛ւ Արեւելքի: Մեզի համար արդիական է  ձեր փորձը` ե՛ւ ԵԱՏՄ-իո մէջ գտնուելու, ե՛ւ Եւրոմիութեան հետ համաձայնագրի:

«Դուք գիտէք, որ Մոլտովայի մէջ հայկական համայնք կայ, որու հետ մենք լաւ կը համագործակցինք, որ Մոլտովայի մէջ կ՛ապրի ոչ մէկ տասնամեակ եւ իրեն արդէն կը զգայ ինչպէս իր տան մէջ:

«Ես կը ցանկամ Ձեզ շնորհակալութիւն յայտնել, որ առաջին անգամ շատ լուրջ քայլ կատարուած է երկկողմ յարաբերութիւնները խորացնելու համար` նկատի ունիմ Հայաստանի դեսպանութեան բացումը Քիշնեւի մէջ անցած տարուան վերջին: Եւ այս տարի մենք շատ աշխոյժ սկսանք համագործակցիլ դեսպանին հետ: Այս ամէնը ցոյց կու տայ, որ մենք դուրս կու գանք մեր երկկողմ յարաբերութիւններու նոր մակարդակի»,- ըսած է Մոլտովայի նախագահ Իկոր Տոտոն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS