Ուրախ Եմ Տեղեկացնելու, Որ Ատրպէյճանցի Պաշտօնեաները Կը Կարդան Իմ Յօդուածները Եւ Կը Հետեւին Իմ Խորհուրդներուն

harut-sassounian  «Քալիֆորնիա քուրիըր» թերթի հրատարակիչ եւ խմբագիր Յարութ Սասունեան

 Դեռ 2013-ի Օգոստոսին ես յօդուած մը գրած էի` «Արցախ այցելողներու Պաքուի սեւ ցուցակը օգտակար է Հայաստանին, վնասակար` Ատրպէյճանին» վերնագիրով, լուսաբանելով ատրպէյճանցի պաշտօնեաներու տխմարութիւնը` սեւ ցուցակի մէջ ընդգրկելու համար մարդոց, որոնք առանց Ատրպէյճանի թոյլտուութեան կ՛այցելեն Արցախ: Ես ընդգծած էի, որ աշխարհի տարբեր երկիրներէ Արցախ այցելողները սեւ ցուցակի մէջ ներառելը, առաջին հերթին վնաս կը հասցնէ Ատրպէյճանի շահերուն, քանի որ սեւ ցուցակը կը մեկուսացնէ Ատրպէյճանը մնացած աշխարհէն… Փաստօրէն, որքան սեւ ցուցակի մէջ շատ է թիւը մարդոց, որոնցմէ շատերը յայտնի անձիք եւ բարձրաստիճան պաշտօնեաներ են, այնքան Ատրպէյճանը ինքզինք աւելի շատ կը զրկէ նման կարեւոր այցելուներէ:

2013-ի իմ յօդուածին մէջ, քանի մը յայտնի անձերու անուններ մէջբերելէ ետք, որոնք ծաղրած էին Ատրպէյճանի կողմէ սեւ ցուցակի մէջ ընդգրկուելու փաստը, ես առաջարկեցի, որ իմ անունը եւս աւելցնեն սեւ ցուցակի մէջ, քանի որ ես նոյնպէս գացած էի Արցախ ու յօդուած գրած այդ այցին վերաբերեալ: Զարմանալիօրէն, իմ առաջարկէն կարճ ժամանակ անց, Ատրպէյճանի կառավարութիւնը իմ անունը աւելցուց սեւ ցուցակի մէջ` «Յարութ Սասունեան, հայազգի, սուրիացի-ամերիկացի լրագրող»: Ատկէ ետք, ես դարձեալ այցելեցի Արցախ…

 Պէտք է աւելցնեմ, որ տարիներ առաջ, երբ հայր Ալիեւը Ատրպէյճանի նախագահն էր, միջնորդներու միջոցով ան զիս հրաւիրալ էր Պաքու` հանդիպելու իր հետ եւ քննարկելու Լեռնային Ղարաբաղի հակամարտութիւնը: Ես, ի հարկէ, մերժեցի անոր հրաւէրը: Ես նոյնիսկ հրաժարեցայ նախագահ Հէյտար Ալիեւի առաջարկէն հանդիպելու անոր հետ որեւէ երրորդ երկրի մէջ, օրինակ Մեծ Բրիտանիոյ, եթէ չեմ ցանկար Ատրպէյճան երթալ: Ես մերժեցի նաեւ այդ առաջարկը: Այնպէս որ, հիմա, երբ յայտնուած եմ սեւ ցուցակի մէջ, Ատրպէյճանի արտաքին գործոց նախարարութիւնը իր նախագահը զրկած է զիս Պաքու հրաւիրելու հնարաւորութենէն…

 Ատրպէյճանի սեւ ցուցակին մէջ աւելի քան 700 անուն կայ, ներառեալ խորհրդարանի անդամներ, գործարարներ, լրագրողներ, դերասաններ, ընտրուած պաշտօնեաներ եւ այլ յայտնի անձիք: Արցախի վերջին այցելուն, որ կը յայտնուի սեւ ցուցակին մէջ` Էնթընի Պուրտէյն է, որ CNN հեռուստաընկերութեան աշխարհահռչակ խոհարարական հաղորդաշարի հաղորդավարն է: Անցեալ շաբաթ ան մեկնեցաւ Հայաստանի Հանրապետութիւն եւ Արցախ` այդ երկու երկիրներուն մէջ հայկական խոհանոցի վերաբերեալ հեռուստածրագիրներ պատրաստելու նպատակով, եւ Ատրպէյճան զայն անմիջապէս «փերսոնա նոն կրատա» (անցանկալի անձ) յայտարարեց…

Պուրտէյնի անունը աւելցած է սեւ ցուցակին մէջ` «Ատրպէյճանի տարածքային ամբողջականութեան եւ ինքնիշխանութեան հանդէպ իր անյարգալից վերաբերմունքին համար», յայտնած է Ատրպէյճանի ԱԳՆ մամուլի քարտուղար Հիքմեթ Հաճիեւ «Ֆրանս փրես» գործակալութեան: «Ատրպէյճանի գրաւեալ տարածքներուն մէջ խոհարարական ծրագիր նկարահանելը վիրաւորանք է մէկ միլիոն ատրպէյճանցի փախստականներու հանդէպ, որոնց բռնի տեղահանած են իրենց տուներէն», աւելցուցած է Հաճիեւ: Անիմաստ խօսքեր են: Միակ բանը, որուն ատրպէյճանցի պաշտօնեաները հասան` Պուրտէյյնի այցի կանխումն էր Ատրպէյճան եւ ատրպէյճանական խոհանոցի մասին CNN ծրագրի կազմակերպումը, որ մեծ գովազդ պիտի ըլլար երկրին համար:

 Ատրպէյճանի սեւ ցուցակը ունի շարք մը թերութիւններ.

 1) Մինչեւ այսօր ընդամէնը 700 անուն ներառուած է սեւ ցուցակի մէջ, մինչդեռ տարիներ շարունակ աշխարհի տարբեր երկիրներէ հարիւր հազարաւոր  զբօսաշրջիկներ այցելած են Արցախ: Թէեւ Արցախի բոլոր այցելուներուն անունները հանրութեան յայտնի չեն, սակայն, ի հարկէ, անոնք 700-էն  աւելի են: Կը պարզուի` Ատրպէյճանի արտաքին գործոց նախարարութեան մէջ ինչ-որ մէկը քնացած է իր աշխատավայրին մէջ:

 2) Ինչո՞ւ սեւ ցուցակի մէջ ընդգրկուած 700 անուններուն մէջ չկայ Հայաստանի Հանրապետութեան նոյնիսկ մէկ քաղաքացի: Թէեւ Ատրպէյճանի պաշտօնեաներուն յայտնի չեն Հայաստանէն սովորական այցելուներու անունները, անոնք, անշուշտ, գիտեն, որ Հայաստանի Հանրապետութեան նախագահը, վարչապետը եւ այլ բարձրաստիճան պաշտօնեաներ յաճախակի կ՛այցելեն Արցախ եւ անոնց այցերը հրապարակային են: Հնարաւո՞ր է արդեօք, որ Ատրպէյճան Արցախ այցելող Հայաստանի քաղաքացիները չի համարեր օտարերկրացիներ: Ատրպէյճանի ԱԳՆ-ի կայքէջը կը խոստովանի, որ «Լեռնային Ղարաբաղը ժամանակաւորապէս դուրս մնացած է Ատրպէյճանի Հանրապետութեան վերահսկողութենէն»: Հնարաւո՞ր է, որ Ատրպէյճան այժմ Արցախը կը համարէ մշտապէս «Ատրպէյճանի Հանրապետութեան վերահսկողութենէ դուրս մնացած»:

 3) Սեւ ցուցակի մէջ ընդգրկուածներէն շատ քիչերը դժգոհած են, որ իրենք չեն կրնար այցելել Ատրպէյճան: Ընդհակառակը, անոնցմէ շատերը կը հպարտանան, որ իրենց անունները յայտնուած են Ատրպէյճանի սեւ ցուցակին մէջ: Նոյնիսկ աւելի ապշեցուցիչ է, երբ որոշ մարդիկ, Արցախ այցելելէ ետք իրենց անունները չգտնելով սեւ ցուցակի մէջ, խնդրած են, որ զիրենք աւելացնեն սեւ ցուցակի մէջ, քանի որ անոնք մեծ պատիւ կը համարեն այդ ցուցակին մէջ ըլլալը:

 Վերջին ամիսներուն Ատրպէյճան, իրավիճակը աւելի սրելով, պահանջած է այլ երկիրներէ` իրենց քաղաքացիները Արցախ այցելելու համար արտայանձնել Պաքուին: Մէկ պարագայի, Պելառուսի լրագրող մը անամօթաբար կալանաւորեցին եւ ուղարկեցին Ատրպէյճան, ուր անոր քանի մը ամիս բանտարկեցին: Ան վերջապէս ազատ արձակուեցաւ` Ատրպէյճանի վրայ միջազգային ճնշումներէ եւ Եւրոխորհուրդի կողմէ դատապարտումէն ետք:

 Ասիկա իշխանութեան չարաշահում է, ատրպէյճանական ճնշումներու արտահանում եւ ահաբեկում երրորդ երկիրներու նկատմամբ, որոնք պէտք է ամչնան ատրպէյճանական բռնապետական վարչակարգի հետ համագործակցելու համար:

 Թարգմանութիւնը` Ռուզաննա Աւագեանի

Արեւմտահայերէնի վերածեց՝ ԵՌԱԳՈՅՆ կայքը

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS