Աւետարանչականներու Յայտարարութիւնը Հայաստանի Հանրապետութեան 100-ամեակի Առիթով

evangelicalԵտեւի շարք, ձախէն աջ՝ վեր. Մկրտիչ Մելքոնեան, վեր. Յովէլ Միքայէլեան, վեր. Մկրտիչ Գարակէօզեան, վեր. Ժիլպեր Լեւոնեան, վեր. Յարութիւն Սելիմեան եւ վեր. դոկտ. Ռընէ Լեւոնեան

Նստած, ձախէն աջ՝ դոկտ. Նազարէթ Տարագճեան, վեր. Պերճ Ճամպազեան, վեր. դոկտ. Վահան Թութիկեան եւ Զաւէն Խանճեան

Նկարէն կը բացակային՝ Ճոյս Սթայն, վեր. դոկտ. Արա Չագըրեան եւ դոկտ. Նուրհան Հելվասեան

ՎԵՐ. ԴՈԿՏ. ՎԱՀԱՆ Յ. ԹՈՒԹԻԿԵԱՆ*

1101amaaweblogo100Հայ Աւետարանական Համաշխարհային խորհուրդի (ՀԱՀԽ) գործադիր յանձնախումբը իր տարեկան ժողովը գումարեց Ամերիկայի Հայ Աւետարանչական ընկերակցութեան կեդրոնատեղիին մէջ, Փըրամըս, Նիւ Ճըրզի, Հոկտեմբեր 19-20, 2017-ին:

Գրաւոր եւ բանաւոր տեղեկագրութիւններ տրուեցան խորհուրդի նախագահին, գործադիր տնօրէնին եւ գանձապահին կողմէ, որմէ ետք խորհուրդի հինգ եկեղեցական միութիւններու եւ Աւետարանչականի ներկայացուցիչները անջատաբար տեղեկագրեցին իրենց միութիւններուն մասին:

Օրակարգի վրայ գտնուող կարգ մը նիւթերու մասին խորհրդակցութիւններէ ետք, Գործադիր յանձնախումբը տուաւ հետեւեալ որոշումները.

  1. Գումարել համահայկական աւետարանական երիտասարդաց համագումար մը Հայաստանի մէջ, Օգոստոս 4-14, 2018 թուականին՝ Ամերիկայի Հայ Աւետարանչական ընկերակցութեան հարիւրամեայ տարեդարձի տօնակատարութեանց առթիւ:
  2. Ընտրել յանձնաժողով մը՝ ՀԱՀԽ-ի կանոնագիրը վերատեսութեան ենթարկելու առաջադրութեամբ:
  3. Մասնակցիլ ճաշկերոյթ ընդունելութեան մը ի պատիւ Գարեգին Բ. Ամենայն Հայոց կաթողիկոսի, կազմակերպութեամբ Հայց. Առաքելական եկեղեցւոյ Արեւմտեան թեմին եւ գործակցութեամբ Ամերիկայի Հայ Աւետարանչական ընկերակցութեան. ընդունելութիւնը տեղի պիտի ունենայ Նոյեմբեր 2, 2017-ին, առաջնորդարանի կեդրոնատեղին:
  4. Մասնակցիլ Հայաստանի Հանրապետութեան եւ Ամերիկայի Հայ Աւետարանչական ընկերակցութեան հարիւրամեայ յոբելինական տօնակատարութեանց, 2018 տարեշրջանի ընթացքին: Այս առնչութեամբ, գործադիր յանձնախումբը ըրաւ հետեւեալ յայտարարութիւնները.

ՅԱՅՏԱՐԱՐՈՒԹԻՒՆ՝ ՀԱՅԱՍՏԱՆԻ ՀԱՆՐԱՊԵՏՈԻԹԵԱՆ ՀԱՐԻՒՐԱՄԵԱԿԻ ԱՌԻԹՈՎ

Մայիս 28, 1918-ին հայ ժողովուրդը վերստին տիրացաւ իր անկախութեան՝ իբրեւ ինքնիշխան պետութիւն, զոր կորսնցուցած էր 1375 թուականին: Այսպէս, շուրջ վեց դարեր ետք, առաջին անգամ ըլլալով հայ ժողովուրդը կը հիմնէ Հայաստանի Հանրապետութիւնը՝ տէր դառնալով իր անհատական եւ հաւաքական ճակատագիրին: Իբրեւ մասնիկ մը Պատմական Հայաստանի, այս փոքր հանրապետութիւնը հիմը դարձաւ արդի Հայաստանի պետութեան:

Մայիս 28, 2018-ն Հայաստանի անկախութեան հարիւրամեակն է: Այս պատմական նշանակալից առիթով, Հայ Աւետարանական Համաշխարհային խորհուրդը (ՀԱՀԽ) կ՛ողջունէ Հայաստանի Հանրապետութեան անկախութեան հարիւրամեակը եւ կը յայտարարէ՝

  1. Շարունակել իր հաստատակամ յանձնառութիւնը՝ ամրապնդելու Հայաստանի անկախ պետականութիւնը.
  2. Մատուցանել իր բարոյական, հոգեւոր եւ նիւթական աջակցութիւնը Հայաստանի Հանրապետութեան.
  3. Շարունակել իր աջակցութիւնը Արցախի Հանրապետութեան միջազգային ճանաչման աշխատանքին.
  4. Նշել Հայաստանի անկախութեան հարիւրամեակը հրապարակային տօնակատարութիւններով, ինչպէս նաեւ Կիրակի, Մայիս 28, 2018-ին Հայ Աւետարանական եկեղեցիներուն մէջ տեղի ունեցող առաւօտեան պաշտամունքներով.
  5. Ուղարկել պատուիրակութիւն մը ՀԱՀԽ-ի կողմէ դէպի Հայաստան, 2018-ի Մայիս ամսուան 28-ին՝ մասնակցելու համար Հայաստանի Հանրապետութեան հարիւրամեայ տարեդարձի տօնակատարութեանց:

ՅԱՅՏԱՐԱՐՈՒԹԻՒՆ՝ ԱՄԵՐԻԿԱՅԻ ՀԱՅ ԱՒԵՏԱՐԱՆՉԱԿԱՆ ԸՆԿԵՐԱԿՑՈԻԹԵԱՆ ՀԱՐԻՒՐԱՄԵԱԿԻ ԱՌԻԹՈՎ

Յառաջիկայ տարուան Յունիսին, Ամերիկայի Հայ Աւետարանչական ընկերակցութիւնը (Աւետարանչականը) պիտի նշէ իր 100-րդ տարեդարձը: Հարիւրամեայ տօնակատարութիւնները արդէն իսկ սկսած են հանգանակութեան արշաւներով, որոնք տեղի կ՛ունենան տարբեր վայրերու մէջ: Ծրագրուած է նաեւ 2018 տարեշրջանին զանազան տօնակատարութիւններ՝ Հայաստանի եւ Սփիւռքի մէջ:

Անտարակոյս, աստուածային նախախնամութեան ձեռքն էր, որ առաջնորդեց խումբ մը հայ աւետարանականներ հիմնելու Աւետարանչականը Վուսթըր քաղաքի Հայ Աւետարանական եկեղեցւոյ մէջ՝ Ամերիկայի արեւելեան նահանգներու Հայ Աւետարանական միութեան տարեկան համաժողովին ընթացքին, Յունիս 7-9, 1918-ին:

Շուրջ հարիւր տարիներէ ի վեր, Աւետարանչականը հայ ազգին ի սպաս դրած է իր հոգեւոր, կրթական, մշակութային եւ մարդասիրական ծառայութիւնները: Հազարաւոր մարդիկ, սերունդէ սերունդ օգտուած եւ օրհնուած են Աւետարանչականի ընձեռած բարերարութիւններէն: Ներկայիս, ան կը շարունակէ մնալ սփիւռքահայ ամէնէն աշխոյժ ու կենսունակ կազմակերպութիւններէն մին:

Հայ Աւետարանական Համաշխարհային խորհուրդը որոշած է տօնել Աւետարանչականի հարիւրամեայ յոբելեանը հետեւեալ առաջադրութեամբ.

  1. ԶԱստուած փառաբանել Աւետարանչականի հարիւր տարուան վկայութեան եւ ծառայութեան համար.
  2. Յանձնարարել աշխարհատարած բոլոր Հայ Աւետարանական եկեղեցիներուն, որ խորհրդակցաբար Աւետարանչականի Հարիւրամեակի կեդրոնական յանձնախումբին հետ տօնեն այս պատմական մղոնաքարը՝ հետեւեալ ձեւով.

– Կազմակերպել հարիւրամեակի տօնակատարութիւններ՝ համահայկական մակարդակի վրայ, կրօնական եւ մշակութային յայտագիրներով.

– Ոգեկոչել հարիւրամեակը Կիրակի, Յունիս 10, 2018-ին, առաւօտեան պաշտամունքի ընթացքին.

– Մասնակցիլ Աւետարանչականի հարիւրամեայ յոբելեանի հանգանակութեան արշաւին:

  1. Աղօթել առ Աստուած, որ Աւետարանչականը շարունակէ մատուցանել իր հոգեւոր, կրթական, ընկերային, մշակութային եւ մարդասիրական ծառայութիւնները հայ ազգին՝ աւելի՛ մեծ թափով ու տարողութեամբ։

*Վեր. Դոկտ. Վահան Յ. Թութիկեան Հայ Աւետարանական Համաշխարհային Խորհուրդի Գործադիր Տնօրէնն է։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS