Կիպրոսը, Հալէպը, Պաթումը, Էրպիլը, Սալոնիկը Պէտք է Մտնեն Թուրքիոյ Սահմաններուն Մէջ. Էրտողան

erdogan

Հոկտեմբեր 15-ին Թուրքիոյ նախագահ Ռեճեփ Թայիփ Էրտողան, ելոյթ ունենալով Ռիզէ քաղաքի (պատմական Տայքը) համալսարանին մէջ, ուղղակի բնագիրով յայտարարած է, որ թրքական պետութիւնը իրեն կը համարէ այն տարածքները, որոնք անմիջականօրէն տեղակայուած են Թուրքիոյ այսօրուան ոչ օրինական սահմաններու մերձակայքին, կը գրէ Վրաստանի հայ համայնքի կայքը:

«Մեր երկրի 79 միլիոն բնակիչներէն բացի` գոյութիւն ունին եւս միլիոնաւոր եղբայրներ, որոնք կ՛ապրին այլ աշխարհագրական շրջաններու մէջ, որոնց հետ մենք պատմական կապեր ունինք: Մեր հետաքրքրութիւններու բնագաւառին մէջ կը մտնեն Իրաքը, Սուրիան, Լիբանանը, Ղրիմը, Ղարաբաղը, Ատրպէյճանը, Պոսնիան եւ այլ եղբայրական շրջաններ: Երբ Թուրքիան կորսնցնէ իր անկախութիւնը եւ կորսնցնէ իր ապագան, այդ ժամանակ մենք կը կորսնցնենք հետաքրքրութիւնը այդ տարածքներու նկատմամբ: Շատ պատմաբաններ կը համարեն, որ Թուրքիոյ սահմաններուն մէջ պէտք կը մտնեն Կիպրոսը, Հալէպը, Մոսուլը, Էրպիլը, Քիրքուքը, Բաթումը, Սալոնիկը, Վարնան, Արեւմտեան Թրաքիան եւ Էգէյեան ծովու կղզիները», -Հոկտեմբեր 15-ին յայտարարած է թրքական պետութեան նախագահը:

Տուեալ յայտարարութիւնը յառաջացուցած է ինչպէս Յունաստանի, այնպէս էլ Յունաստանի վրացական համայնքի դժգոհութիւնը: Մինչդեռ, ըստ աղբիւրին, տուեալ դժգոհութիւնը Վրաստանի մէջ չեն կիսեր: Աւելին, թուրք նախագահին կատարած յայտարարութեան տարածումէն անմիջապէս ետք վրացական մամուլին մէջ սկսած է Թուրքիոյ շահերուն փաստաբանութեան, անոր արդարացման քարոզարշաւին»:

«Իր յայտարարութեան մէջ Թուրքիոյ նախագահը յիշատակած է «ազգային ուխտ»ի (Misak-ı Millî) մասին եւ անոր սահմաններուն մէջ մտնող տարածքները: Այդ ծիրին մէջ ան յիշատակած է նաեւ Պաթումը: Իր ելոյթի ընթացքին Էրտողան ոչինչ ըսած է Պաթումի մէջ հանրաքուէ իրականացնելու մասին: Ան յիշատակած է Վրաստանը եւ Պաթումը պատմական անցեալի պարունակին մէջ: Ան կը խօսէր նաեւ ընկերական երկիրներու մասին»,-գրած է վրացական «Ազատական-լիպերալ» հրատարակչութիւնը: Տուեալ յօդուածը վերահրատարակած է վրացական հրատարակչութիւններու մեծ մասը, եւ թրքական պահանջներու թեման «յայտարարուած է փակուած»:

Հայ համայնքի կայքը կը գրէ, որ հակառակ անոր, որ Էրտողան իր աղմկայարոյց յայտարարութիւնը ըրած է դեռ Հոկտեմբեր 15-ին, մինչեւ այսօր ոչ մէկ վրաց քաղաքական կամ պետական գործիչ չէ մեկնաբանած տուեալ յայտարարութիւնը: Կը լռէ նաեւ Վրաստանի արտաքին գործոց նախարարութիւնը:

«Բնականաբար, Էրտողանի յայտարարութեան պատճառով Վրաստանը պէտք չէ Թուրքիոյ պատերազմ յայտարարէ: Բայց, արտայայտէ իր դժգոհութիւնը, այնուամենայնիւ, արժէ: Հակառակ պարագային, թրքական կողմը, ոչ անհիմն, կրնայ համարել, որ ընկերական Կիւրճիստանը դէմ չէ թրքական ծրագրի իրագործման: Աւելին, կրնայ նոյնիսկ աջակցիլ անոր: Իսկ եթէ անկեղծ` տպաւորութիւն կը ստեղծուի, որ Վրաստանի մէջ թրքական շահերու «փաստաբանները» մեծ ոգեւորութեամբ կը պաշտպանեն Թուքիան նոյնիսկ այն պահուն, երբ Թիֆլիսի պետական հաստատութիւններուն վրայ ծածանի կարմիր դրօշը` լուսինով եւ աստղով»,- կը գրէ կայքը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS