Գանձասարի Մէջ Ի Յիշատակ Լեւոն Հայրապետեանի Հոգեհանգստեան Կարգ Կատարուած է

DH_8

Հոկտեմբեր 21-ին, Գանձասարի վանական համալիրին մէջ տեղի ունեցած է հոգեհանգիստի արարողութիւն` ի յիշատակ հայ մեծ բարերար Լեւոն Հայրապետեանի:

«Արցախփրես»-ի թղթակիցի հաղորդմամբ` հոգեհանգստեան արարողակարգին Արցախի թեմի առաջնորդ Պարգեւ արքեպիսկոպոս Մարտիրոսեան նշած է, որ Լ. Հայրապետեան բազում ծրագիրներ իրականացուցած է՝ շէնցնելու Արցախը, եւ անոր առաջին քայլերէն եղած է Գանձասարի վանական համալիրի վերանորոգումը:

«Այսօր մենք եկած ենք յարգելու հայրենասէր, ազգասէր արցախցիին յիշատակը, կիսելու կորստեան ցաւը»,- ըսած է Արցախի թեմի առաջնորդ Պարգեւ արքեպիսկոպոս Մարտիրոսեան:

Հոգեհանգստեան արարողակարգին ներկայ Արցախի կրթութեան, գիտութեան եւ մարմնակրթուեան նախարար Նարինէ Աղաբալեանը նշած է, որ փորձութեան ժամուն, երբ հայրենիքը վտանգուեցաւ, ան անմիջապէս կանգնեցաւ Արցախի կողքին: «Լ. Հայրապետեանը ոչ միայն պատերազմէն ետք սկսաւ վերականգնել աւերուած Արցախը, այլ ան մեզի հետ էր պատերազմի ժամանակ: Անոր մահով իւրաքանչիւր արցախցի հոգիին մէկ անկիւնը կրակ մը մարեցաւ: Ան ապրեցաւ հայրենիքէն հեռու, բայց ապրեցաւ հայրենիքով եւ հեռացաւ հայրենիքի կարօտը սրտին մէջ»,- ըսաւ Աղաբալեան եւ աւելցուցլ, որ մեծ բարերարը օրինակ դարձաւ շատերուն համար, եւ շատերուն համար ալ ճանապարհ բացաւ դէպի հայրենիք:

Վանք համայնքի ղեկավար Անտրէ Սարգսեան նշած է, որ Լ. Հայրապետեանի շնորհիւ այսօր գիւղը կայացած է, եւ անոր իրականացուցած բազմաթիւ ծրագիրներ, որոնց շարքին` դպրոցի, մանկապարտէզի, արուեստի դպրոցի, հիւանդանոցի կառուցումը, հնարավարութիւն տուին գիւղը դարձնելու աւելի բարեկարգ:

Հոգեհանգստեան արարողակարգին ներկայ եղած են ԱՀ ԱԺ նախագահ Աշոտ Ղուլեան, պաշտօնատար այլ անձիք,  վանքի բնակիչներ եւ հիւրեր:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS