Ամենայն Հայոց Կաթողիկոսը Հանդիպած է Գերմանիոյ Նախկին Նախագահին Հետ

katoxikos-germ-naxkin-naxagah

Հոկտեմբեր 19-ին Եւրոպայի մէջ Բարեկարգութեան 500-ամեայ յոբելեանի յիշատակութեան ձեռնարկներու ծիրէն ներս՝ Գարեգին Բ․ Ամենայն Հայոց Կաթողիկոսը պաշտօնական ընդունելութեամբ հանդիպած է Գերմանիոյ Դաշնային Հանրապետութեան նախկին նախագահ Եոհակիմ Կաուքի հետ:

Նորին Սրբութեան կ՛ուղեկցէին Գերմանիոյ հայոց թեմի առաջնորդ, Կոստանդնուպոլսոյ Հայոց պատրիարքութեան պատրիարքական տեղապահ Տ. Գարեգին արքեպիսկոպոս Պեքճեանը, Դամասկոսի հայոց թեմի առաջնորդ Տ. Արմաշ եպիսկոպոս Նալպանտեանը եւ Գերմանիոյ հայոց թեմի առաջնորդական փոխանորդ Տ. Սերովբէ վարդապետ Իսախանեանը:

Վեհափառ Հայրապետը իր ուրախութիւնը յայտնեց Գերմանիոյ Պունտեսթակի կողմէ Հայոց Ցեղասպանութեան ճանաչման եւ դատապարտման գործին մէջ իր կարեւոր ներդրումը բերած Գերմանիոյ նախկին նախագահին հետ հանդիպման առիթով:

Նորին Սրբութիւնը Ե. Կաուքին նաեւ ներկայացուց անկախութենէն ետք ժողովուրդի հոգեւոր վերազարթօնքի ու Հայաստանեայց Առաքելական Սուրբ Եկեղեցւոյ ձեռքբերումներու համառօտ պատկերը, ինչպէս նաեւ Հայոց Եկեղեցւոյ ծաւալած գործունէութիւնը միջեկեղեցական ու միջկրօնական ոլորտին մէջ:

Զրոյցի ընթացքին ընդգծուած են քրիստոնէական արժէքներու հոգեւոր ու մշակութային կարեւորութիւնը եւ ատոնց հանդէպ հաւատարմութիւնը հասարակութիւններու կեանքին մէջ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS