Թուրքիոյ Մէջ Ձերբակալուած է Յայտնի Գործարար եւ Հասարակական Գործիչ Օսման Կաւալան

unnamed (1)

Սթամպուլի Աթաթուրքի անուան միջազգային օդակայանին մէջ, Հոկտեմբեր 18 լոյս 19-ին, ձերբակալուած է Անատոլու քուլթուր (Անատոլական մշակոյթ) հասարակական կազմակերպութեան ղեկավար մարմինի նախագահ, գործարար Օսման Կաւալան: Այս մասին, ըստ Armenpress.am-ի, կը յայտնէ թրքական Diken պարբերականը:

Օսման Կաւալան  ձերբակալուած է, երբ կը վերադառնար Գերմանական Կէօթէի անուան համալսարանի ներկայացուցիչներու հետ Կազիանթեփի մէջ տեղի ունեցած հանդիպումէն:

Թրքական ԶԼՄ-ներու տեղեկութիւններով` ձերբակալութենէն առաջ ոստիկանութիւնը գաղտնի հետաքննութիւն սկսած էր եւ Կաւալայի  ձերբակալութեան պատճառը դեռ յայտնի չէ:

Օսման Կաւալան ծնած է 1957-ին Փարիզ: Սթամպուլի Ռոպերթ դպրոցը աւարտելէն ետք՝ բարձրագոյն կրթութիւնը ստացած է Մանչեսթըրի համալսարանի տնտեսագիտութեան բաժանմունքին մէջ:

Եղած է տարբեր գործարար եւ հասարակական կազմակերպութիւններու տնօրէններու խորհուրդի անդամ, ինչպէս թուրք-լեհական գործարար խորհուրդը, թուրք-յունական գործարար խորհուրդը, Հարաւարեւելեան Եւրոպայի ժողովրդավարութեան կեդրոնը եւ այլն:

Օսման Կաւալան ներկայիս կը հանդիսանայ TESEV- ի տնօրէններու խորհուրդի, Բաց հասարակութեան ուսումնարանի խորհրդատուական խորհուրդի, Պատմութեան հիմնադրամին աջակցելու եւ Տիարպեքիրի մշակութային ընկերակցութեան, ինչպէս նաեւ Հելսինկեան քաղաքացիական ասամպլէայի անդամ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS