Արցախի Կառավարութիւնը Քաշաթաղի Շրջանին Մէջ Պիտի Աշխուժացնէ Հայրենադարձութեան Ծրագիրը. Արայիկ Յարութիւնեան

ariavan

Արցախի Հանրապետութեան պետական նախարար Արայիկ Յարութիւնեան Հոկտեմբեր 18-ին, Արցախի գիւղատնտեսութեան նախարար Ժիրայր Միրզոյեանի եւ Գիւղի եւ գիւղատնտեսութեան աջակցութեան հիմնադրամի տնօրէն Աշոտ Բախշիյեանի ուղեկցութեամբ եւ Քաշաթաղի շրջանի համայնքներու ղեկավարներու, գիւղատնտեսութեան պատասխանատուներու եւ խոշոր հողագործներու մասնակցութեամբ, Բերձորի մէջ հրաւիրած է խորհրդակցութիւն` գիւղատնտեսական եւ շրջանի զարգացման հետ կապուած շարք մը այլ թեմաներու շուրջ:

ԱՀ կառավարութեան աշխատակազմի տեղեկատուութեան եւ հասարակայնութեան հետ կապերու բաժնի փոխանցմամբ` խորհրդակցութեան զեկոյցով հանդէս եկած է շրջանի գիւղատնտեսութեան բաժնի պատասխանատուն: Վերջինս նշած է, որ, վարչակազմի ղեկավարի յանձնարարութեամբ, ձեւաւորուած է շտապ, որպէսզի կազմակերպուած ձեւով ժամանակին հասցնեն աշնանացանի բոլոր աշխատանքները: Անդրադառնալով անցնող տարուան ցուցանիշներուն` զեկուցողը շեշտադրած է, որ Քաշաթաղի շրջանը կը շարունակէ հանրապետութեան մէջ պահպանել գիւղատնտեսութեան համախառն բերքի արտադրութեան առումով առաջատարի դիրքը: Ցանուած 20,207 հեքթարէն հնձուած է 20,052 հեքթարը, որմէ ստացուած համախառն բերքը կազմած է 55,817 թոն։

01

Ա. Յարութիւնեան բաւարար գնահատած է ներկայացուած արդիւնքները եւ նշած, որ, հաշուի առնելով շրջանին մէջ առկայ գիւղատնտեսական մեծ ներուժը, դեռ ընելիքները շատ են: «Քաշաթաղի շրջանին մէջ պետական միջոցներով շուտով երկու փորձնական ծրագրի պիտի սկսինք: Առաջինը հարաւային եւ հիւսիսային թեւերու մէջ կաթի մթերման ժամանակակից կէտերու բացումն է, որոնք լրացուցիչ պիտի նպաստեն շրջանի անասնապահութեան զարգացման: Երկրորդը` յատկապէս հիւսիսային թեւի մէջ, ուր առկայ է տարբեր տեսակի պտուղներու իրացման խնդիրը, պիտի տրամադրուին չիրերու պատրաստման սարքաւորումներ: Այնուհետեւ պատրաստուած ամբողջ ապրանքատեսականին պետական աջակցութեամբ պիտի գնուի»,- ըսած է պետական նախարարը եւ աւելցուցած, որ կը նախատեսուի նաեւ սառնարանային ժամանակակից տնտեսութիւններու ստեղծում, ուր բնակիչները հնարաւորութիւն կ’ունենան պահել իրենց բերքը եւ ձմեռը աւելի թանկ գինով շուկայ հանել:

Հանդիպման ընթացքին Ա. Յարութիւնեան անդրադարձած է նաեւ հայրենադարձութեան խնդրին: Ան նշած է, որ կառավարութիւնը կը նախատեսէ շրջանին մէջ աշխուժացնել հայրենադարձութեան ծրագիրը, եւ շրջանի վարչակազմի ղեկավարին յանձնարարած է գոյքագրել շրջանի ամբողջ այն բնակարանները, որոնք հնարաւոր է վերակառուցել: Ան նշած է նաեւ, որ հայրենադարձութեան խթանման համար շրջանի տարբեր համայնքներու մէջ կը ծրագրուի հարիւրաւոր նոր բնակարաններ կառուցել:

05

Խորհրդակցութեան ընթացքին Արայիկ Յարութիւնեան պատասխանած է նաեւ ներկաները յուզող հարցերուն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS