Հայաստանի Մէջ 16 Տարեկանէն Բարձր Տղամարդոց Կէսէն Աւելին Ամէնօրեայ Ծխող է

cigarette

Հայաստանի մէջ Հոկտեմբեր 12-ը «Ծխախոտի դէմ պայքարի ազգային օր է: Ըստ «Արմենփրես»-ի՝ ՀՀ առողջապահութեան նախարարութիւնը կը տեղեկացնէ, որ Հայաստանի մէջ 16 տարեկանէն բարձր տղամարդոց կէսէն աւելին ամենօրեայ ծխող է: Կիներու ծխախոտի օգտագործման ցուցանիշը կը հասնի 5%-ի:

Առողջապահութեան համաշխարհային կազմակերպութեան (ԱՀԿ) տուեալներով` աշխարhի մէջ իւրաքանչիւր 6 վայրկեանը մէկ ծխախոտի հետեւանքով յառաջացած հիւանդութիւններէ մէկը կը մահանայ: Այս տարուան վիճակագրական տուեալներու համաձայն` Ծխախոտի դէմ պայքարի ԱՀԿ պայմանադրութեան օրէնսդրութեան վերաբերող պահանջները ապահովելու նպատակով մշակուած եւ Օգոստոս 3-ին ՀՀ կառավարութեան հաւանութեան արժանացած է «Ծխելու դէմ պայքարի ռազմավարութիւնը», որու թիրախը յառաջիկայ 3-4 տարուան մէջ ծխող տղամարդոց թիւը շուրջ 10%-ով կրճատելն է: Այժմ կը ձեւաւորուի Ծխելու դէմ պայքարի գործողութիւններու իրականացման համակարգող միջգերատեսչական յանձնաժողով: Զուգահեռաբար աշխատանքներ կ՛իրականացուին օրէնսդրական դաշտը կատարելագործելու ուղղութեամբ: Մօտ օրերս բարեփոխուած օրէնսդրական փաթեթը պիտի ներկայացուի հանրութեան:

 Առողջապահութեան համաշխարհային կազմակերպութեան «Ծխախոտի դէմ պայքարի մասին» շրջանակային պայմանադրութեան Հայաստանը միացաւ 2004 թուականի Հոկտեմբեր 12-ին : 2008-էն, ՀՀ առողջապահութեան նախարարութեան եւ Հայաստանի հասարակական կազմակերպութիւններու նախաձեռնութեամբ, Հոկտեմբեր 12-ը Հայաստանի Հանրապետութեան կառավարութեան որոշմամբ յայտարարուեցաւ «Ծխախոտի դէմ պայքարի ազգային օր»:

Հայաստանի մէջ Ծխախոտի դէմ պայքարի գործողութիւններու նպատակն է պաշտպանել մարդոց առողջութիւնը ծխախոտի օգտագործման ու ծխախոտի ծուխի ազդեցութեան, ինչպէս նաեւ ընկերային, բնապահպանական եւ տնտեսական բացասական կործանարար հետեւանքներէն: Պայքարի հիմնական գործիքներն են` գովազդի, հովանաւորչութեան եւ վաճառքի խթանման ամբողջական արգելքը, հասարակական վայրերու մէջ ծխախոտի սահմանափակումը:

Ամբողջ աշխարհի մէջ ծխախոտի օգտագործումը եւ ատոր հետեւանքով յառաջացած հիւանդացութեան եւ մահացութեան բարձր ցուցանիշները առողջապահական եւ տնտեսական լուրջ խնդիրներ կը ստեղծեն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS