Ջաւախքցիք Կ՛ընդդիմանան Վիրահայոց Առաջնորդին Գումբուրդոյի Եկեղեցւոյ Պատկանելութեան Հարցով

VRASDAN_kumburdo

Հոկտեմբեր 10-ին, Սամցխէ-Ջաւախքի եւ Քուեմօ Քարթլիի հայկական հասարակական կազմակերպութիւններու խորհուրդը յայտարարութիւն մը հրապարակած է, ուր իր անհամաձայնութիւնը կը յայտնէ վերջերս հրապարակուած Վիրահայոց թեմի առաջնորդի ստորագրութիւնը (վրացական կազմակերպութիւններու հետ միացեալ) կրող յայտարարութեան:

Ստորեւ` Սամցխէ-Ջաւախքի եւ Քուեմօ Քարթլիի հայկական հասարակական կազմակերպութիւններու խորհուրդի յայտարարութիւնը` ամբողջութեամբ.

Ախալքալաքի Գումբուրդօ գիւղին մէջ տեղի ունեցած վերջին իրադարձութիւնները առիթ հանդիսացան տարաբնոյթ մեկնաբանութիւններու, տեղի ունեցան նաեւ դէպքերուն յաջորդող զարգացումներ: Օրերս յատուկ յայտարարութեամբ հանդէս եկան նաեւ վրաստանեան շարք մը պետական եւ կրօնական կազմակերպութիւններ, որոնք, ի թիւս նշեալ խնդրին առնչուող այլեւայլ հարցերու շօշափման, յայտարարեցին նաեւ Գումբուրդոյի միջնադարեան եկեղեցւոյ վրացական ըլլալուն մասին: Նշեալ յայտարարութեան տակ ստորագրած է նաեւ Հայոց առաքելական Վիրահայոց թեմը, որու առաջնորդ Վազգէն եպս. Միրզախանեանը օրերս այցելեց Գումբուրդօ եւ տեղւոյն վրայ ներկայացուց հարցի կարգաւորման ընթացքը:

Սամցխէ-Ջաւախքի եւ Քուեմօ Քարթլիի հայկական հասարակական կազմակերպութիւններու խորհուրդը, քննարկման արժանացնելով իրադարձութիւններու վերջին օրերու ընթացքը, կը փաստէ, որ հանրութեան յայտնի էր վրացական կողմի տեսակէտը, եւ անիկա լրացուցիչ մեկնաբանման կարիք չունի: Փոխարէնը խիստ անհասկնալի էր Գումբուրդոյի եկեղեցւոյ վրացական ըլլալու մասին յայտարարութեան տակ Հայոց առաքելական Վիրահայոց թեմի ստորագրութիւնը, քանի որ իրականութեան մէջ վերջին օրերուն ծաւալած խնդիրը կ՛առնչուէր ոչ թէ տաճարի ազգային պատկանելութեան, այլ տեղի ազգաբնակչութեան կողմէ իրենց նախնեաց շիրիմներու յիշատակին խաչքարի տեղադրման:

Խորհուրդը համաձայն չէ նաեւ յայտարարութեան մէջ տեղ գտած եւ տաճարի ազգային պատկանելութեան վերաբերող դրոյթի հետ եւ կը գտնէ, որ, տաճարի ծագման քաղկեդոնական ըլլալու հանգամանքէն անկախ, անիկա դարերով օգտագործուած է առաքելադաւան գումբուրդոցիներու կողմէ, ըստ այդմ` տաճարի ճակատագրի որոշման հարցով իրենց մասնակցութիւնը պէտք է ունենան նաեւ այդ յուշարձանը օտար զաւթիչներէ պաշտպանած եւ իրենց նախնեաց գերեզմաններով սրբացուցած գումբուրդոցիները:

Խորհուրդը կը դատապարտէ նաեւ Վրաստանի ուժային կառոյցներու իրականացուցած վերջին գործողութիւնները, որոնք իրականացուեցան իրենց նախնիներու յիշատակին իրականացուելիք միջոցառման, այն է` խաչքարի տեղադրման համար եկեղեցւոյ շուրջ հաւաքուած գումբուրդոցիներու հանդէպ: Խորհուրդը, չբացառելով ստեղծուած թոհուբոհի մէջ տարբեր շրջանակներու կողմէ սեփական շահադիտական նպատակներով ասպարէզ յայտնուելու հանգամանքը, կը դատապարտէ բոլոր այն քայլերը, որոնք ուղղուած են նորանոր բախումներ հրահրելուն եւ իրավիճակի անկայունացման: Խորհուրդին կողմէ անթոյլատրելի կը համարուին նաեւ այս հողի վրայ քաղաքական կամ նախընտրական բոլոր շահարկումները:

Մեկնելով նշեալ հանգամանքէն` Խորհուրդը կը դատապարտէ բոլոր այն գործողութիւնները, որոնք կ՛ոտնահարեն ժողովուրդի արդար պահանջները: Խորհուրդը կը յորդորէ խնդրով շահագրգիռ բոլոր կողմերուն` հետամուտ ըլլալ գումբուրդոցիներու մտահոգութիւններուն եւ հնարաւորութիւն տալ վերջիններուս խելամիտ ժամկէտներու մէջ ծրագրելու եւ իրականացնելու իրենց նախնեաց յիշատակը յարգելուն ուղղուած քայլերը:

ՍԱՄՑԽԷ-ՋԱՒԱԽՔԻ ԵՒ ՔՈՒԵՄՕ ՔԱՐԹԼԻԻ ՀԱՅԿԱԿԱՆ
ՀԱՍԱՐԱԿԱԿԱՆ ԿԱԶՄԱԿԵՐՊՈՒԹԻՒՆՆԵՐԻ ԽՈՐՀՈՒՐԴ

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS