«Կարաւան 1915» Ֆիլմը Կը Վերցուի Թուրքիոյ Սրահներէն

kervan-1915Թուրքիոյ մէջ պատրաստուած եւ Հայոց Ցեղասպանութեան մասին պատմող «Կարաւան 1915» ֆիլմը Հոկտեմբեր 11-ին ետ քաշուեցաւ Թուրքիոյ շարժապատկերի սրահներէն, կը հաղորդէ “Ասպարէզ”-ը։

Ֆիլմին բեմադրիչը՝ Իսմայիլ Կիւնեշ, նշած է, որ ֆիլմին ցուցադրութեան հարցով լուրջ ընդդիմութեան կը հանդիպի՝ աւելցնելով, որ տարբեր խնդիրներ դիմագրաւած է նաեւ ֆիլմին պատրաստութեան ընթացքին:

Կիւնեշ ըսած է, որ ֆիլմը 54 սրահներու մէջ ցուցադրելու համար նախնական համաձայնութիւն ձեռք բերուած էր, ապա դժուարութեամբ կարելի եղած էր այդ թիւը հասցնել 84-ի, հակառակ անոր որ ջանք տարուած էր ֆիլմը ցուցադրելու առնուազն 300 սրահներու մէջ։

Ըստ բեմադրիչին՝ բուն խնդիրը թրքական հասարակութեան մէջ Հայկական Հարցին մասին բացարձակ անտեղեակութիւնն է:

Միաժամանակ, թրքական «ga-zeteduvar.com.tr» կայքին վրայ հրատարակուած է յօդուած մը, որուն հեղինակը՝ Ազիզ Եաղան, կը նշէ, թէ այս ֆիլմը ցոյց կու տայ այդ ամէն ինչը, զոր թուրքերը երկար տարիներով կը փափաքին փոխանցել աշխարհին՝ Հայոց Ցեղասպանութեան մասին: Ան կը գրէ, թէ ֆիլմին մէջ ցուցադրուած են լաւ հագած եւ ապահով պայմաններու մէջ՝ դէպի Հալէպ քալող հայեր, որոնք օսմանցի պաշտօնեաներու հսկողութեան տակ են, բայց ապահովուած չեն ուտելիքով ու ջուրով:

«Ֆիլմը կը պնդէ, թէ այդ ամէն ինչը, որ հայերուն հետ տեղի ունեցաւ ճամբուն վրայ, տեղահանման որոշումը միամտաբար ստորագրած մարդկանց մեղքը չէ՛ր»,- կը գրէ Եաղան՝ աւելցնելով, որ ֆիլմէն նաեւ կարելի է եզրակացնել, թէ պետութիւնը այդ ժամանակ ի վիճակի չէր պաշտպանելու հայերը՝ գաղթի ճամբուն վրայ պատահած աւազակային յարձակումներէն, «թէեւ՝ այդ մէկը ընելու մեծ ցանկութիւն ունէր»:

Ըստ յօդուածագիրին՝ բուն խոչընդոտողը պատերազմական պայմաննե՛րն էին, որոնց պատճառով նման աւազակներու յարձակումին թիրախ դարձած էին բոլորը, նոյնի՛սկ պետական կառոյցները: «Ֆիլմին մէջ ցոյց տրուած են տեղահանութեան օրերուն կորսուած հայ կանանց կերպարներ, որոնք, ոչ թէ առեւանգուած են, այլ իրենց յօժար կամքով ապաստանած են իսլամ տղամարդկանց մօտ»,- եզրակացուցած է ան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS