ԵԽԽՎ-ն Ատրպէյճանի Մէջ Մարդու Իրաւունքներու Ոտնահարումը Դատապարտող Բանաձեւ Ընդունած է

ԵԽԽՎԵւրոպայի խորհրդի խորհրդարանական վեհաժողովը (ԵԽԽՎ) ընդունած է «Ատրպէյճանի մէջ ժողովրդավարական հիմնարկներու  գործունէութիւնը» բանաձեւը:

Բանաձեւին մէջ վեհաժողովը մտահոգութիւն յայտնած է քրէական օրէնսդրութեան կամայական կիրառման խնդրի առնչութեամբ` կարծիքներու արտայայտման ազատութիւնը սահմանափակելու նպատակով, կը յայտնէ «Թերթ․am»-ը: Պատուիրակները նաեւ մտահոգութիւն յայտնած են արտախորհրդարանական ընդդիմութեան գործունէութեան սահմանափակումներու մասին պնդումներու եւ ժողովներու ազատութեան սահմանափակումներու առնչութեամբ:

Պատուիրակները կոչ ըրած են Ատրպէյճանին անյապաղ ապահովելու Մարդու իրաւունքներու եւրոպական դատարանի որոշումներու լիակատար իրագործումը, ազատ արձակելու քաղբանտարկեալները, ստեղծելու լրագրողներու համար իրենց աշխատանքը ազատ կատարել թոյլատրող պայմաններ եւ յետագային փոփոխութիւններ մտցնելու քաղաքացիական հասարակութեան կազմակերպութիւններու գործունէութեան եւ ֆինանսաւորման վերաբերեալ օրէնքներուն մէջ` զանոնք համապատասխանեցնելով Եւրոպայի խորհուրդի չափանիշներուն:

Երէկ ԵԽԽՎ-ի մէջ Ատրպէյճանի պատուիրակութեան ղեկավար Սամետ Սէյիտովը արձագանգած է կազմակերպութեան մէջ իր երկրի քննադատութեան եւ նշած, թէ իրենք գիտեն` «ինչ ուժեր կանգնած են ատոնց ետին»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS