Արտաւազդ Փելեշեանին, Նարա Շլեպչեանին, Ռազմիկ Դաւոյեանին եւ Ռալֆ Յիրիկեանին Շնորհուեցաւ Երեւանի Պատուաւոր Քաղաքացիի Կոչում

yerevani avakani

Երեւանի աւագանին Հոկտեմբեր 11-ին գումարած արտահերթ նիստի ընթացքին, որ կը վարէր քաղաքապետ Տարօն Մարգարեանը, հաստատած է Երեւանի քաղաքապետի առաջարկը` Երեւան քաղաքի 2799-րդ տարեդարձի առթիւ, շարժանկարի զարգացման գործին մէջ ներդրած նշանակալի աւանդին, ակնառու վաստակի, երկարամեայ եւ բեղմնաւոր գործունէութեան համար բեմադրիչ , ՀՀ ժողովրդական արտիստ Արտաւազդ Աշոտի Փելեշեանին «Երեւանի պատուաւոր քաղաքացի» կոչում շնորհելու մասին որոշման նախագիծը:

Ինչպէս  կը տեղեկացնե Երեւանի քաղաքապետարանի տեղեկատուութեան եւ հասարակայնութեան հետ կապերու վարչութենէն, աւագանիի մէկ այլ որոշումով, Երեւանի 2799-րդ տարեդարձի առթիւ, նկատի առնելով հայկական հեռուստատեսութեան բնագաւառին մէջ ներդրած նշանակալի աւանդը, բազմամեայ վաստակն ու բեղմնաւոր գործունէութիւնը, «Երեւանի պատուաւոր քաղաքացի» կոչում շնորհուած է հաղորդավարուհի, ՀԽՍՀ ժողովրդական արտիստ Նարա Սուրէնի Շլեպչեանին:

Երեւանի 2799-րդ տարեդարձի առթիւ, հաշուի առնելով հայ գրականութեան բնագաւառին մէջ ներդրած նշանակալի աւանդը, ակնառու վաստակն ու բազմամեայ գործունէութիւնը, Երեւանի աւագանին քննարկած եւ հաստատած է բանաստեղծ, հասարակական գործիչ Ռազմիկ Նիկողոսի Դաւոյեանին «Երեւանի պատուաւոր քաղաքացի» կոչում շնորհելու մասին որոշման նախագիծը: Աւագանիի մէկ այլ որոշումով, տնտեսութեան զարգացման գործին մէջ ներդրած նշանակալի աւանդի եւ Երեւան քաղաքին մէջ աշխոյժ գործունէութիւն ծաւալելու համար, Երեւանի 2799-րդ տարեդարձի առթիւ, «Երեւանի պատուաւոր քաղաքացի» կոչում շնորհուած է նաեւ «Վիւասել–Մթս»-ի գլխաւոր տնօրէն Ռալֆ Սեզարի Յիրիկեանին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS