Թուրքական Դատարանը «Wall Street Journal»-ի Թղթակիցը Ազատազրկման Դատապարտած է

The Wall Street JournalԱմերիկեան յայտնի «Wall Street Journal» թերթի Թուրքիոյ թղթակից Այլայ Ալպայրաքը թրքական դատարանի կողմէ 2 տարի 1 ամիս ազատազրկման դատապարտուած է: Թրքական «Gazeteduvar» պարբերականի տեղեկացմամբ` Ալպայրաքը դատապարտուած է «Քիւրտիստանի բանուորական կուսակցութեան օգտին քարոզչութիւն ընելու» մեղադրանքով:

Ըստ «Էրմէնիհապեր»-ի՝ այժմ Նիւ Եորք գտնուող լրագրողը յայտարարած է, որ կը պատրաստուի վճիռը բողոքարկելու վերաքննիչ դատարանին մէջ: Ան, մասնաւորապէս, ըսած է. «Ականատես ըլլալով Թուրքիոյ մէջ այժմ տիրող մթնոլորտին` այս վճիռը պէտք է, որ զիս բոլորովին չզարմացնէր, բայց միեւնոյնն է անակնկալի եկայ»:

Թրքական դատարանի որոշումը քննադատած է նաեւ « Wall Street Journal»-ի գլխաւոր խմբագիր Ժերարտ Պէյքըրը` ըսելով .«Ասիկա անկողմնակալ եւ անկախ լրագրողի նկատմամբ անարդար եւ անպատեհ պատիժ է»:

Նշենք, որ Ալպայրաքը յայտնուած է թուրք իրաւապահ մարմիններու ուշադրութեան տակ, երբ  2015 թուականի Օգոստոս 19-ին հրապարակուած է անոր հեղինակած «Թուրքիոյ քրդաբնակ շրջանին մէջ քաղաքացիական պատերազմը կը թէժանայ»  վերնագիրով յօդուածը։

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS