Պոլսոյ Պատրիարքի Ընտրութիւնները Դեռ Անորոշ են. Սթամպուլի Նահանգապետարան Ուղարկուած Նամակը Այդպէս ալ Անպատասխան Մնաց

pakrat estukian

Պոլսոյ պատրիարքարանի կողմէ պատրիարքի ընտրութիւններու վերաբերեալ Սթամպուլի նահանգապետարան ուղարկուած նամակը այդպէս ալ անպատասխան մնաց:

Այս մասին`   ըստ “Արմէնփրես”-ի՝ տեղեկացուցած է «Ակօս» շաբաթաթերթի հայերէն բաժնի գլխաւոր խմբագիր Բագրատ Էսդուգեան:

«Հիմա կը փորձենք պետական մարմիններու ներկայացուցիչներու հետ նոր հանդիպում ապահովել, որպէսզի անձնապէս, տեղւոյն վրայ խնդիրը ներկայացուի: Ինչպէս գիտէք, խնդրի վերաբերեալ առաջին անգամ գրաւոր նամակ ներկայացուեցաւ, նշուած էր, որ երկու ամսուան մէջ պատասխան պիտի ըլլայ, սակայն տեսաք, որ Հոկտեմբեր 9-ը վերջնաժամկէտն էր, եւ պետական խողովակէ ոչ մէկ արձագանգ եղաւ: Հիմա հնարաւորութեան պարագային անձնապէս պիտի ներկայացուի խնդիրը»,-ըսած է Բագրատ Էսդուգեան: Ան տեղեկացուցած է, որ հնարաւոր հանդիպման պիտի ներկայանայ տեղապահը:

Անձամբ տեղապահի ներկայանալուն, ինչպէս նաեւ խնդիրը բացատրելու պարագային արդեօք ինչ-որ փոփոխութիւն հաւանակա՞ն է. հարցին ի պատասխան Բագրատ Էսդուգեան նշած է, որ քիչ հաւանական կը համարէ:

«Ոչ մէկ պատասխան ալ չստացանք, ամէն ինչ կը կատարուի գործընթացը ձգձգելու ու անորոշ վիճակը պահելու համար: Այսօր խնդիրը ճգնաժամի մատնուած է: Յետագայ քայլերը դեռ պարզ չեն, սպասենք հանդիպումին»,- ըսած է Բագրատ Էսդուգեան:

Պատրիարքական ընտրութիւններու կազմակերպչական նախաձեռնող մարմինը Սթամպուլի նահանգապետարան ուղարկուած դիմումով ներկայացուցած էր ինչպէս նախաձեռնող մարմնի կազմը, այնպէս ալ ընտրութիւններու օրը: Ընտրական գործընթացի յառաջխաղացման համար անհրաժեշտ է, որ պատասխան տրուի պատրիարքութեան նամակին եւ յանձնարարութիւն` ընտրութիւնը կազմակերպելու համար:

Պոլսոյ Հայոց պատրիարքարանին մէջ 2016 թուականի Հոկտեմբեր 26-ին կայացած եկեղեցական ժողովի ժամանակ որոշուած է դիմել թրքական իշխանութիւններուն նոր պատրիարք ընտրելու արտօնութիւն տրամադրելու խնդրանքով:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS