Ատրպէյճանի Անմիտ Քարոզիչը կը Մեղադրէ Քալիֆորնիոյ Հայերը

sassounian

«Քալիֆորնիա Քուրիըր» (www.TheCaliforniaCourier.com) թերթի հրատարակիչ եւ խմբագիր Յարութ Սասունեան. 

Ոչ մէկ շաբաթ կ՝անցնի առանց նոր քարոզիչի մը, որ Ատրպէյճանի համար չգրէ հակահայկական ապատեղեկատւութիւն ընդդէմ Հայաստանի կամ Սփիւռքի:

Վերջին նման յօդուածը գրած է Էնտրիւ Գորիպգոն, անյայտ անձնաւորութիւն մը, որ կը ներկայանայ իբրեւ «Մոսկուայի ամերիկացի քաղաքական վերլուծաբան»: Յայտնի չէ, թէ ինչ կրթութեան կամ հմտութիւններու հիման վրայ է, որ ան կ՝որակուի իբրեւ հայկական Սփիւռքի «վերլուծաբան»` միայն իրեն յայտնի հիմնաւորումով նման կեղծ մեղադրանքներ ներկայացնելու համար: Տպաւորութիւն կը ստեղծուի, որ Գորիպգոյի յօդուածը պարզապէս անտեղեակութեան հետեւանք չէ, այլ միտումնաւոր ջանքեր` կազմակերպուած այն մարդոց կողմէ, որոնց մասին դժուար չէ կռահել…

Գորիպգոյի յօդուածը, որ հրապարակուած է Գանատայի Համաշխարհայնացման հետազօտական ​​կեդրոնին կողմէ, վերնագրուած է. «ԱՄՆ-ի հայկական լոպպիի առաքելութիւնն է` սադրել Ատրպէյճանն ու Ռուսիան»: Նոյնիսկ վերնագիրէն ակնյայտ է, որ հեղինակը կը փորձէ բախում հրահրել Ռուսիոյ եւ հայերու միջեւ, երբ իրականութեան մէջ նման բան գոյութիւն չունի: Յօդուածին վերջը կը նշուի, որ անիկա «նախապէս գրուած է Moscow-Baku.ru առցանց տեղեկատուական էջին համար», որ յստակ ապացոյցներ կը ներկայացնէ, թէ հեղինակը որուն կը փորձէ գոհացնել…

Իր առաջին պարբերութեան մէջ Գորիպգոն կը յարձակի Քալիֆորնիոյ հայերուն վրայ` իրենց ծայրայեղ ազգայնականութեան եւ յանուն Միացեալ Նահանգներու եւ ընդդէմ Հայաստանի շահերու աշխատելու համար: Անշուշտ, այս յայտարարութիւններէն ո՛չ մէկը ճիշդ է… Հեղինակին նպատակն է` անհիմն հակասութիւններ սերմանել: Ահա Գորիպգոյի կեղծ մեկնաբանութեան առաջին պարբերութիւնը.

«Հայաստանի արտաքին քաղաքականութեան գործիքներուն մէջ առաւել ազդեցիկ զէնքերէն մէկը ԱՄՆ-ի հայկական սփիւռքի լոպպին է Քալիֆորնիոյ մէջ, որ կը պաշտպանէ իր հայրենիքի առաւել ազգայնական եւ սադրիչ քաղաքականութիւնը: Հայաստանի իշխանութիւններուն համար պատասխանատու եւ գործնական գործիք ծառայելու փոխարէն, որ կրնար մեծ տէրութիւններու միջեւ ըլլալ հաշուարկուած հաւասարակշռուած քաղաքականութիւն, սակայն, այստեղ դերերը փոխուած են, եւ Երեւանը կ՝օգտագործուի իբրեւ գործիք ու միջոց ԱՄՆ-ի հայկական լոպպիի համար` աշխատելով ընդդէմ հայկական շահերու` ԱՄՆ-ի առաջխաղացման համար: Բոլոր պետութիւնները կը ձգտին, որ իրենց մարդիկ ստեղծեն ուժեղ եւ ազդեցիկ սփիւռքի համայնքներ, սակայն հայերը շատ քաղաքականացուած են եւ պարբերաբար բացասական ազդեցութիւն կ՝ունենան Երեւանի վրայ, որպէսզի ան յետագային յայտնուի ամերիկեան վերահսկողութեան տակ»:

Նախ եւ առաջ, Քալիֆորնիոյ հայերը ո՛չ կը փորձեն եւ ո՛չ ալ կարողութիւն ունին Հայաստանի Հանրապետութեան քաղաքականութեան վրայ ազդելու: Երկրորդ, եթէ ոեւէ մէկը նուազագոյն գիտելիք ունենար ամերիկահայերու մասին, ուստի պիտի իմանար, որ անոնք յաճախ կը քննադատեն ԱՄՆ-ի յարաբերութիւնները Թուրքիոյ հետ, Արցախի վերաբերեալ անոր դիրքորոշումը եւ Թուրքիոյ անխոհեմ ազդեցութիւնը ԱՄՆ կառավարութեան ղեկավարներուն վրայ, որոնք կը հրաժարին օգտագործելէ «Հայոց Ցեղասպանութիւն» եզրը: Հետեւաբար, ամբողջովին կեղծ է այն պնդումը, թէ Քալիֆորնիոյ հայերը կուրօրէն կը ծառայեն Միացեալ Նահանգներու շահերուն:

Այնուհետեւ Գորիպգոն կը մեղադրէ «ԱՄՆ-ի հայկական սփիւռքը»` Սեպտեմբերի կէսերուն քոնկրէսական պատուիրակութեան ո՛չ միայն Հայաստան տանելու, այլ «լայնօրէն լուսաբանուած այցին համար դէպի արեւմտեան Ատրպէյճանի գրաւեալ տարածքները»: Արցախի Հանրապետութիւնը ներկայացնելով իբրեւ «արեւմտեան Ատրպէյճանի գրաւեալ տարածքներ», Գորիպգոն կը յստակացնէ, թէ որուն շահերը կը պաշտպանէ… Տարօրինակ է, որ հեղինակ, այնուհետեւ, այդ քոնկրէսական այցը կը ներկայացնէ ո՛չ միայն իբրեւ ամերիկամէտ քայլ, այլեւ` «Ռուսիոյ հասցուած ընդհանուր ռազմավարական վնաս»: Այսպիսով, Գորիպգոն կը մեղադրէ ամերիկահայերը ռուսական շահերը Հայաստանի մէջ ոտնահարելու համար, որ ամբողջութեամբ չի համապատասխաներ իրականութեան, քանի որ անոնք ո՛չ ցանկութիւն ունին, ոչ ալ հնարաւորութիւն վնասելու Ռուսիոյ… Հեղինակը պարզապէս ցոյց կու տայ, թէ բացի Ատրպէյճանէն, ով է իր երկրորդ վճարող տէրը…

Այնուհետեւ, Գորիպգոն կը դիմէ ծայրայեղ չափազանցութեան` հնարելով հետեւեալ կեղծ սենարը ամերիկահայերուն մասին. «Իրականութեան մէջ, անոնք կ՝ուզեն հնարաւոր ամէն ինչ ընել քանդելու հայ-ռուսական պատմական բարեկամութիւնը` ջղաձգօրէն փորձելով Երեւանը անջատել Մոսկուայէն եւ բերել Ուաշինկթընի հովանիին ներքոյ»:

Իր կեղծ պնդումը պաշտպանելու համար, հեղինակը կը նշէ, որ անցած ամիս Հայաստանի քաղաքացիներուն բողոքները կառավարութեան պաշտօնեայի` ռուսերէնով ծրագիրներուն աւելի մեծ աջակցութիւն ցուցաբերելու յայտարարութեան վերաբերեալ, սերտօրէն կը համընկնին ԱՄՆ-ի Սփիւռքի որոշ տարրերու եւ անոնց ամերիկեան գործընկերներուն ներկայացուցած տեսակէտին»: Իրականութեան մէջ, որեւէ մէկը ամբողջ Սփիւռքի մէջ ո՛չ մէկ քննադատական խօսք ըսած է ռուսերէնի մասին: Այնուհետեւ Գորիպգոն կը դիմէ այլ անհիմն չափազանցութեան մը` պնդելով, թէ Հայաստանի կրթութեան եւ գիտութեան նախարարութիւնը «ճնշման ազդեցութեան տակ տեղի տուած է Սփիւռքի պահանջներուն եւ վերահաստատած է, որ երկրին մէջ միակ ազգային լեզուն հայերէնն է…. Արդեօ՞ք ան մտադրուած էր, թէ՝ ոչ, (կրթութեան նախարար Լեւոն) Մկրտչեանը ինկաւ տեղեկատուական պատերազմի ծուղակը, որ անոր համար լարած էին ԱՄՆ-ի մէջ Սփիւռքի քաղաքական գործունէութիւնը կազմակերպող խորամանկ ուղեղները»: Ասիկա հեղինակին հերթական հերիւրանքն է…

Գորիպգոն, գերազանցելով տրամաբանութեան բոլոր սահմանները, կը պնդէ, որ «ԱՄՆ-ի հայկական լոպպին շատ նման է կիւլենիստներուն Թուրքիոյ մէջ, անով, որ անոնք եւս կը ներկայացնեն ստուերային իշխանութեան ցանց մը` խաղի միջոցներով առաջ բերուած յստակ աշխարհաքաղաքական օրակարգով, եւ երկուքն ալ կը ծառայեն Ուաշինկթընի շահերուն, ընդդէմ իրենց հայրենիքներուն»: Գորիպգոն լիովին սխալ եզրակացութեամբ կը պնդէ, որ «ԱՄՆ-ի հայկական լոպպին վտանգաւոր կերպով մօտ է լիակատար վերահսկողութեան տակ առնելու իր հայրենիքի արտաքին քաղաքականութիւնը»:

Գորիպգոյի յօդուածը լեցուն է բազմաթիւ այլ կեղծիքներով: Ան, որ պատուիրած է այս յօդուածը, պէտք է գիտակցի, որ նման հեղինակները իրենց ծիծաղելի կեղծիքներով աւելի մեծ վնաս կը հասցնեն իրենց վճարող տէրերուն, քան թէ Քալիֆորնիոյ հայ համայնքի շահերուն…

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS