Ճշմարտութեան Յաղթարշաւը

architects of denialԱԲՕ ՊՈՂԻԿԵԱՆ

«Ուրացման Ճարտարապետները» վաւերագրական ժապաւէնի՝ Արեւմտեան Միացեալ Նահանգներու մէջ առաջին ցուցադրութեան ներկայ եղողները վստահաբար պիտի վկայեն, թէ Հայոց Ցեղասպանութեան ուրացման ճիգերուն մահացու հարուած հասցնող, ճշմարտութիւնը աշխարհին հասկնալի ձեւով, լեզուով ու միջոցով ներկայացնող գործ մըն է պատրաստուածը:

Վաւերագրական ժապաւէն մը, որուն այժմէականութեան վերջին տխուր փաստը եկաւ Լաս Վեկասէն՝ անմարդկային ոճրագործութեան տեսքով: Շարժապատկերի արտադրողներուն պատգամը յստակ է ու մէկին. ցեղասպանութեան ուրացումը շարունակութիւնն իսկ է ցեղասպանութեանց:

Երեքշաբթի օր, Հոլիվուտի «Տաղլեան» սրահին մէջ, աւելի քան հինգ հարիւր հայ եւ օտար հասարակական ու արուեստի գործիչներու ներկայութեամբ մատուցուցեաւ այս վաւերագրական ժապաւէնը, որ հիմնաւորուած է պատմական փաստաթուղթերու, պատմաբաններու, վերապրողներու ու անոնց ժառանգորդներու վկայութիւններով, ինչպէս նաեւ՝ պետութիւններու խորհրդապահական դարակները քրքրող ու գաղտնիքները բացայայտող «Ուիքիլիքս»ի հիմնադիր Ժուլիան Ասանժի, ամերիկեան Դաշնակցային Հետախուզական Գրասենեակի (FBI) նախկին աշխատակից Սիպել Էտմընտզի եւ ցեղասպանութիւններ դիտարկող պատմաբան դոկտ. Կրեկըրի Սթանթոնի մեկնաբանութիւններով:

Ամբողջական արտադրանք մըն էր մեզի մատուցուածը, Հայոց Ցեղասպանութիւնը մարդկութեան վերջին հարիւրամեակի պատմութեան պարունակին մէջ տեղաւորող այս ժապաւէնը, զոր դուք եւս կրնաք դիտել այս Ուրբաթ օրուընէ սկսեալ, շրջանիս շարժապատկերի սրահներուն մէջ: Մեր թելադրանքը, յանձնարարութիւնն ու խնդրանքն է՝ անպայմա՛ն գացէք ու դիտեցէք Ցեղասպանութենէն մինչեւ անցեալ տարուան Ապրիլ՝ Թուրքիոյ եւ Ատրպէյճանի կողմէ իրագործուած մարդասպանութեանց ժամանակագրութիւնը ամփոփող սոյն ամբողջական, հոյակապ հարազատութեամբ ու զգայնութեամբ պատմուած արտադրութիւնը:

Ուրացումը դատապարտող ու ճշմարտութեան յաղթարշաւը նուիրականացնող այս ժապաւէնի արտադրողները՝ Տին Քէյն եւ Մոնթել Ուիլեըմզ, ամէն ճիգ թափած են առաւելագոյնս տարածելու ժապաւէնը, զուգահեռաբար զայն ցուցադրելով սրահներու մէջ, ինչպէս նաեւ՝ քապելային կայաններէ:

Մեզի կը մնայ սատարել ճշմարտութեան այս յաղթարշաւին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS