Պոլսոյ Մէջ Ազգայնականները Քարեր Կը Նետեն Եկեղեցիէն Դուրս Ելլող Հայերուն Վրայ

72675

Պոլսոյ մէջ, խումբ մը ազգայնականներ քարերով յարձակած են Սուրբ Յովհաննէս հայկական եկեղեցիէն դուրս ելլող հայ հաւատացեալներուն վրայ: Այս մասին, ըստ Armenpress.am-ի, artigercek.com-ին յայտնած է պոլսահայ գործիչ Երուանդ Օզուզուն:

«Եկեղեցիէն դուրս ելողներուն անակնկալ կը սպասուէր.  Խումբ մը անձեր սկսան քարեր նետել` վանկարկելով. Մա՛հ ձեզի: Ասիկա ատելութեան եւ թշնամանքի դրսեւորման այն կէտն է, որուն հասած է Թուրքիան»,- նշած է Օզուզունը:

Ան ընդգծած է, որ ամէն Կիրակի եկեղեցիներուն մէջ կիրակնօրեայ պատարագներ կը մատուցուին, եւ մինչեւ պատարագին աւարտը՝ եկեղեցւոյ տարածքը կը հսկեն ոստիկանները: Այնուհանդերձ, պոլսահայ գործիչը տխրեցնող հանգամանք կը համարէ այն փաստը, որ իրենք սեփական անվտանգութիւնը պահպանելու խնդիր ունին երկրի մը մէջ, որուն քաղաքացին են:

«Թուրքիոյ մէջ փոքրամասնութիւնները, մասնաւորապէս հայերը, դարձած են ատելութեան խօսքի թիրախ: Այս երկրին մէջ հայ բառը շատերու կողմէն կ’օգտագործուի իբրեւ հայհոյանք»,- ցաւով արձանագրած է Օզուզունը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS