Լեհաստանի Լիւպլին Քաղաքին Մէջ Բացուած է Դաւիթ Յակոբեանի Լուսանկարչական Աշխատանքներու Ցուցահանդէսը

71308

Լիւպլինի քաղաքապետարանի ճեմասրահին մէջ տեղի ունեցած է ՀՀ Նախագահի անձնական լուսանկարիչ Դաւիթ Յակոբեանի «Յուշեր ճանապարհէն» խորագիրով լուսանկարչական աշխատանքներու անհատական ցուցահանդէսի բացման հանդիսաւոր արարողութիւնը:

Ցուցահանդէսը կազմակերպած էր Լեհաստանի մէջ ՀՀ դեսպանութիւնը` Լիւպլինի քաղաքապետարանին հետ համատեղ:

Ցուցահանդէսի բացման հանդիսաւոր արարողութեան մասնակցած են Լեհաստանի մէջ ՀՀ դեսպան Էդգար Ղազարեանը, Լիւպլինի քաղաքապետ Քշիշդոֆ Ժուքը, ՀՀ ԱԺ պատգամաւոր Աշոտ Արսէնեանը, Հայ Առաքելական Սուրբ Եկեղեցւոյ լեհահայոց հոգեւոր հովիւ Տաճատ Վարդապետ Ծատուրեանը, Լեհաստանի մէջ գործող շարք մը հայկական կազմակերպութիւններու ներկայացուցիչներ, լրագրողներ եւ այլն:

Ցուցահանդէսի բացման ժամանակ՝ ելոյթով հանդէս եկած է Լիւպլինի քաղաքապետ Քշիշդոֆ Ժուքը, որ նշած է, թէ մեծ ուրախութեամբ Լիւպլինի քաղաքապետարանին մէջ կը հիւրընկալեն Դաւիթ Յակոբեանի լուսանկարչական աշխատանքներուն ցուցադրութիւնը, ուր ներկայացուած են նաեւ ՀՀ Նախագահ Սերժ Սարգսեանի 2013-ին Լիւպլին կատարած այցելութենէն լուսանկարներ:

Ելոյթ ունենալով մասնակիցներուն առջեւ` դեսպան Ղազարեանը շնորհակալութիւն յայտնած է Լիւպլինի քաղաքապետին քաղաքապետարանի շէնքին մէջ հայ տաղանդաշատ լուսանկարիչի աշխատանքներու ցուցադրութեան կազմակերպման հնարաւորութեան համար: Դեսպանը կարեւոր համարած է այն հանգամանքը, որ անիկա կազմակերպուած է Լիւպլինի հիմնադրման 700-ամեակի ձեռնարկերուն ծիրէն ներս։

Ցուցահանդէսի կազմակերպման համար Լիւպլինի քաղաքապետին, Լեհաստանի մէջ ՀՀ դեսպանին եւ ցուցահանդէսի բացման բոլոր մասնակիցներուն իր շնորհակալական խօսքը յղած է նաեւ աշխատանքներու հեղինակը` Դաւիթ Յակոբեանը, որմէ ետք ցուցահանդէսը յայտարարուած է բացուած` հնարաւորութիւն տալով այցելուներուն ծանօթանալու ՀՀ Նախագահի արտասահմանեան այցերուն, ինչպէս նաեւ Հայաստանի տեսարժան վայրերուն ուշագրաւ պահերու իւրայատուկ լուսանկարներուն:

Ցուցահանդէսը, որ բացուած է Օգոստոս 14-ին, պիտի շարունակուի մինչեւ Օգոստոս 28` հասանելի ըլլալով Լիւպլինի քաղաքապետարանի բազմաթիւ այցելուներուն եւ քաղաքի հիւրերուն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS