Հայաստանը Իրանին կը Հետաքրքրէ Իբրեւ ԵՏՄ Անդամ Երկիր. Իրանի Հայ Պատգամաւոր

70862

Իրանի մէջ բաւական լուրջ տրամադրուած են Հայաստանի հետ տնտեսական կապերը խորացնելու եւ զարգացնելու ուղղութեամբ:

Այս մասին, ըստ News.am-ի, ըսած է Իրանի խորհրդարանի հայ պատգամաւոր Կարէն Խանլարեանը:

«Լաւագոյն ապացոյցը այն օրինագիծն է, որ կ՝առնչուի Նորտուզ-Մեղրի սահմանային դարպասի համատեղ օգտագործման: Հայաստանը Իրանին կը հետաքրքրէ ոչ միայն իբրեւ հարեւան երկիր, այլեւ իբրեւ ԵՏՄ անդամ պետութիւն, որմով Իրանը շատ կարեւոր կը համարէ Հայաստանի հետ յարաբերութիւններու զարգացումը»,- ըսած է հայ պատգամաւորը:

Կարէն Խանլարեան նշած է, որ երկու երկիրները հեռակայ նպատակներ ունին, եւ հաւանաբար այդ է պատճառը, որ Մեղրիի շրջանին մէջ մեկնարկած է ազատ տնտեսական գօտիի կառուցումը: Անդրադառնալով այն հարցին, թէ արդեօք իրանցի գործարարները հետաքրքրուա՞ծ են Հայաստանի մէջ ներդրումներ կատարելու, ան պատասխանած է. «Ներդրումներու հետ կապուած կան Հարկային օրէնսգրքի, տարադրամի խնդիրներ: Հետաքրքրուածութիւն կայ Իրանի մէջ, յոյս ունիմ, որ առկայ խնդիրները լուծուին, այդպիսի խոստումներ կան տրուած, որ աւելի պիտի դիւրացուի համակարգը: Եթէ խոստումը կատարուի, կը կարծեմ` հետաքրքրութիւնը աւելի պիտի մեծնայ»:

Յիշեցնենք, որ Իրանի Իսլամական Հանրապետութեան նորընտիր նախագահ Հասան Ռոհանիի երդման պաշտօնական արարողութեան մասնակցելու նպատակով՝ աշխատանքային այցով Թեհրան գտնուող ՀՀ Նախագահ Սերժ Սարգսեան, Օգոստոս 6-ին հանդիպում ունեցած էր նախագահ Ռոհանիի հետ: Երկու երկիրներու նախագահները՝ հանդիպման ընթացքին քննարկած էին ինչպէս երկկողմ, այնպէս ալ բազմակողմ փոխգործակցութեան վերաբերող հարցեր: Զրուցակիցները համակարծիք եղած էին, որ հայ-իրանական տնտեսական յարաբերութիւններուն մէջ առկայ է մեծ ներուժ, որուն իբրեւ արդիւնաւէտ օգտագործման ուղղութեամբ անհրաժեշտ է շարունակել հետեւողական աշխատանքը: Նախագահներուն համոզումով, ատիկա պիտի նպաստէ երկու երկիրներու միջեւ առեւտրաշրջանառութեան աշխուժացման եւ ներդրումներու աւելնալուն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS