Արամ Փափազեան Կը Ներկայացնէ Իր «Մեկնելով» Մենացուցահանդէսը

Aram-Papazian_81017

«Մեկնելով» խորագիրով ցուցահանդէսը Արամ Փափազեանին առաջին մենացուցահանդէսն է, որ տեղի կ՛ունենայ Օգոստոս 11-13, «ԼՎԻՍ-Սիթի ինթըրնեշընըլ սքուլ»-ին մէջ (LWIS-CiS), Քանթարի, Պէյրութ: Այս առիթով՝ «Ազդակ» օրաթերթը կարճ զրոյց մը ունեցած է լիբանանահայ երիտասարդ արուեստագէտին հետ:

«Ասիկա իմ առաջին մենացուցադրութիւնս է, հակառակ անոր որ ասկէ առաջ մասնակցած եմ քանի մը հաւաքական ցուցահանդէսներու` սկսեալ Համազգայինի «Թորոս Ռոսլին» կերպարուեստի ցուցահանդէսներէն, մինչեւ իսկ մասնակցած եմ Պերլինի մէջ «Լեմօ արթ» կոչուած ցուցասրահին մէջ տեղի ունեցած ցուցահանդէսին, անոր շնորհիւ ալ մեր գործերը սահմանափակ թիւով տպուեցան խմիչքի մը արտադրութիւններուն վրայ, որոնք բաշխուեցան որոշ ձեռնարկի մը ընթացքին: Այս ցուցահանդէսը կը կազմակերպեմ նախքան ուսման համար Իտալիա մեկնիլս», նշեց ան:

Խօսելով «Մեկնելով» մենացուցահանդէսին մասին` ան ըսաւ. «Հոն ցոյց պիտի տամ տեսողական արուեստի գործեր (վիժուըլ արթ), գծագրութիւններ, թուային արուեստին (տիճիթըլ արթ) ու ձեւաւորման դաշտին մէջ գոյութիւն ունեցող գործեր ու թուային եռածաւալ քանդակներ»:

«Որքան կը յիշեմ, միշտ ալ գծած եմ կեանքիս մէջ: Աշակերտական օրերէս ի վեր յաճախած բոլոր վարժարաններուս գրասեղանները երեւի կը կրեն գրիչէս գիծեր: Պէտք է ըսեմ, որ այդ գրասեղանները նոյնպէս ենթարկուած էին որոշ բանաստեղծական տողերու եւ բաւական թմբուկի կշռոյթներու», նշեց Փափազեան, որ նաեւ «Կարապալա» խումբին հարուածային գործիքներու երաժիշտն է:

Լիբանանի մէջ արուեստի աշխարհին մաս կազմելու կամ արուեստագէտ մը ըլլալու մասին ան յայտնեց, որ որեւէ ասպարէզ իր դժուարութիւններն ու հանգիստ բաժինները ունի, եւ իւրաքանչիւր անհատ իր առօրեային մէջ ենթակայ է իր ապրած երկրին մարտահրաւէրներուն: «Եթէ իւրաքանչիւրս մեր ընելիքը ընենք բնական կերպով, այսինքն` ոչ բռնազբօսիկ կերպով, այն ատեն աւելի դիւրին արուեստագէտ կրնանք ըլլալ, քան մեր ոճէն ու նկարագիրէն տարբեր գործեր փորձենք արտադրել` յարմարելու համար արտաքին աշխարհին: Անոնք, որոնք արուեստով հետաքրքրուած են, կ՛երեւի կա՛մ արուեստասէր են, կա՛մ ալ իրենց ուսման կամ գործին բերումով այդպէս են: Հաւանաբար իմ արտադրած արուեստի գործովս հետաքրքրուած կ՛ըլլան կամ պիտի ըլլան արուեստի աշխարհի նորութիւններուն եւ ներկային հետեւողները», նշեց ան:

«Իսկ ես ընդհանրապէս ազդուած եմ երաժշտութեան կշռոյթներէ, բանաստեղծութիւններէ, փիլիսոփայական հարցադրումներէ: Եթէ ուղղակի արուեստի մասին պիտի խօսիմ, կրնամ ըսել, որ փորձառական, վերացական, արտայայտչապաշտական, յղացական, գերիրապաշտական արուեստներէ ազդուած եմ, ինչպէս նաեւ` փողոցի արուեստէն: Ունիմ նախասիրած արուեստագէտներ, ինչպէս` Ճեքսոն Փուլլոք, Փոլ Քլի, Սալվատոր Տալի եւ այլն», ըսաւ Փափազեան:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS