Մատաղիսի Մէջ Դպրոցական եւ Նախադպրոցական Մասնաշէնքեր Պիտի Կառուցուին

70821

ԱՀ Մարտակերտի շրջանի Մատաղիս համայնքին մէջ, 2016-ի ապրիլեան պատերազմէն ետք, բնակչութեան հիմնական մասը վերադարձած է:

Այս մասին, ըստ Artsakhpress.am-ի, ըսած է Մատաղիսի համայնքի ղեկավար Զաւէն Աւանեսեան` նշելով, որ աւարտին կը մօտենան պատերազմի հետեւանքով տուժած բնակարաններու վերականգնման աշխատանքները:

«Զուգահեռ պետական եւ բարեգործական ծրագիրներով կը վերանորոգուին նաեւ հին բնակարանները: Մասնաւորապէս, յառաջիկային, կը սպասուի 27 բնակարաններու հիմնական վերանորոգում, որոնց մէջ մասնաւորապէս կ՝ապրին երիտասարդ ընտանիքներ»,- ըսած է Զ. Աւանեսեան:

Համայնքի ղեկավարին խօսքով` դպրոցը նոյնպէս տուժած էր ապրիլեան պատերազմին ժամանակ, սակայն անիկա հիմնովին վերանորոգուած է: Իսկ յառաջիկային կը նախատեսուի դպրոցական մասնաշէնքի աւելցումը, քանի որ ներկայիս դպրոցը հակառակ նորակառոյց է, սակայն չի համապատասխաներ ժամանակակից չափանիշներուն: Դպրոցին մէջ կ՝ուսանի մօտ 100 աշակերտ: Համայնքին մէջ առկայ է նաեւ մանկապարտէզ: Անիկա եւս չի համապատասխաներ ժամանակակից չափանիշներուն: Զ. Աւանեսեան նշած է, որ 50 տեղ ունեցող նոր մասնաշէնք պիտի կառուցուի մանկապարտէզին համար, որ պիտի ունենայ նաեւ ապաստարան: Բարեկարգուած են նաեւ գիւղամիջեան բոլոր ճանապարհները:

Խօսելով մարդոց զբաղուածութեան մասին` համայնքի ղեկավարը ըսած է, որ գիւղացիները մասնաւորապէս կ՝աշխատին սեւ խաւիարի արտադրութեան համար նախատեսուած ձկնաբուծարանին, համայնքային կեդրոնին, ջրաելեկտրակայաններուն եւ այլ վայրերու մէջ: Բնակիչներուն մէկ մասն ալ կը զբաղի հողագործութեան մշակումով:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS