«Պզտիկ-Մզտիկ»-ի «Փոքրիկ Լրագրողներ» Աշխատանոցի Մասնակիցներուն Նուիրուած Գնահատանքի Երեկոյ

NS4H9628

Կազմակերպութեամբ «Ազդակ»-ի մանկապատանեկան յաւելուած «Պզտիկ-մզտիկ»-ի խմբագրական կազմին, Յունիս 16-ի երեկոյեան ժամը 7:00-ին, «Ազդակ»-ի «Փիւնիկ» սրահին մէջ տեղի ունեցաւ «Փոքրիկ լրագրողներ» աշխատանոցի մասնակիցներուն ի պատիւ գնահատանքի երեկոյ: Այս մասին կը հաղորդէ «Ազդակ»-ը։

Ձեռնարկին բացումը կատարեց Սրբուկ Ճենանեան, որ անդրադարձաւ Ապրիլ 30-ին տեղի ունեցած «Փոքրիկ լրագրողներ» աշխատանոցին, որուն մասնակից 92 փոքրիկները գնահատելու նպատակով կազմակերպուած էր այդ հաւաքը: Ան դիտել տուաւ, որ աշխատանոցին նպատակն էր փոքրիկները ծանօթացնել մամուլի հրատարակութեան եւ խմբագրական աշխատանքներուն: Սրբուկ Ճենանեան դիտել տուաւ, որ այս առաջին փորձառութեան արձանագրած յաջողութիւնը անակնկալ էր բոլորին համար, մանաւանդ որ փոքրիկները ստեղծագործած էին երեւակայելով եւ իրենց երեւակայութիւնը գիր ու գիծով մարմնաւորելով` շեշտելով, որ միօրեայ հաւաքական աշխատանքին հպարտալից արդիւնքն էր «Պզտիկ-մզտիկ»-ի մայիսի բացառիկ թիւը:

Սրբուկ Ճենանեան հաստատեց, որ այս դրական արդիւնքին արժեւորումը կատարելու եւ փոքրիկները գնահատելու նպատակով կայացած այդ ձեռնարկին նպատակն է նաեւ խթանել զանոնք` շարունակելու այս գործը եւ ապագային իրենց ներդրումը բերելու մամուլի աշխատանքին: «Ուրեմն կը շնորհաւորենք «Փոքրիկ լրագրողները»` մաղթելով անոնց յաջողութիւն ու բարձր դիրքեր, որովհետեւ մեր փոքրիկներուն յաջողութիւնը մեր յաջողութիւնն է, հայ ազգին յաջողութիւնն է», ըսաւ ան` շնորհակալութիւն յայտնելով «Պզտիկ-մզտիկ»-ի մայիսի թիւի հովանաւոր ԱՖՀԻԼ հաստատութեան:

Ապա խօսք առաւ ԱՖՀԻԼ հաստատութեան տնօրէն Յակոբ Լատոյեան, որ անդրադարձաւ այն երեւոյթին, որ ԱՖՀԻԼ-ը իր հիմնադրութեան օրէն նեցուկ կը կանգնի եւ կ՛օժանդակէ գաղութին մէջ կազմակերպուող այն նախաձեռնութիւններուն, որոնց նպատակը լիբանանահայուն բարօրութիւնը, բարգաւաճումն ու սերունդներու դաստիարակութիւնն է: Ան նման նախաձեռնութիւն մը կարեւոր եւ գնահատելի նկատեց` համահաւասար շնորհակալութիւն յայտնելով ծնողներուն եւ ուսուցիչներուն, ինչպէս նաեւ կազմակերպիչներուն, որոնք նման աշխատանքով իրենց ծառայութիւնը մատուցած կ՛ըլլան գաղութին մէջ մարդուժի պատրաստութեան գործին` պատրաստելով լրագրողներ, խմբագիրներ, ինչպէս նաեւ նոր սերունդին մէջ հայ գիրին եւ ընթերցանութեան նկատմամբ սէր սերմանելով:

Եզրափակիչ խօսքը արտասանեց «Ազդակ»-ի տնօրէն եւ գլխաւոր խմբագիր Շահան Գանտահարեան, որ անդրադարձաւ այն իրողութեան, թէ «Պզտիկ-մզտիկ» իր ընթացիկ աշխատանքներուն զուգահեռ կը կազմակերպէ տարբեր տեսակի նախաձեռնութիւններ` շարադրութեան եւ ուղղագրութեան մրցումներ, զարգացման մրցում, իսկ ներկայիս` փոքրիկ լրագրողներու աշխատանոց, որուն ընթացքին աշակերտները առիթ ունեցան թափ տալու իրենց երեւակայութեան, ամբողջ օրուան մը տեւողութեան լրագրողի ու խմբագիրի աշխատանք կատարելու, մասնակիցները թերթին խոհանոցային առօրեային ծանօթացնելու:

Շահան Գանտահարեան հաստատեց, որ այս աշխատանոցը ո՛չ միայն «Պզտիկ-մզտիկ»-ի արձանագրած յաջողութիւնն է, այլ «Ազդակ»-ի իրագործումներէն մէկը կը նկատուի, ինչ որ նաեւ պարտաւորեցնող է` զայն աւանդութեան վերածելու առումով, որովհետեւ այս նախաձեռնութեան շուրջ համախմբուած են վաղուան լրագրողները:

Իր խօսքի աւարտին ան շնորհակալութիւն յայտնեց տնօրէններուն` անոնց ընդառաջումին համար, ուսուցիչներուն` գործակցութեան, ծնողներուն` հոգատարութեան, փոքրիկներուն` խանդավառութեան, իսկ հովանաւորին` հաւատքին ու նեցուկին համար:

Ապա Յակոբ Լատոյեանն ու Շահան Գանտահարեանը մասնակցութեան վկայագիրներ յանձնեցին 92 փոքրիկ լրագրողներուն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS