Ատրպէյճանի Մէջ Լայնածաւալ Զօրավարժութիւններ կը Մեկնարկեն

68306

Ատրպէյճանի զինուած ուժերը, այսօր, լայնածաւալ զօրավարժութիւններ կը սկսին, որոնց կը մասնակցի 23 հազար զինծառայող: Պայմանները մօտ պիտի ըլլան մարտականին: Այս մասին, ըստ 1in.am-ի, կը յայտնէ Ատրպէյճանի ՊՆ մամլոյ ծառայութիւնը:

Զօրավարժութիւնները պիտի շարունակուին մինչեւ Յունիս 24:

Յայտարարութեան մէջ նշուած է, որ «Համաձայն նախագահ Իլհամ Ալիեւի հաստատած ծրագիրին` Յունիս 19-էն սկսեալ պիտի իրականացուին լայնածաւալ մարտավարական զօրավարժութիւններ` զօրքերու մարտական պատրաստութեան, ուժերու եւ միջոցներու կառավարման կազմակերպման, մարտականին մօտ պայմաններուն անոնց փոխգործակցութեան ստուգման նպատակով»:

Զօրավարժութիւններուն կը ներգրաւուի 120 հրասայլ եւ զրահամեքենայ, տարբեր տրամաչափի 180 հրթիռա-հրետանային կայանք, համազարկային կրակի համակարգեր եւ ականանետեր, տարբեր նշանակութեան մինչեւ 30 միաւոր մարտական օդանաւեր, ինչպէս նաեւ ռատիոելեկտրական հետախուզութեան նոր միջոցներ եւ անօդաչու թռչող սարքեր:

Յիշեցնենք, որ Ատրպէյճանի եւ Թուրքիոյ զինուած ուժերը, վերջերս, Նախիջեւանի մէջ իրականացուցած էին ռազմա-մարտավարական զօրավարժութիւններ, որոնք աւարտած են Յունիս 16-ին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS