Համազգայինի «Գայեանէ» Պարի Դպրոցի Պալէի Անդրանիկ Ելոյթը

Ballet4_61817

Յունիս 18-ին, Պէյրութի «Յակոբ Տէր Մելքոնեան» սրահին մէջ «Գայեանէ» պարի դպրոցը ներկայացուց պալէ` կազմակերպութեամբ Համազգայինի  գեղարուեստի դպրոցներու խնամակալութեան: Պալէի պարուսոյցն ու գեղարուեստական ղեկավարն է Ժաքլին Մակինեան: Այս մասին կը հաղորդէ Լիբանանի «Ազդակ» օրաթերթը։

Ողջոյնի խօսքով հանդէս եկաւ պարուսոյց Ժաքլին Մակինեան: Ան բարի գալուստ մաղթեց հանդիսատեսներուն, ապա ըսաւ, որ պալէի աշակերտները իրենց դպրոցի առօրեան պիտի ներկայացնեն բեմին վրայ:

Ան շնորհակալութիւն յայտնեց բեմ յարդարողներուն, ծնողներուն եւ բոլոր անոնց, որոնք նեցուկ կանգնած են ելոյթի կազմակերպման ու իրականացման:

Շուրջ մէկ ժամ պալէի աշակերտները իրենց լաւագոյնը ներկայացնելով յաջողեցան գեղեցիկ ու ջերմ պահեր ստեղծել: Ոգեւորիչ էին փոքր դասարանի` երեք տարեկան փոքրիկներու ներկայացումները, որոնք մեծապէս խանդավառեցին մթնոլորտը, իսկ յոյժ գնահատելի էին բարձր կարգի աշակերտներուն ելոյթները:

Ձեռնարկի աւարտին պարուսոյց Ժաքլին Մակինեան պատուոյ գիրեր եւ գիրքեր յանձնեց պալէի բարձր դասարանի աշակերտներէն ամէնէն աշխատասէրին, ամէնէն բարիին, ամէնէն համեստին, ամէնէն կատակասէրին եւ ամէնէն պատասխանատուին:

Ծաղկեփունջերն ու ծափահարութիւնները լաւագոյն ապացոյցն էին ստեղծուած հաճելի եւ հարազատ մթնոլորտին:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS