Ստեփանակերտի Օդակայանին Մէջ՝ Օդային Փառատօն (լուսանկարներ)

68279

ԱՀ տնտեսութեան նախարարութեան եւ «Եէլ Էքսդրիմ պարկ» ընկերութեան նախաձեռնութեամբ, Յունիս 17-ին, Ստեփանակերտի օդակայանին մէջ կազմակերպուած է օդային փառատօն: Այս մասին կը հաղորդէ Artsakhpress.am-ը։

«Եէլ Էքսդրիմ պարկ» ընկերութեան համահիմնադիր Տիգրան Չիբուխչեան յայտնած է, որ մասնակիցները հնարաւորութիւն ունին Ստեփանակերտի օդակայանէն զբօսաշրջային թռիչքներ կատարել երկտեղանի ինքնաթիռով, պարապլանով եւ օդապարիկով:

«Փառատօնին նպատակն է Արցախի մէջ զարգացնել զբօսաշրջութեան ոլորտը, բարձրացնել տեղեկացուածութիւնը Արցախի թեթեւ թռիչքներու ներուժին մասին, աշխուժացնել երիտասարդական կեանքը, նպաստել երիտասարդութեան ազատ ժամանցին եւ առողջ ապրելակերպի կազմակերպման ու խրախուսել հետաքրքրական գործարար նախագիծերու իրականացումը»,- ըսած է Տ. Չիբուխչեան:

Անոր խօսքով` շուրջ 30 տոմս գնած են երեւանցիները, որոնք այդ օրը Ստեփանակերտի օդակայանին մէջ օգտուած են օդային թռիչքներէն. արցախցիներն ալ բաւական հետաքրքրուած են, եւ մեծ թիւով տոմսեր վաճառուած են, քանի որ գործած են բարձր զեղչեր:

ԱՀ տնտեսութեան փոխնախարար Սերգէյ Շահուերդեան, իր հերթին, ըսած է, որ այս ձեռնարկներուն նպատակը զբօսաշրջութեան զարգացումն է: «Մենք կ՝ուզենք ցոյց տալ, որ ասիկա Հայաստանի մէկ մասն է, ուր կ՝ընթանայ բնականոն կեանք, երիտասարդութիւնը կը զուարճանայ, նաեւ այն, որ մենք բացի պատմամշակութային զբասաշրջութենէն, ունենք նաեւ արկածային զբօսաշրջութիւն»,- ըսած է Ս. Շահուերդեան:

Աննա Բարսեղեան, ով ժամանած է Երեւանէն եւ արդէն օգտուած է պարապլանէն, ըսած է. «Բաւական տպաւորուած եմ եւ յոյս ունիմ, որ յառաջիկային այս ոլորտը ալ աւելի պիտի զարգանայ, եւ մարդոց մեծ հոսք պիտի նկատուի դէպի Արցախ, որոնք ինծի պէս պիտի հիանան այս հրաշք բնութեամբ»:

Օդապարիկէն օգտուած Վահէ Պօղոսեան, իր հերթին, ըսած է, որ առաջին անգամ է օդապարիկ կը նստի եւ պարզապէս հիացած է:

Փառատօնի համերգային մասով հանդէս եկած են «Շուշուա բենդ», «Nemra» ռոք խումբերը եւ յայտնի «DJ»-ներ:

 

 

 

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS