Կոմիտաս Սրբազանը Մայր Հայաստանի «Մայրութիւն»-ը Յանձնեց Սփիւռքի Նախարարին

IMG_7269

Յունիս 15-ին յունահայոց թեմի առաջնորդ կաթողիկոսական փոխանորդ Գերաշնորհ Տէր Կոմիտաս արք. Օհանեանը այցելեց ՀՀ սփիւռքի նախարարութիւն:

Ողջունելով հիւրը` Սփիւռքի նախարար Հրանոյշ Յակոբեան բարձր գնահատեց Տէր Կոմիտասի մատուցած հոգեւոր ծառայութիւնները Սփիւռքի մէջ: «Մարդ, որ ծնած է մեզ համար հոգատարութեան, սիրոյ, ջերմութեան կեդրոն համարուող Սուրիոյ մէջ, ապա մեկնած է Լիբանան  եւ ուսանած Մեծի Տանն Կիլիկիոյ Կաթողիկոսութեան Դպրեվանքի մէջ, ըլլալով տաղանդաւոր անձնաւորութիւն՝ զբաղած է նաեւ երաժշտութեամբ, ուսում ստացած է Լիբանանի եւրոպական երաժշտանոցին մէջ, ապա  մասնագիտացած  եկեղեցական ծիսագիտութեան եւ եկեղեցական ճարտարապետութեան մէջ, ստացած համալսարանական կրթութեան դոկտորի աստիճան: Համառօտ, այսպէս կրնամ ներկայացնել Գերաշնորհ Տէր Կոմիտաս արքեպիսկոպոս Օհանեանը: Սակայն, նախեւառաջ, ան մտքի եւ հոգիի մարդ է, որ ստանձնած է մարդոց ծառայելու մեծագոյն առաքելութիւնը, եւ ուր ալ տարած են ճանապարհները, ամէնուր յարգանք ու սէր վայելած է»,- ըսաւ Սփիւռքի նախարար Հրանոյշ Յակոբեան:

Նախարարը ընդգծեց նաեւ, որ Գերաշնորհ Տէր Կոմիտասը,  1997 – 2005 թթ. եւ 2012 – 2016թթ. ծառայելով իբրեւ Վենեզուելահայոց հոգեւոր տեսուչ՝ շունչ ու հոգի հաղորդած է վենեզուելահայ համայնքին, իր ներդրումը ունեցած է Վենեզուելայի կողմէն Հայոց Ցեղասպանութեան ճանաչման գործին: «Այսօր ըլլալով Յունահայոց թեմի կաթողիկոսական փոխանորդ` Գերաշնորհ Տէր Կոմիտաս արք. Օհանեանը աւելի ծաղկուն կը դարձնէ յունահայ համայնքը, ստեղծուած դժուարին իրավիճակներու մէջ հաւատ կը ներշնչէ, յոյս կու տայ մեր հայրենակիցներուն, կը նպաստէ հայապահպանութեան, ազգային ինքնութեան գիտակցման»,- նշեց նախարարը:

 Սփիւռքի մէջ հայկական արուեստը տարածելու, այդ ոլորտէն ներս ստեղծագործական եւ կատարողական բարձր վարպետութեան եւ իր գործունէութեամբ Հայաստան-Սփիւռք գործակցութեան զարգացման գործին մէջ զգալի ներդրում ունենալուն համար, նախարար Հրանոյշ Յակոբեան Գերաշնորհ Տէր Կոմիտաս արք. Օհանեանը պարգեւատրեց ՀՀ սփիւռքի նախարարութեան «Կոմիտաս» մետալով:

Յունահայոց թեմի կաթողիկոսական փոխանորդը շնորհակալութիւն յայտնեց ջերմ ընդունելութեան եւ պարգեւին համար: «Սրտագին շնորհակալութիւնս կ’ուզեմ արտայայտել այս ազնիւ եւ անմոռանալի արժանաւորութեան՝ Կոմիտասի անուան շքանշանով պատուելու զիս։ Առաջին հերթին, կ’ուզեմ սրտանց շնորհաւորել Սփիւռքի նախարարութեան այս շէնքին նոր կայքը, կ’աղօթեմ, որ այստեղ աւելի ծաղկուն եւ բեղմնառատ գործունէութիւն ունենաք ձեր սրտի կապին հետ, որ հայ Սփիւռքն է։ Հայաստանի իրականութեան մէջ, Սփիւռքի նախարարութիւնը այն ոգեղէն կամուրջն է, այն ոգեղէն սրտի երակը, որ Հայրենիքէն դէպի Սփիւռք եւ փոխադարձաբար Սփինիւռքէն դէպի Հայրենիք հասնող արիւնը, որ կը շրջի, որովհետեւ Սփիւռքը առանձին գոյութիւն ունենալու իմաստ չունի։ Այո՛ մենք ամէն գնով կը պահենք մեր ազգային դիմագիծը, մեծապէս կարեւորպութիւն կու տանք մեր հայ լեզուի գործածութեան եւ մեր զաւակները հայօրէն կրթելու, ուր որ ալ ըլլան, բայց այս արեան հեղումը  մայր հայրենիքէն դէպի իր զաւակները այնքան էական է եւ կենսական, որ այս վերջին տասնամեակներուն պէտք է ըսել, որ յանձինս Տիկին Հրանոյշ Յակոբեանի, ան իր գործը կը կատարէ, ոչ թէ իբրեւ պարտականութիւն, այլ իր ներսէն բխած մղումով։

Հանդիպման աւարտին՝ Կոմիտաս սրբազանը՝ վերադառնալով իր շնորհակալութեան զգացումներուն՝ Սփիւռքի նախարարին ըսաւ,- «Նկատի առնելով, որ դուք Մայր Հայաստանի մայրութիւնը կու տաք Սփիւռքին, ամենամեծ շքանշանը, որ ես կ’ուզեմ տալ Ձեզի` մայր Հայաստանի «մայրութիւն»-ն է», եւ Սփիւռքի նախարար Հրանոյշ Յակոբեանին նուիրեց Մարիամ Աստուածածնի սրբապատկերը:

IMG_7295-659x1024

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS