Այս “Այո”-ն Օրինական Չէ. Թուրքիոյ Խորհրդարանի Հայ Պատգամաւորները Մեկնաբանած են Հանրաքուէի Արդիւնքները

ap.thumbԹուրքիոյ խորհրդարանի հայ պատգամաւորներ Սելինա Տողան ու Կարօ Փայլան Պոլսոյ հայկական պարբերականներէն «Ակօս»-ին տուած հարցազրոյցի ընթացքին մեկնաբանած են Թուրքիոյ մէջ Ապրիլ 16-ին տեղի ունեցած սահմանադրական փոփոխութիւններու վերաբերեալ հանրաքուէի արդիւնքները:

Ըստ անոնց` հանրաքուէն ու անոր արդիւնքները անօրինական են, քուէարկութիւնը անցած է աննախադէպ ընտրախախտումներով, որոնք պէտք է քննուին:

«Ակօս»-ը կը նշէ, որ երկրին մէջ արտակարգ դրութեան պայմաններուն մէջ քաղաքացին գացած է քուէարկութեան: Ըստ ոչ պաշտօնական տուեալներու` մարդոց 51,41 տոկոսը կողմ քուէարկած է կառավարման նախագահական համակարգին, 48,59 տոկոսը` «ոչ» ըսած է: Պարբերականը կը յայտնէ, որ քուէարկութեան աւարտէն ետք, երբ կը հաշւուէին ձայները, բազմաթիւ չկնքուած ծրարներ լեցուած են քուէատուփեր, «ոչ»-ի քուէաթերթիկով միլիոնաւոր ծրարներ աւելի ուշ աղբամաններուն մէջ  յայտնաբերուած են:

Թուրքիոյ քրտամէտ Ժողովուրդներու ժողովրդավարական կուսակցութեան պատգամաւորներէն Կարօ Փայլան իր խօսքին մէջ ընդգծած է, որ Թուրքիոյ քրտաբնակ շրջաններուն մէջ ճնշումներու ու բռնագաղթի հետեւանքով քուէարկութեան մասնակցութիւնը քիչ եղած է, ըստ անոր` 500.000 քիւրտ քաղաքացի չէ կրցած մասնակցիլ հանրաքուէին. անոնք ստիպուած եղած են լքելու իրենց հայրենի քաղաքներն ու գիւղերը:

Փայլան վստահ է, որ կեղծիքով յաղթանակի հասած Ռեճեփ Թայիփ Էրտողանի իշխանութիւնը ստիպուած պիտի ըլլայ ետ կանգնելու այդ ճանապարհէն:

Թուրքիոյ գլխաւոր ընդդիմադիր ուժը համարուող Ժողովրդահանրապետական կուսակցութեան պատգամաւոր Սելինա Տողան, իր հերթին, ընդգծած է, որ Գերագոյն ընտրական խորհուրդը պետութեան ճնշման տակ ստիպուած եղաւ դիմելու նման ընտրակեղծիքներու, քանի որ վստահ էին, որ ժողովուրդին մեծ մասը «ոչ» պիտի  քուէարկէ:

Տողան յայտնած է, որ իր կուսակցութիւնը պիտի դիմէ նաեւ Սահմանադրական դատարան, ինչպէս նաեւ` Մարդու իրաւունքներու եւրոպական դատարան:

Ան, միեւնոյն ժամանակ, շեշտած է, որ հակառակ երկրին մէջ յայտարարուած արտակարգ դրութեան, բազմաթիւ ճնշումներուն ու խոչընդոտներուն` նման արդիւնք արձանգրելը ընդդիմադիր ժողովրդավար հատուածի համար մեծ յաջողութիւն է:

Նշենք, որ կառավարման նախագահական համակարգին կողմ արտայայտուած են հիմնականօրէն երկրի կեդրոնական նահանգներուն մէջ: Իշխանութիւններու առաջարկած սահմանադրական փոփոխութիւնները խիստ հակազդեցութեան ունեցած են Թուրքիոյ խոշոր քաղաքներուն մէջ` Սթամպուլի, Անգարայի, Իզմիրի, Ատանայի, Մուղլայի, Անթալիոյ մէջ եւ այլուր: Էրտողանին դէմ է նաեւ քրտաբնակ շրջաններուն մեծ մասը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS