Պոլսոյ Հայոց Պատրիարքի Տեղապահ Պեքճեան Հանդիպած է Հայ Համայնքին Պատկանող Հիմնադրամներու Նախագահներուն Հետ

Değabah-Bekçiyan-VADİP’leՊոլսոյ Հայոց պատրիարքի տեղապահի պաշտօնին ընտրուած Գարեգին արք․ Պեքճեան եւ պատրիարքարանի Եկեղեցական խորհուրդի նախագահ Սահակ եպս․ Մաշալեան երէկ հանդիպում ունեցած են հայ համայնքին պատկանող հիմնադրամներու նախագահներուն հետ, «Թերթ․ամ»-ի համղորդմամբ՝ կը տեղեկացնէ «Ակօս»-ը:
Բարձրաստիճան երկու հոգեւորականները համայնքի ներկայացուցիչներուն հետ քննարկած են Պոլսոյ պատրիարքի ընտրութեան շուրջ ստեղծուած ճգնաժամային իրավիճակը եւ Թուրքիոյ մէջ սահմանադրական փոփոխութիւններու վերաբերեալ հանրաքուէէն ետք իրենց ընելիքները:

Ժողովէն ետք հիմնադրամներու նախագահներուն հրապարակած ընդհանուր յայտարարութեան մէջ կը նշուի, որ առկայ խնդիրներու անյապաղ լուծման անհրաժեշտութեան եւ Պոլսոյ հայ համայնքի`օրինական պատրիարք ընտրելու արդար պահանջքի բաւարարման հարցով կողմերը համակարծիք են եւ պատրաստ` միասին առաջնորդելու եկեղեցական կարգին համապատասխան օրինական գործընթացը:

Մեկնաբանելով տեղի ունեցած հանդիպումը` արք․ Պեքճեան զայն գնահատած է «բաւական դրական»:

«Մենք մտքեր ու կարծիքներ փոխանակեցինք: Ես անոնց յիշեցուցի, որ պատրիարքի ընտրութեան գործընթացը սկսելու հարցով իրենք պէտք է աւելի աշխոյժ ու կառուցողական ըլլան», – ըսած է Պեքճեան:

Յիշեցնենք, որ Փետրուարին Էջմիածինի մէջ կայացուած որոշման համաձայն` Մարտ 15-ին Սթամպուլի մէջ տեղի ունեցաւ Պոլսոյ Հայոց պատրիարքի տեղապահի ընտրութիւն: Ընտրութեան յաղթեց արք․Պեքճեան։ Սթամպուլի նահանգապետարանը անակնկալ կերպով միջամտեց ընտրութիւններուն: Սթամպուլի նահանգապետի տեղակալը, նախքան պատրիարքարանին մէջ ընտրութիւններու սկսիլը, գրութիւն ուղարկած էր, որ իրաւաբանօրէն անհնար կը համարէր պատրիարքական ընտրութիւններու գործընթացի մեկնարկը: Այս գրութիւնը Պոլսոյ Հայոց պատրիարքի տեղապահի ընտրութիւններէն անմիջապէս ետք պատրիարքարանի հոգեւորականներուն ներկայացուցած էր տեղապահի ընտրութիւններուն պարտուած փոխանորդ Արամ արքեպիսկոպոս Աթէշեան եւ յայտարարած, որ պիտի չհեռանայ տեղապահի պաշտօնէն:

Պոլսոյ պատրիարք Մեսրոպ Մութաֆեան մահաքունի մէջ կը գտնուի 2008-էն եւ չի կրնար կատարել պատրիարքի իր լիազօրութիւնները: Անոր փոխարէն այդ լիազօրութիւնները կը կատարէր Արամ արք․ Աթէշեան, որ ընտրուած էր ոչ թէ համայնքի, այլ պետութեան կողմէի:

Պոլսոյ հայ համայնքի ներկայացուցիչները տեւական ժամանակ է` կը պահանջէին կայացնել նոր ընտրութիւններ` ցանկալով իրենց առաջնորդ ունենալ ոչ թէ պետութեան կողմէ նշանակուած, այլ` իրենց ձայներու արդիւնքով ընտրուած անձը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS