Կը Մեկնարկէ Երեւանի Աւագանիի Ընտրութիւններու Քարոզարշաւը

Ապրիլ 21-ին կը մեկնարկէ Մայիս 14-ին կայանալիք Երեւանի աւագանիի ընտրութիւններուն քարոզարշաւը, որ պիտի տեւէ մինչեւ Մայիս 12-ը` ներառեալ:

yerevan city councilԵրեւանի քաղաքապետի ընտրութիւններուն կը մասնակցի երեք քաղաքական ուժ. Հայաստանի հանրապետական կուսակցութեան համամասնական ցուցակը կը գլխաւորէ գործող քաղաքապետ Տարօն Մարգարեան, «Ելք»-ինը` պատգամաւոր Նիկոլ Փաշինեան, իսկ «Երկիր Ծիրանի»-ինը` Զարուհի Փոստանջեան:

Ընտրութիւններուն ՀՀԿ-ն կը մասնակցի «Յանուն Երեւանի» կարգախօսով: Ընտրութիւններուն մասնակցող միւս քաղաքական ուժի` «Ելք» դաշինքի կարգախօսը հետեւեալն է` «Երեւան ջան, ելք կայ»: Դաշինքը նաեւ տեսահոլովակ նկարահանած է, ուր կ՛երգէ նաեւ դաշինքի համամասնական ցուցակը գլխաւորող Նիկոլ Փաշինեան:

Կէսգիշերին դաշինքի թեկնածուները ու համակիրները քարոզարշաւը սկսած են Ազատութեան պողոտայի վրայ գտնուող յուշահամալիրի մօտէն, ուրկէ օդապարիկներ ձգած են երկինք, կը հաղորդէ News.am-ը:

«Ելք»-ը արդէն յայտարարած է նաեւ, թէ Ապրիլ 21-ին Մոսկովեան, Իսահակեան եւ Տէրեան փողոցներուն յարող հատուածէն պիտի մեկնարկէ երթ, որ պիտի աւարտուի Հիւսիսային պողոտայ – Տէրեան խաչմէրուկին յարող տարածքին մէջ, ուր պիտի կայանայ հաւաք եւ համերգ:

«Երկիր Ծիրանի»-ի առաջնորդ Զարուհի Փոստանջեան խոստացած է, որ կարգախօսը պիտի յայտնէ այսօր: Կուսակցութիւնը քարոզարշաւը պիտի սկսի հեծանիւի երթով, որ պիտի մեկնարկէ Ազատութեան հրապարակէն, Ապրիլ 21-ին, ժամը 17:00-ին:

Մայիսի 13-ին լռութեան օր է, իսկ 14-ին պիտի կայանան ընտրութիւնները: Նշենք, որ պիտի ընտրուի 65 հոգինոց աւագանի: Երեք ուժերու մասնակցութեան պարագային անցողիկ շեմ սահմանուած չէ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS