Ատրպէյճան 30 Միլիոն Եուրօ Կաշառք Բաժնած Է ԵԽԽՎ-ի Մէջ

0421azr

Բրիտանական «Կարտիըն» թերթը անդրադարձած է Ատրպէյճանի կողմէ Եւրոխորհուրդի Խորհրդարանական վեհաժողովի (ԵԽԽՎ) անդամները կաշառելու ու Ալիեւը քննադատող զեկոյցները տապալելու մասին պնդումներուն:

Ըստ Panorama.am-ի՝ թերթը կը գրէ, թէ այս պնդումներուն իբրեւ հետեւանք, Եւրոպայի ամենահին իրաւապաշտպան կառոյցէն կը պահանջուի ստեղծել զեղծարարութեանց դէմ պայքարող յատուկ մարմին մը։

324 անդամ ունեցող ԵԽԽՎ-էն երկու բարձրաստիճան պաշտօնատարներ թերթին հաղորդած են, որ իրենք վստահ են, թէ ԵԽԽՎ-ի անդամներու քուէներուն դիմաց կաշառք առաջարկուած է Պաքուէն:

Ատրպէյճանի նախկին դեսպան, իսկ այժմ՝ այլախոհ գործիչ Արիֆ Մամատով կը պնդէ, որ իր երկրի պատուիրակութիւնը իր տրամադրութեան տակ ունի մօտաւորապէս 30 միլիոն եուրօ, նման կաշառքներ կատարելու համար։

ԵԽԽՎ-ի Շուէտի պատգամաւորներէն ու նախկին արդարադատութեան նախարար Թոպիաս Պիլսթրոմ ըսած է, որ ԵԽԽՎ-ի «շատ վստահելի անդամներ» իրեն փոխանցած են, թէ իրենց առաջարկուած է կաշառք՝ որոշ ձեւով քուէարկելու համար: Պիլսթրոմ մէկն է նշեալ մարմինին այն 64 անդամներէն, որոնք ստորագրած են անկախ հետաքննութեան մարմին մը ստեղծելու նախաձեռնութիւնը:

ԵԽԽՎ-ի մէջ «խաւիարային դիւանագիտութեան» պնդումները կը շարունակուին տարիներէ ի վեր: Առաջին անգամ այս պնդումները նշուեցան Եւրոպական կայունութիւն նախաձեռնութեան կողմէ՝ 2012-ին, սակայն անոնք աւելի լրջացան, երբ Միլանի դատախազութիւնը սկսաւ ուսումնասիրելու ԵԽԽՎ-ի նախկին անդամ Լուքա Վոլոնթէի հարցը։ Ան կը մեղադրուէր Ատրպէյճանէն մօտաւորապէս 2.4 միլիոն եուրօ կաշառք վերցնելու յանցանքով, ինչին համար՝ ան Պաքուի կառավարութեան կ՛աջակցէր:

Հակառակ անոր որ ԵԽԽՎ-ի պատգամաւորներուն 20 տոկոսը կոչ կ՛ընէ այս գծով հրատապ քննութիւն կատարելու, վեհաժողովի ղեկավարները ցարդ նման որոշում մը չեն կայացուցած: Այս նպատակով ԵԽԽՎ-ի նախագահ Փետրօ Ակրամունթի վրայ բանեցուած ճնշումները սկսած են աւելի բազմանալու, որպէսզի անյապաղ հետաքննութեան մարմին մը կազմուի:

Թերթը նաեւ կը գրէ, թէ Ակրամունթ արդէն իսկ կը քննադատուի Սուրիոյ նախագահ Պաշշար Ասատի հետ հանդիպելուն համար: Անոր՝ Սուրիա այցելութիւնը կազմակերպուած էր Ռուսիոյ կառավարութեան կողմէ:

ԵԽԽՎ-ի կրաւորական կեցուածքը քննադատողները կը նշեն, որ Պաքուն վեհաժողովը կ՛օգտագործէ՝ Ատրպէյճանի մենատէր Իլհամ Ալիեւին օրինականութեան քօղ տալու համար: ԵԽԽՎ-ի աղմկայարոյց որոշումներէն մէկը կապուած է 2013-ին Ատրպէյճանի մէջ քաղաքական բանտարկեալներու մասին զեկոյցի տապալման, ինչին մէջ վճռական դեր ունեցած է վերոյիշեալ Լուքա Վոլոնթէն:

Եւրոխորհուրդի ընդհանուր քարտուղար Թորպիոռն Եակլանտ եւս Ակրամունթին կոչ ըրած է անձա՛մբ ապահովելու «հետաքննութեան անկախ մարմինի մը ստեղծումը՝ անյապա՛ղ»:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS