Ամերիկահայութիւնը Տեղեկութիւն Չունի Հայոց Ցեղասպանութեան Առնչութեամբ Թրամփի Դիրքորոշման Մասին․ Յարութ Սասունեան

harut sasounianՀայոց ցեղասպանութեան տարելիցի օրը` Ապրիլ 24-­ին, յիշատակի ձեռնարկներ կը նախատեսուին Միացեալ Նահանգներու շարք մը քաղաքներուն մէջ: Ինչպէս «Արմենփրես»-­ի հետ զրոյցի ընթացքին նշած է «Քալիֆորնիա քուրիըր» թերթի հրատարակիչ եւ խմբագիր Յարութ Սասունեան, գլխաւոր ձեռնարկները տեղի պիտի ունենան Նիւ Եորքի եւ Լոս Անճելըսի մէջ: Երկու մեծ քաղաքներուն մէջ կայանալիք ոգեկոչման ձեռնարկներուն պիտի մասնակցին հազարաւոր մարդիկ, որոնց շարքին` քոնկրեսականներ եւ ծերակուտականներ:

«Հայ համայնքի կոչերուն գլխաւոր ուղերձը պիտի ըլլայ արդարութեան համապարփակ պահանջքը, այսինքն` մեր բոլոր ազգային իրաւունքներու վերականգնում ու կորուստներու վերադարձ կամ հատուցում»,- ըսած է Յարութ Սասունեան:

ԱՄՆ բազմաթիւ քոնկրեսականներ նամակ ուղղած են նախագահ Թրամփին` ճանչնալու Հայոց ցեղասպանութիւնը: Ին՞չ ակնկալիքներ կան ատկէ: Հարցումին ի պատասխան՝ Յարութ Սասունեան նշած է, որ ոչ մէկ ակնկալիք կայ:

«Նախագահին ուղղուած քոնկրեսականներու նամակին հետ կապուած ոչ մէկ ակնկալիք կայ: Ամերիկայի հայութիւնը ոչ մէկ տեղեկութիւն ունի, թէ նախագահ Թրամփ ինչ կարծիք կամ դիրքորոշում, նոյնիսկ տեղեկութիւն ունի՞ հայկական որեւէ հարցի մասին»,- աւելցուցած է Յարութ Սասունեան:

Անդրադառնալով պահանջատիրութեան աշխատանքներուն, ան նշած է, որ ատոնք կ՛ընթանան շատ դանդաղ եւ անկազմակերպ: Միակ նորութիւնը Կիլիկիոյ կաթողիկոսարանի հայցն է ընդդէմ Թուրքիոյ` կապուած Սիսի կաթողիկոսարանի կալուածքի վերադարձին հետ:

«Ինչպէս կը տեսնենք, Հայոց ցեղասպանութենէն տարիներ անց Թուրքիան կը շարունակէ ժխտողականութիւնը: Պէտք է ներկայացնել թրքական ժխտողականութիւնը այդ երկրի բռնատիրական երկիր ըլլալու պարունակին մէջ, որպէսզի բոլորը իմանան, որ Թուրքիոյ մէջ բռնապետական վարչակարգ է, անիկա անհանդուրժող եւ ոչ ժողովրդավար երկիր է ընդհանրապէս բոլոր հարցերուն հետ կապուած, ոչ միայն Հայոց ցեղասպանութեան»,- ըսած է ան­:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS