Թուրքիան Հայոց Ցեղասպանութիւնը Իրականացուցած Օսմանեան Կայսրութեան Ժառանգորդն է

erdoganԱյսօրուան Թուրքիան Հայոց ցեղասպանութիւնը իրականացուցած Օսմանեան կայսրութեան ժառանգորդն է,-իրանական «Իրտիփլոմասի.իր» կայքի փոխանցմամբ` յայտարարած է իրանցի քաղաքական վերլուծաբան Սատեղ Մալեքի:

Իրանական աղբիւրին փոխանցմամբ` Սադեղ Մալեքի, անդրադառնալով Թուրքիոյ տարածաշրջանային քաղաքականութեան, մասնաւորապէս նշած է. «Այսօրուան Թուրքիան, որ Հայոց ցեղասպանութիւնը իրականացուցած Օսմանեան Թուրքիոյ ժառանգորդն է, Իրաքի եւ Սուրիոյ մէջ իրականացուող բռնութիւններու հիմնական կատարողն է: Եթէ Սուրիոյ եւ Իրաքի մէջ իշխանութիւնը գտնուէր սուննիներու ձեռքը, Թուրքիան չէր նպաստեր այդ երկիրներու մէջ ճգնաժամի յառաջացման»:

Յիշեցնենք, վերջերս Իրանի Արտաքին գործոց  նախարար Մոհամմադ Ջաւատ Զարիֆ, անդրադառնալով Թուրքիոյ նախագահին եւ ԱԳ նախարարին ըրած հակաիրանական հերթական յայտարարութիւններուն, մասնաւորապէս ըսած էր. «Դուք տեսէք, թէ Թուրքիան, ուր հասած է, այն պարագային, երբ մենք մտահոգուած ենք Թուրքիայով, ընկերները կարծես թէ վատ յիշողութիւն ունին: Իրանը կը մեղադրեն կրօնական տարաձայնութիւններ հրահրելու մէջ, բայց չեն յիշեր, որ մենք անոնց կառավարութեան համար, որ նոյնիսկ շիայ ալ չեն, յեղաշրջման գիշերը մինչեւ լոյս արթուն մնացինք: Անոնք (թուրքերը) եւ վատ յիշողութիւն ունին, եւ անշնորհակալ վերաբերմունք կը ցուցաբերեն անոնց նկատմամբ, որոնք կ՛ընկերակցին իրենց»:

Աւելի առաջ, Թուրքիոյ նախագահ Ռեճեփ Թայիփ Էրդողան Պահրէյն կատարած այցի ընթացքին, անդրադառնալով տարածաշրջանային զարգացումներուն, մասնաւորապէս նշած է. «Իրաքի մէջ առկայ է կրօնական եւ ազգային տարաձայնութիւններ, այնտեղ նաեւ ձեւաւորուած է ինչպէս պարսկական ազգայնականութիւն, այնպէս ալ անջատողական շարժումներ, ատոնց դէմը պէտք է առնել»:

Այդ առնչութեամբ Իրանի մէջ Թուրքիոյ դեսպանը կանչուեցաւ ԱԳՆ, ուր անոր ներկայացուեցաւ իրանական կողմին բողոքը:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS