Տուրքերու Յաւելումին Դէմ Ժողովրդային Բողոքի Բազմամարդ Եւ Խաղաղ Ցոյց`Լիբանանի Մէջ

tsuyts1_31917

Լիբանանի Ռիատ Սոլհ հրապարակը երէկ դարձեալ վերածուեցաւ լիբանանցիներուն բողոքի կեցուածքը արտայայտող վայրի մը, այս անգամ սակայն քաղաքացիներուն վրայ պարտադրուած յաւելեալ տուրքերուն դէմ: Այս մասին կը հաղորդէ «Ազդակ» օրաթերթը։

Կէսօրէ առաջ ժամը 11:00-էն մինչեւ երեկոյեան ժամը 7:00 տեւած ցոյցին դրդապատճառներն էին անցեալ շաբթուան ընթացքին խորհրդարանի լիագումար նիստերուն կողմէ որդեգրուած յաւելեալ տուրքերը, սուտ տուրքերու ցանկը, գետնի վրայ վաճառատուներուն կողմէ գիներու բարձրացումներուն որդեգրումը` նախքան պետական պաշտօնաթերթով տուրքերու յաւելումին հրապարակումը, իսկ այս բոլորին զուգահեռ տարիներէ ի վեր սպասուած աշխատավարձի յաւելումներու չվաւերացուիլը` երեսփոխաններու օրինաթիւի չգոյութեան պատճառով:

Այս պատճառները եւ պետական մակարդակի վրայ տիրող մսխումներն ու փտածութիւնը բաւարար էին, որ ժողովուրդը դարձեալ ընդդիմանայ եւ ուղղուի Ռիատ Սոլհ հրապարակ, ուր քաղաքացիական ընկերութիւնը ներկայ էր իր բոլոր թեւերով:

Բողոքի այս ցոյցին իրենց մասնակցութիւնը բերին նաեւ Փաղանգաւոր, Ընկերվար յառաջդիմական եւ Ազգային ազատականներու կուսակցութիւնները:

Հետաքրքրական էր այն, որ բոլոր ցուցարարները բարձրացուցած էին Լիբանանի դրօշը եւ կը հնչեցնէին միացեալ կարգախօսներ:

Բողոքի բազմամարդ ցոյցը կը տարբերէր նախորդ տարուան ցոյցերէն, այն իմաստով, որ անիկա խաղաղ ցոյց մըն էր: Հակառակ սակայն ցոյցին խաղաղ բնոյթին, իրենց դէմքերը ծածկած խուլիկաններ փորձեցին ապահովութեան ուժերուն դէմ յարձակիլ եւ բախումներու դուռ բանալ: Սակայն ատիկա արգիլելու նպատակով ցուցարար երիտասարդներ մարդկային պատնէշ մը կազմեցին խուլիկաններուն եւ ապահովութեան ուժերուն միջեւ, եւ այդպիսով յաջողեցան պահպանել ցոյցին խաղաղ բնոյթը:

Ռիատ Սոլհ հրապարակ ներկայացաւ վարչապետ Սաատ Հարիրի, որ ցուցարարներուն ուղղեց իր խօսքը:

Հարիրի կոչ ուղղեց ցուցարարներուն կազմելու պատուիրակութիւն մը եւ իրենց պահանջները արձանագրելու, որպէսզի դրական քննարկում կատարուի անոնց շուրջ:

Ան կառավարութեան եւ հանրապետութեան նախագահին անունով խոստացաւ զօրակցիլ քաղաքացիներուն` շեշտելով, որ իրենք վերջ պիտի տան մսխումներուն եւ պիտի պայքարին փտածութեան դէմ:

Վարչապետին ներկայութիւնը ընդվզեցուց ցուցարարները, որոնք իրենց դրօշակներուն գաւազանները եւ իրենց կերպնկալէ ջուրի շիշերը նետեցին անոր կողմը եւ մօտեցան հարուածելու զայն:

Քաղաքացիական ընկերութեան ներկայացուցիչները մերժեցին Հարիրիի առաջարկը` իրենց հետ հանդիպելու եւ խորհրդակցելու իմաստով, այլ անկէ պահանջեցին անմիջապէս ուղղուիլ խորհրդարան եւ ժողովուրդին համեստ դասակարգին վրայ պարտադրուելիք տուրքերը սառեցնել:

Քաղաքացիական ընկերութիւնը յաջորդ ցոյցի թուական ճշդեց չորեքշաբթի, 22 մարտ 2017-ին, կէսօրուան ժամը 12:00-ին:

Ցոյցին աւարտին վարչապետ Հարիրի շնորհակալութիւն յայտնեց բանակին եւ ապահովութեան ուժերուն` ցուցարարներուն նկատմամբ իրենց ցուցաբերած քաղաքակիրթ վարուելակերպին, ինչպէս նաեւ ցուցարարներուն անվտանգութիւնը ապահովելու նպատակով անոնց որդեգրած միջոցառումներուն համար:

Միւս կողմէ, Փաղանգաւոր կուսակցութեան ղեկավար, երեսփոխան Սամի Ժեմայէլ երեկոյեան ժամը 7:00-ին հրաւիրեց մամլոյ ասուլիսի մը, որուն ընթացքին ան ողջունեց ցուցարարները, որոնք ազատ ու անկախ կերպով արտայայտեցին իրենց կամքը եւ բողոքեցին ժողովուրդին վրայ պարտադրուած տուրքերուն դէմ:

«Լիբանանցի ժողովուրդը այսօր իր այս ցոյցով փաստեց, որ կարողութիւն ունի փոփոխութիւն կատարելու եւ արդար պետութեան ձգտելու», ըսաւ ան:

Ժեմայէլ կոչ ուղղեց լիբանանցիներուն, քաղաքացիական ընկերութեան եւ իշխանութեան ստանձնելու պատմական վայրկեանին պատասխանատուութիւնը` շեշտելով, որ Փաղանգաւոր կուսակցութիւնը կը շարունակէ բարեկարգումներ պահանջել:

 

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS